Read Biblija - Pe Baltitko Romani čib (Romanes) 2019 Baltic Romani Bible 4 Kralip 16 Bible Online

4 Kralip 16 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 16

¹Pe dešueftato berš Fakiejoskiro, Riemaliinoskire-čhavéskiro, jaciá kralísa Aházo, Ioafamoskiro čhavó, kon sys králi pe Judéia.

²Biš berš sys Ahazoske, kiéli jov jaciá kralísa, i dešušov berš jov sys kralísa dre Jerusalimo, i jov na kerdiá lačhés dre jakhá péskire Ráskire-Devléskire, syr Davído, léskiro dad.

³Ne psirdiá jov dromésa Izrailjoskire kral'jengiresa i adiáke-pac' čhavés péskires lydžijá pirdál jag, kerdiá manušéngire magiribena, savén protradyja Raj Devél móstyr Izrailjoskire-čhavéndyr.

⁴I kerdiá svénta janybená (žertvy) i xačkirdiá dróga smóly pe vučipená i pe bérgi i tel kažno zeleno kašt.

⁵Tedy gijá Riecyno, Sirijákiro králi, i Fakija, Riemaliinoskiro čhavó, kon sys Izrailjoskiro králi, proti Jerusalimo, sob (kaj) te len les, i rikirde Ahazos dre osada, ne te pirizorjakiren na mogindlé.

⁶Dre dová časo Riecyno, Sirijákiro králi, riskirdiá Sirijake Jelafo i vytradyjá Judejákire manušén Jelafostyr; i Idumejani zaginé dro Jelafo, i dživéna odój ke davá dyvés.

⁷I bičhadiá Aházo manušén ke Fieglafielasaro [Tiglat-Pilesero-ju.o.], Asirijákiro králi, te phenél: “Pishári tyró i čhavó tyró me som; jav i zrákh man Sirijakire-kralískire vastéstyr i Izrailjoskire-kralískire vastéstyr, savé ĥazdynépe pe mánde.

⁸I lyjá Aházo rup i suvnakái, savó sys dre Ráskire-Devléskiro Kher i dre piraliá kralískire-kheréskire, i bičhadiá Asirijaskire kralíske syr dre dáro (počastunko).

⁹I kandyjá les Asirijákiro králi; i gijá Asirijákiro králi pe Damásko, i lyjá les, i pirilydžija léskire manušén dre Kiro, a Riecynos zamardiá.

¹⁰I gijá králi Aházo gil (pe striéč) Fieglafielasaroske, kon sys králi pe Asirija, dre Damásko, i dykhciá altárjo (žertvieniko), savó sys dro Damásko, i bičhadiá králi Aházo Urijaske rašáske risunko pal altárjo i plano, syr saró te kerén.

¹¹I kerdiá rašáj Urija altárjo pir sykaibnytko (primiérno) risunko, savó bičhadiá králi Aházo Damaskostyr; i kerdiá adiáke rašáj Urija ke javiben Ahazóskiro, kralístyr pe Damásko.

¹²I javdiá králi Damaskostyr, i dykhciá králi altárjo, i podgíia králi ke altárjo, i jandiá pe léste svénto janybén Ráske-Devléske.

¹³I xačkirdiá célo shačkiribén péskiro i marunó janybén, i počhudia čhuibén péskiro, i bryzgindia ratésa péskire mirnone sventoné-dyibnástyr Ráske-Devléske péskiro altárjo.

¹⁴A xarkuno altárjo, savó sys angíl muj Ráskire-Devléskire, jov piričhudia Khangirjákire moskire rigátyr, štetóstyr, savó sys maškirál nevoné altarjostyr i kheresa Ráskire-Devleskiresa, i čhudiá les dalé rigátyr pe šylaly/paš-ratítko (sievierno) rig.

¹⁵I dyjá uphenybén králi Aházo rašáske Urijaske, phení: “Pe baró altárjo xačkir pe zlóko (ránko) célo shačkiribén i bel'velitko marunó janybén, i célo shačkiribén kralístyr i mareskiro janybén léstyr, i célo shačkiribén saré-phuvjákire manušéndyr i marunó janybén léndyr, i čhuibén pe lénde, i kažnoné ratésa célo shačkiribén i kažnoné sventoné janybnaskire Ráske-Devléske ratésa počhuv les; a altárjo xarkuno jačélape ke miro dykhibén.”

¹⁶I kerdiá rašáj Urija saró adiáke, syr priphendiá králi Aházo.

¹⁷I vyphagirdia králi Aházo krengla ramkicy trusciál predki pe róty, i zlyjá léndyr čaré vaš muj, i mórjo (derjáv) zlyjá xarkuné guruvendyr, savé sys tel léste, i čhudiá les pe baruno péto (pólo/mósto).

¹⁸I otparudia učhakirdo savatoskiro (subotakiro) psiriben, savó kerdé pašýl Khangirí, i andratuno kralískiro zagiibén ke Ráskire-Devléskiro Kher, vaš Asirijákire kralíste.

¹⁹Javír lav pal Ahazoste, so jov kerdiá, isyn začhindló dre beršýtka arhívy pal kral'jénde Judejátyr.

²⁰I pasijá Aházo péskire dadénca, i sys garadó péskire dadénca dre Davidóskiro kher. I jaciá kralísa Jezekíia, léskiro čhavó, pe štéto léskiro.