Read Biblija - Pe Baltitko Romani čib (Romanes) 2019 Baltic Romani Bible 4 Kralip 14 Bible Online

4 Kralip 14 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 14

¹Pe javír berš Ioasoskiro, Ioahazoskire-čhavéskiro, kon kralindia pe Izrailjo, jaciá kralísa Amásija, Ioasoskiro čhavó, králi pe Judéia.

²Biš te pandž berš sys jov, kiéli jov jaciá kralísa, i biš te jeniá berš sys kralísa dro Jerusalimo. Lav léskire-dákiro Iiegoadan', Jerusalimóstyr.

³I kerdiá jov lačhés dre jakhá Ráskire-Devléskire, sarésa na adiáke, syr léskiro dad Davído. Jov dro saró kerdiá adiáke, syr léskiro dad Ioáso.

⁴Jekh vučipená na sys otparude; manušá iščo (inké) kerdé svénta janybená Ráske-Devléske i xačkirdé dróga smóly pe vučipená.

⁵Kiéli jaciá zoraló kralipén dre léskire vastá, tedy jov muliakirdiá peskiren dynar'jén, savé zamardé kralís, léskire dadés.

⁶Ne čhavén umaribnar'jéngiren jov na domardiá, adiáke, syr isyn čhindló dre Mojzáskire-Zakonoskiri lylvarí, dre saví Raj Devél priphendiá, rakirí: “Naštý te kerés adiáke, sob (kaj) te čhuvén kára dadénge meribnasa pal čhavénde, i čhavénge naštý te den kára meribnasa pal dadende; ne kažno (sváko) pal péskiro réndo (diélo) isyn bangó (musinela) te javél dre xas' (kára) meribnasa.”

⁷Jov vymardia deš tysjoncy Idumejanen pe Londo dólo, i lyjá Siela maribnása, i dyjá láke lav Iokofieilo, savó jačélape i ke davá dyvés.

⁸Tedy bičhadiá o Amásija manušén ke Ioáso, Izrailjoskiro králi, kon sys Ioahazoskiro čhavó, i Iiujoskiro ŭnuko (niepoto), te phenél: “Vydža, dykhasape jekh pe jekh.”

⁹I bičhadiá o Ioáso, Izrailjoskiro králi, ke Amásija, Judejákiro králi, te phenén: “Žylto xrústo phusadiénca, savó sys pe Liváno, bičhadiá ke kiédro, savó sys pe Liváno, te phenén: ‘Otdé peskirjá čha paloróm miré čhavéske.’ Ne proginé busa (dika) murdalá (zvieri), so sys pe Liváno i štakirde davá žylto xrústo phusadiénca (tierno).

¹⁰Tu domardian Idumejanen, i zaphutija tyró iló. Phutjov i beš péske kheré. Ke so túke te kerés košybén pe péskiri bída? Peresa tu i Ju'da túsa.”

¹¹Ne na kandyjá les o Amásija. I vygijá Ioáso, Izrailjoskiro králi, i dykhnepe, kokoró jov i Amásija, Judejákiro králi, dre Viefsamisa, so sys dre Judéia.

¹²I rozmarde Izrail'tiáni Judejakiren, i roznašnepe odolé pir péskire šátry.

¹³I Amasijaske, Judejákire kralís, Ioasoskire čhavés, kon sys ŭnuko Ohozijaske, zauhtyldia o Ioáso, Izrailjoskiro králi, dre Viefsamisa, i gijá pe Jerusalimo, i rosphagirdiá vánta Jerusalimóskiri Jefriemóskire portatyr ke venglytko pórta pe štardešá kuniá (lokti).

¹⁴I lyjá saró suvnakáj i rup, i saré khoré (sasúdy), savé lathnepe dro Ráskire-Devléskiro Kher, i dre piraliá, i risijá dre Samárija.

¹⁵Javír lav pal Ioasoste, so jov kerdiá, i pal murškané léskire réndy, i syr jov mardiápe Amasijasa, Judejákire kralísa, isyn začhindlé dre beršýtka arhívy pal Izrailjoskire kral'jénde.

¹⁶I pasijá o Ioáso péskire dadénca, i garadó sys dre Samárija Izrailjoskire kral'jénca. I jaciá kralísa o Jerovoámo, léskiro čhavó, pe štéto léskiro.

¹⁷I dživdiá o Amásija, Ioasaskiro čhavó, králi pe Judéia, paló meribén Ioasoskiro, Ioahazoskire-čhavéskiro, kon sys králi pe Izrailjo, dešupandž berš.

¹⁸Javír lav pal Amasijaskire réndy, isyn začhindló dre beršýtka arhívy pal kral'jénde Judejátyr.

¹⁹I dorakirdepe proti léste dro Jerusalimo, i nastiá jov dro Lahiso. I bičhadé pal léste dro Lahiso, i zamardé les odój.

²⁰I jandlé les pe grénde, i garadó jov sys dro Jerusalimo péskire dadénca dro Davidóskiro fóro.

²¹I lyné saré Judejákire manušá Azarijas, savéske sys dešušov berš, i čhudé les kralísa zamiést léskire dadéste Amasijaste.

²²Jov obkerdia Jelafo i otdyjá les Judáske, paló (poslie) dová, syr králi pasijá péskire dadénca.

²³Pe dešupandžto berš Amasijaskiro, Ioasoskire-čhavéskiro, kon sys králi pe Judéia, jaciá kralísa Jerovoámo, Ioasoskiro čhavó, Izrailjoskiro králi, dre Samárija, i sys jov kralísa štardešá jekh berš.

²⁴I kerdiá jov fuipén dre Ráskire-Devléskire jakhá: jov na otgijá saré Jerovoamoskire grehéndyr, Navatoskire-čhaveskirendyr, savó zalydžijá Izrailjo dro grého.

²⁵Jov riskirdiá bregoskire rigá Izrailjoskire, zagiibnastyr dre Jemafo ke mórjo (derjáv) pe čhučí phuv, pir lav Ráskire-Devléskiro, Devléskiro Izrailjoskiro, savó Jov phendiá pirdál Péskire pishariste Ionaste, Amafiinoskire čhavéste, prorokoste Gafhiefierostyr.

²⁶Pal-dová so Raj Devél dykhciá bída Izrailjoskiri, drieván kirki adiáke, so na jaciápe ni bešybnaris, ni vol'none manušés, savó jaciápe, i na sys nikonés, kon délas by vast Izrailjoske.

²⁷I na zakamdiá Raj Devél te vylydžal lav Izrail'tianengiro tel bolybnástyr, i zrakhciá len Jerovoamoskire vastésa, Ioasoskire-čhaveskiresa.

²⁸Javír lav pal Jerovoamoste i pal saró, so jov kerdiá, i pal murškané léskire réndy, syr jov mardiápe i syr riskirdiá Izrailjoske Damásko i Jemafo, saví sys Judaskiri, isyn začhindló dre beršýtka arhívy pal Izrailjoskire kral'jénde.

²⁹I pasijá Jerovoámo péskire dadénca, Izrailjoskiro kral'jénca. I jaciá kralísa Zahárija, léskiro čhavó, pe štéto léskiro.