Read Biblija - Pe Baltitko Romani čib (Romanes) 2019 Baltic Romani Bible 4 Kralip 21 Bible Online

4 Kralip 21 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 21

¹Dešudúj berš sys Manasijaske, kiéli jov jaciá kralísa, i pandždešá berš sys jov kralísa dro Jerusalimo; lav léskire-dákiro sys Xiefcyba.

²I kerdiá jov fuipén dre jakhá Ráskire-Devléskire, keri pir primiéro (sykaibén) magiripén syr javír manušýtka nácyi, savén protradyja Raj Devél Izrailjoskire čhavéngire móstyr.

³I nevés kerdiá vučipená, savé rosphagirdiá sarésa léskiro dad o Jezekíia, i čhudiá altári Vaaloske, i kerdiá dembitko vešoro, syr kerdiá Ahávo, Izrailjoskiro králi; i mangdiápe péskire bolybnytkone xaladybnaske, i dynarindiá léske.

⁴I kerdiá altári dre Ráskire-Devléskiro Kher, pal savó phendiá Raj Devél: “Dro Jerusalimo čhuváva Me Miro lav.”

⁵I kerdiá jov altári saré bolybnytkone xaladybnaske pe duj gredy (dvory) Ráskire-Devléskire Khereskire.

⁶I lydžijá péskires čhavés pirdál jag, i drabakirdia, i čovahaniakirdia, i zalydžyja manušén, savé vykharena mulen i čovahanen pir primiéty (špery); but kerdiá fuipén jov dre jakhá Ráskire-Devléskire, sob (kaj) te xoliakirel Les.

⁷I čhudiá vyčhindlo muj Astartakiro, savó kerdiá jov dro kher, pal savó rakirdiá Raj Devél Davidóske i Solomonóske, léskire čhavéske: “Dro davá Kher i dro Jerusalimo, savó Me vykedyjom saré Izrailjoskire rodendyr, Me dáva lav Miro pe viéko.

⁸I Me na dává butýr, sob (kaj) te vydžál ĥerój manušeskiri Izrail'tianinoskiro phuvjátyr, saví Me dyjom léngire dadénge, kóli jekh jone javéna te pričhuvén zor te kerén dre jekh godý sarésa dolesa, so Me phendjom lénge, i saré Zakonosa, savó priphendiá lénge Miro pishári Mójza.

⁹Ne jone na kandyné; i zatyrdyja len Manásija ke dová, so jone kerdé fujedýr dolé manušytkoné nacyiéndyr, savén vymardia Raj Devél Izrailjoskire čhavéndyr.

¹⁰I rakirdiá Raj Devél pirdál Peskirende dynar'jénde, prorokénde, i phendiá:

¹¹“Pal-dová, so kerdiá Manásija, Judejákiro králi, dasavé magiripena, fujedýr saréstyr doléstyr, so kerdé Amoriéi, savé sys angledýr léstyr, i lydžijá Judas dro grého péskire idolenca,

¹²paldavá, — adiáke rakiréla Raj Devél, Devél Izrailjoskiro, — ĥáda, Me janáva dasaví xolý pe Jerusalimo i pe Judaste, pal savéste, kon šunéla, kudunjola (zazvininela) dre duj kaná odoléste.

¹³I protyrdava Me pe Jerusalimo šelo te mierinen Samarijatyr i otvieso Ahavoskire kheréstyr, i vykhosava Jerusalimo adiáke, syr vykhosena tahtái, — vykhosena i piririskirena les.

¹⁴I Me otriskirava jačaibén (ostatko) Miré mištypnaskire mieratyr, i Me otdáva len dre léngire vergéngire (vrogengire) vastá, i jone javéna te otkeden saró léndyr saré léngire vérgi.”

¹⁵Paldavá, so jone kerdé fuipén dre jakhá Miré, i xoliakirde Man dolé dyveséstyr, syr vyginé léngire dadá Jegiptóstyr, i ke davá dyvés.”

¹⁶Iščo pročhudia Manásija drieván but rat bibangipnaskire manušéngiro adiáke, so pherdiakirdiá lénca Jerusalimo jagoróstyr ke jagóro, butýr péskire grehostyr, so jov zalydžijá Judas dro grého — te kerél fuipén dre jakhá Ráskire-Devléskire.

¹⁷Javír lav pal Manasijaste i pal saró, so jov kerdiá, i pal léskire gréhi, dro so jov kerdiá grého, isyn začhindló dre beršýtka arhívy pal Judejákire kral'jénde.

¹⁸I pasijá viéčnes Manásija péskire dadénca, i garadó sys dre únta (sado) pašýl kher léskiro, dre únta Uzaskiri. I jaciá kralísa Amono, léskiro čhavó, pe štéto léskiro.

¹⁹Biš te duj berš sys Amonoske, kiéli jov jaciá kralísa, i duj berš jov sys kralísa dro Jerusalimo; lav léskire dákiro sys Miešulliemief, Xarucoskiri čhaj, Jatbatyr.

²⁰I kerdiá jov nalačhés (fuipén) dre jakhá Ráskire-Devléskire adiáke, syr kerdiá o Manásija, léskiro dad.

²¹I psirdiá dolé-pac' dromésa, savésa psirdiá léskiro dad, i dynarindiá idolénge, savénge dynarindiá léskiro dad, i mangdiápe lénge.

²²I jačkirdiá jov Ras-Devlés, péskire dadengíre Devlés, na psirdiá Ráskire-Devléskire dromésa.

²³I sčhude zrakiribén Amonoskire dynárja proti léste, i zamardé kralís dro léskiro kher.

²⁴Ne manušá dolé-phuvjákire pirimarde sarén manušén, savé sys dre zrakiribén proti kralíste Amonoste; i manušá dolé-phuvjákire čhudé kralísa Iosijas, léskire čhavés, pe štéto léskiro.

²⁵Javír lav pal Amonoste, so jov kerdiá, isyn začhindló dre beršýtka arhívy pal Judejakire kral'jénde.

²⁶I garadé les dre léskiri koplíca, dre Uzaskiri únta (sado). I jaciá kralísa Iosija, léskiro čhavó, pe štéto léskiro.