Read Biblija - Pe Baltitko Romani čib (Romanes) 2019 Baltic Romani Bible 4 Kralip 13 Bible Online

4 Kralip 13 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 13

¹Pe biš te tríto berš Ioasoskiro, Ohozijaskire-čhavéskiro, kon sys králi pe Judéia, jaciá kralísa Ioahazo, Iiujoskiro čhavó, pe Izrailjo dre Samárija, i sys kralísa dešuefta berš.

²I kerdiá jov fuipén dre jakhá Ráskire-Devléskire, i psirdiá dre gréhi Jerovoamoskire, Navatoskire čhavéskire, savó lydžijá Izrailjo dro grého, i na otiacia léndyr.

³I zahačíia xolý Ráskire-Devléskiri pe Izrailjo, i Jov otdyjá len dre Azailoskiro vast, Sirijákiro-kralískiro, i dro Vienadadoskiro vast, Azailoskire čhavéskiro, dre saré dyvesá.

⁴I mangdiápe o Ioahazo Ráske-Devléske, i šundiá les Raj Devél; pal-dová so Jov dykhciá Izrail'tianengiro pritasaiben, syr tasadia len Sirijákiro králi.

⁵I dyjá Raj Devél Izrail'tianenge zrakhibnaris, i vyginé jone tel Sirijanengire vastéstyr, i dživdé Izrailjoskire čhavé dre péskire šátry, syr tasiá i pe tríto dyvés.

⁶Ne jone usajékh na otginé grehéndyr Jerovoamoskire kheréstyr, savó lydžijá Izrailjo dro grého; psirdé dre lénde, i dembitko vešoro terdijá dro Samárija.

⁷Ioahazoste jaciápe xaladén jekh pandždešá manušá, savé sys uklisté pe grénde, deš maribnýtka vurdyná i deš tysjoncy manušá, savé sys pezal, pal-dová so vymardia len Sirijákiro králi i kerdiá léndyr práho te štakiren ĥerénca.

⁸Javír lav pal Iohazoste i pal saró, so jov kerdiá, i pal murškané réndy léskire, isyn začhindló dro beršýtka arhívy pal Izrailjoskire kral'jénde.

⁹I pasijá Ioahazo péskire dadénca, i garadé les dre Samárija. I jaciá kralísa Ioáso, léskiro čhavó, pe štéto léskiro.

¹⁰Pe trijánda eftáto berš Ioasoskiro, kon sys králi pe Judéia, jaciá kralísa Ioáso, Ioahazoskiro čhavó, pe Izrailjo dro Samárija i sys kralísa dešušov berš.

¹¹I kerdiá jov fuipén dre jakhá Ráskire-Devléskire; jov na jačkirdiá saré Jerovoamoskire gréhi, kon sys Navatoskiro čhavó, savó zalydžijá Izrailjo dro grého, ne psirdiá dre lénde.

¹²Javír lav pal Ioasoste i pal saró, so jov kerdiá, i pal murškané léskire réndy, syr jov mardiápe Amasijasa, Judejákire kralísa, isyn začhindló dre beršýtka arhívy pal Izrailjoskire kral'jénde.

¹³I pasijá Ioáso péskire dadénca, a Jerovoámo bestiá pe léskiro trono. I garadó sys Ioáso dre Samárija Izrailjoskire kral'jénca.

¹⁴O Jelisiéjo zanasvalyja nasvalypnasa, savjátyr jov korigedýr (pozže) i myjá. I javdiá ke jov Ioáso, Izrailjoskiro králi, i rondiá pe léste, i rakirdiá: “Dádo miro! Dádo miro! Maribnýtko vurdén Izrailjoskiro i graja léskire!”

¹⁵I phendiá léske Jelisiéjo: “Le lúko i maribnýtka bustiá (striély).” I lyjá jov lúko i maribnýtka bustiá (striély).

¹⁶I phendiá Jelisiéjo Izrailjoskire kralíske: “Čhuv tyró vast pe lúko.” I čhudiá jov péskiro vast. I čhudiá upré Jelisiéjo péskire vastá pe kralískire vastá.

¹⁷I phendiá Jelisiéjo: “Otčhakir fenštra pe vastóko.” I jov otčhakirdiá. I phendiá Jelisiéjo: “De kar'je.” I jov dyjá kar'je. I phendiá: “Daja maribnýtko bust (striéla) isyn zrakhibén Rástyr-Devléstyr i bust vaš zrakhibén proti Sirija, i tu domaresa Sirijanen dro Afieko dro kónco (jagóro).”

¹⁸I phendiá Jelisiéjo: “Le bustiá.” I jov lyjá. I phendiá Izrailjoskire kralíske: “Mar pir phuv.” I pekadiá jov trin móly, i terdijá.

¹⁹I xoliásyja pe léste Ráskire-Devléskiro manúš, i phendiá: “Treindiá te mares pandž, ci šov móly; tedy tu domaresas Sirijanen sarésa, a akaná féni trin móly domaresa Sirijanen.”

²⁰I myjá Jelisiéjo, i garadé les. I baró ke dar xaladybén Moavitianendyr javdiá pe phuv pe javír berš.

²¹I sys adiáke, so, kiéli garadé jekhés manušés, tedy dykhí davá baró ke dar xaladybén, manušá, savé garadé, čhurdyné odolé manušés dre Jelisiejoskiri koplíca; i jov syr pyjá, čiladiape ke Jelisiejoskire kokalý i otdžidyjá, i uštyjá pe péskire ĥerá.

²²O Azailo, Sirijákiro králi, pritasavelas Izrail'tianén dre saré dyvesá Ioahazoskire.

²³Ne Raj Devél sykadiá tangipén (zmilyndiape) pe lénde, i otmekciá lénge, i porisija ke jone vaš zaviéto Péskiro Avraamosa, Isaakosa i Jakovosa, i na kamdiá te protradel len, i na otriskirdia len Péskire móstyr ke davá dyvés.

²⁴I myjá Azailo, králi Sirijákiro, i jaciá kralísa Vienadado, léskiro čhavó, pe štéto léskiro.

²⁵I lyjá pale Ioáso, Ioahazoskiro čhavó, Vienadadoskire vastéstyr, Azailoskiro čhavó, fórja, savé jov lyjá maribnása léskire dadéskire vastéstyr Ioahazostyr. Trin móly rozmardiá les Ioáso i riskirdiá Izrailjoskire fórja.