Read Biblija - Pe Baltitko Romani čib (Romanes) 2019 Baltic Romani Bible 4 Kralip 17 Bible Online

4 Kralip 17 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 17

¹Pe dešuiavir berš Ahazóskiro, Judejákire kralískiro, jaciá kralísa Osija, Iloskiro čhavó, dre Samárija pe Izrailjo, i sys kralísa jeniá (bijekhéskiro deš) berš.

²I kerdiá jov fuipén dre jakhá Ráskire-Devléskire, ne na adiáke, syr Izrailjoskire králja, savé sys angledýr léstyr.

³Pe léste vygijá Salmanasaro, Asirijákiro králi, i poddyjape Osija syr vužlo léske i otdelas léske dan' (pritasady).

⁴I dykhciá Asirijákiro králi, so Osija parudia léske, adiáke syr jov bičhadiá manušén ke Sigoro, Jegiptóskiro králi i na janelas dan' Asirijákire kralíske kažno berš; i lyjá les Asirijákiro králi tel rakhiben, i zaphandia les dre bešyben.

⁵I gijá Asirijákiro králi pe sarí phuv, i podgíia ke Samárija, i rikirdia la dre osada trin berš.

⁶Pe jeniáto berš, syr lyjá te kralinél Osija, Asirijákiro králi lyjá Samárija, i lydžijá Izrail'tianén te dživén ke Asirija, i čhudiá len dre Xalaho i dro Xavoro, pašýl reka (len') Gozano, i dre fórja Midijakire.

⁷Kiely lyné te kerén grého Izrailjoskire čhavé angíl péskire Raste-Devléste, Savó vylydžijá len Jegiptóskire phuvjátyr, tel faraonóskire vastéstyr, savó sys králi pe Jegípto, i lyné te den patýv javire devlorénge,

⁸i lyné te kerén pir manušéngire uphenybená, savé sys Náiudy, i, savén tradyjá krig Raj Devél móstyr Izrailjoskire čhavengirestyr, i pir uphenybená Izrailjoskire kral'jéndyr, syr kerdé jone.

⁹I lyné te kerén Izrailjoskire čhavé nalačhé réndy péskire Ráske-Devléske, i kerdé péske vučipená dre saré péskire fórja, lyi rakhibnar'itkone vučardiatyr (bašniatyr) ke fóro zoralé tynénca.

¹⁰I čhudé péste statuly i formy Astartake pe kažno vučí bérga i tel kažno zeleno kašt.

¹¹I lyné odój te xačkirén dróga smóly pe saré vučipená, syr Najudýtka manušá, savén vytradyjá léndyr Raj Devél, i kerdé nalačhé réndy, savé xoliakirenas Ras-Devlés.

¹²I dynarindlé (služyndle) idolénge, pal savénde rakirdiá lénge Raj Devél: “Na kerén davá.”

¹³Tedy Raj Devél pirdál saré Péskire prorokénde, pirdál kažnonéste, prirakhelas Izrailjo i Judas, rakirí: “Risjon tumaré fujé dromendyr, i rakhén Miré priphenybená, uphenybená Miré, pir saró sykliaiben, savó Me priphendjom dadénge tumarenge, i savó Me dyjom tuménge pirdál Miré prorokénde.”

¹⁴Ne jone na kandyné i kaštaliakirde meniá péskire, syr sys meniá léngire dadengíre, savé na patiandyné dre péskire Raste-Devléste.

¹⁵I lyné te na prilén Léskire uphenybená, i Zaviéto Léskiro, savó Jov kerdiá léngire dadénca, i prirakhibena Léskire, savénca Jov prirakhcia len, i giné jone palál pal xarnypén (pustota), i palál pal manušénde, savé dživdé pašýl, pal savénde Raj Devél rakirdiá lénge, sob (kaj) te na kerén adiáke, syr jone.

¹⁶I jačkirdé saré priphenybená Ráskire-Devléskire, péskire Devléskire, i kerdé péske vyčhudé muiá dujén guruvén, i kerdé dembitko viešoro, i mangnepe saré duhenge bolybnaskirenge, i dynarindlé Vaaloske.

¹⁷I lydžánas péskire čhavén i čhajén péskire pirdál jag, i drabakirde, i čovahaniakirde, i otdynepe doléske, sob (kaj) te kerén nalačhés dre Ráskire-Devléskire jakhá i te xoliakiren Les.

¹⁸I rosholiasyja Raj Devél zoralés pe Izrail'tianende, i otriskirdia len Péskire móstyr. Na jaciápe nikonés apríč jekhe Judáskiro ródyco.

¹⁹I o Juda adiáke-pac' na rakhciá Ráskire-Devléskire, péskire Devléskire priphenybená, i kerdiá pir Izrailjoskire uphenybená, syr kerdé jone.

²⁰I otrisija Raj Devél saré Izrailjoskire rodendyr, i primirindia (teliakirdia) len, i otdyjá len dre vastá čorenge, i pe kónco (jagóro) otriskirdia len Péskire móstyr.

²¹Syr Izrail'tiáni durine Davidóskire kheréstyr, i čhudé kralísa Jerovoamos, Navatoskire čhavés; to i ottradyja Jerovoámo Izrail'tianén Rástyr-Devléstyr i zalydžijá len dro baró grého.

²²I kerdé Izrailjoskire čhavé pir saré Jerovoamoskire gréhi, savé jov kerdiá, na otiačne léndyr,

²³paka Raj Devél otriskirdia Izrailjo Péskire móstyr, syr rakirdiá pirdál Péskire pishar'jénde, prorokénde. I sys pirilydžinó Izrailjo péskire phuvjátyr dre Asirija, kaj jov i ke davá dyvés.

²⁴I pirilydžija te dživén králi Asirijákire manušén Vavilonóstyr, i Kutatyr, i Avatyr, i Jemafatyr, i Sieparvaimatyr, i občhudiá te dživén len dre Samarijakire fórja pe štéto Izrailjoskire čhavéngiro. I jone zauhtylde Samárija, i lyné te dživén dre lákire fórja.

²⁵I syr dre anglatunó péskiro džiibén jone odój na dyné patýv Ráske-Devléske, tedy Raj Devél bičhadiá pe lénde ščerén (lieven), savé muliakirdé len.

²⁶I rosphendlé Asirijákire kralíske, i phendlé: “Manušá, savén tu piričhudian te dživén, i dyján te dživén len dre Samarijakire fórja, na džinéna zakóno dolé phuvjákire Devléskiro, i pal dová Jov bičhavéla pe lénde ščerén (lieven), i ĥáda, jone muliakirena len, pal-dová so jone na džinéna zakóno Devléskiro dolé phuvjákiro.”

²⁷I priphendiá Asirijákiro králi, i phendiá: “Bičhaven odorík jekhe manušés rašandyr, savén tumé piričhude zorjása (vysilindle) odothýr; mek te džal i te dživél odój, i jov vysykliakirela len zakonoske dolé phuvjákire pal Devléste.”

²⁸I javdiá jekh manúš rašandyr, savén vyčhudé Samarijatyr, i dživdiá ke Viefíljo, i sykliakirdiá len, syr te den patýv Ráske-Devléske.

²⁹Ĥaljon, jone kerdé kažna (svaka) manušá i peskiren devloré, i čhudé len dre mangipnytka štéty pe vučipená, savé kerdé Samariani, — svaka manušá dre péskire fórja, kaj dživénas jone.

³⁰Vaviloniani kerdé Sukkotbienofenos, Kutiicy kerdé Niergalos, Jemafiani kerdé Ašyma.

³¹Aviicy kerdé Nivhazos i Tartakos, a Sieparvaimcy xačkirdé peskiren čhavén dre jag Adramieliehoske i Anamieliehoske, Sieparvaimskone devlorénge.

³²Maškir davá saró jone dénas patýv i Ráske-Devléske, i čhudé péste rašán pe vučipená péskire manušéndyr, i jone dynarindlé lénde dre mangipnytka štéty pe vučipená.

³³Ráske-Devléske jone dénas patýv, i devlorénge peskirenge jone dynarindlé pir maniéra manušéngiri, savéndyr vyčhurdyne len.

³⁴Ke davá dyvés keréna jone pir anglatuné péskire maniéry: jone na darén Rástyr-Devléstyr, i na keréna pir statúty i pir uphenybená, i pir Zakóno i pir Priphenybená, savé priphendiá te kerén Raj Devél Jakovóskire čhavénge, savéske dyjá Jov Izrailjoskiro lav.

³⁵Sčhudia Raj Devél lénca Zaviéto i priphendiá šylales lénge, rakirí: “Na den patýv devlorénge javirénge, i na mangénpe lénge, i na dynarinén lénge, i na janén svénta dyibená lénge:

³⁶Ne Ras-Devlés, Savó vylydžijá tumen Jegiptóskire phuvjátyr baré zorjása barjasa i protyrdyne vastésa, — Léske den patýv, i Léske mangénpe, i Léske janén svénta dyibén.

³⁷I statúty, i uphenybená, i Zakóno, i priphenybená, savé Jov čhudiá tuménge, pričhuvén zor te spolninen dre saré dyvesá, i na den patýv devlorénge javirénge.

³⁸I Zaviéto, savó Me čhudjom tuménca, na bistren, i na den patýv devlorénge javirénge.

³⁹Jekhe Ráske-Devléske (Jahvaske), Devléske tumareske, den patýv, i Jov zrakhéla tumen saré tumaré vergéngire (vrogengire) vastéstyr.”

⁴⁰Ne jone na kandyné, a kerdé pir anglatuné péskire maniéry.

⁴¹Dalé manušýtka nácyi dénas patýv Ráske-Devléske, ne i peskirenge vyčhindlé mujénge dynarindlé. Adiáke i čhavé léngire i čhavé léngire čhavéngire ke davá dyvés keréna adiáke-pac', syr kerdé léngire dadá.