Read Biblija - Pe Baltitko Romani čib (Romanes) 2019 Baltic Romani Bible 4 Kralip 20 Bible Online

4 Kralip 20 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 20

¹Dre dolé dyvesá zanasvalyja o Jezekíia ke meribén; i javdiá ke jov Isajo, Amososkiro čhavó, proróko, i phendiá léske: “Adiáke rakiréla Raj Devél: ‘Priphen so te kerés tyré kheresa, pal-dová so merésa tu, i na vysastjosa.’”

²I otrisija Jezekíia péskire mósa ke vánta (sciana), i mangdiápe Ráske-Devléske, rakirí:

³“O, Rajo Dévla! Priripir, so me psirdjom angíl muj Tyró čačunés i čačunesa ke Tu ilésa, i kerdjom lačhés dre jakhá Tyré.” I zarondia Jezekíia zoralés.

⁴Isajo iščo (inké) na vygijá foróstyr, syr sys ke jov Ráskire-Devléskiro lav:

⁵“Risjov i phen Jezekijaske, xuláske Miré manušengireske: Adiáke rakiréla Raj Devél, Devél Davidóskiro, tyré dadéskiro: ‘Me šundjom tyró mangipén, dykhcjom tyré jasva. Ĥáda, Me vysastiakirava tut; pe tríto dyvés tu džása dro Ráskire-Devléskiro Kher.

⁶I dočhuvava Me ke tyré dyvesá dešupandž berš, i vastéstyr Asirijákire-kraliskirestyr Me zrakháva tut i davá fóro, i zrakháva davá fóro vaš Péske i vaš Davidóske, Miré pisharíske.’”

⁷I phendiá Isajo: “Len pučko inžyro.” I lyné, i pričhude ke čyl'čáko (naryvo); i jov vysastija.

⁸I phendiá Jezekíia Isajoske: “Saví isyn ĥiertýk (znamiénijo), so Raj Devél vysastiakirela man, i so me džáva pe tríto dyvés dro Ráskire-Devléskiro Kher.”

⁹I phendiá Isajo: “Ĥáda, túke isyn ĥiertýk Rástyr-Devléstyr, so rikiréla Raj Devél lav, savó Jov phendiá: “Angíl ci te prodžal zerjáke (tieniake) pe deš ĥierunia (stupien'ki); ci te risjol pe deš ĥierunia.”

¹⁰I phendiá Jezekíia: “Lokhes tieniake (zerjake) te džal angíl (te kharelpe) pe deš ĥierunia; nad, mek te risjol zer (tien') pale pe deš ĥierunia.”

¹¹I khardiá zoralés Isajo proróko ke Raj Devél, i riskirdiá zer (tien') pale pe deš ĥierunia (stupien'ki), kaj joj zmekelaspe pir stylba (liesvica) Ahazoskiri, pe deš ĥierunia (stupien'ki).

¹²Dre dolé dyviesa bičhadiá Bierodaho Baladano, čhavó Baladanoskiro, Vavilonóskiro králi, lylá i počastunko Jezekijaske; pal-dová so jov šundiá, so Jezekíia sys nasvaló.

¹³Jezekíia, vyšundia manušén, savé sys bičhadé ke jov, sykadiá lénge piraliá péskire, rup i suvnakái, i aromatytka smóly, i dróga masti, i saró arsienalo (mardiarnia) dro péskiro kher i saró, so isys dre tyknorja i piraliá léskire; na jaciápe nijékh priedmieto (čysa), savó te na sykavél by lénge Jezekíia dro péskiro kher i dro saró péskiro xulaiben.

¹⁴I javdiá Isajo proróko ke králi Jezekíia, i phendiá léske: “So rakirdé adalé manušá, i katýr jone javné ke tu?” I phendiá Jezekíia: “Duratune phuvjátyr jone javné, Vavilonóstyr.”

¹⁵I phendiá Isajo: “So jone dykhné dre tyró kher?” I phendiá Jezekíia: “Saró, so isyn dre kher miro, jone dykhné; na jaciápe ni jekh priedmieto, savó me te na sykavav by lénge dre tyknorja miré.”

¹⁶I phendiá Isajo Jezekijaske: “Vyšún Ráskire-Devléskiro lav:

¹⁷‘Ĥáda, javéna dyvesá, i lynó javéla saró, so isyn dro kher tyró, i so skedyné tyré dadá ke davá dyvés, dro Vavilóno; ničý na jačélape”, — rakiréla Raj Devél.

¹⁸“Čhavéndyr tyrendyr, savé javéna tútyr, savé tútyr bijandjona, léna, i javéna jone jévnuhi dre Vavilonóskire-kralískiri fielatin/kolov (dvorco).”

¹⁹I phendiá Jezekíia Isajoske: “Lačhó isyn lav Ráskire-Devléskiro, savó tu phendián.” I rakirdiá duredýr: “Mek te javél ramánjo (miro) i lačhipén dre miré dyvesá!”

²⁰Javír lav pal Jezekijaste i pal saré murškané réndy léskire, i pal dová, so jov kerdiá venderi (prudo) i panitko prolydžiiben i prolydžija paní dro fóro, isyn začhindló dre beršýtka arhívy pal Judejákire kral'jénde.

²¹I pasijá viéčnes Jezekíia péskire dadénca, i jaciá kraliska Manásija, léskiro čhavó, pe štéto léskiro.