Read Biblija - Pe Baltitko Romani čib (Romanes) 2019 Baltic Romani Bible 4 Kralip 23 Bible Online

4 Kralip 23 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 23

¹I bičhadiá králi, i skedyné ke jov sarén Judejakiren i Jerusalimóskire phurydyren.

²I gijá králi dro Ráskire-Devléskiro Kher, i saré Judejákire manušá i saré manušá Jerusalimóskire lésa, i rašaja, i proróki, i saré manušá, tyknestyr ke baró, i gindia dro šunybén (dyja upre) saré Zavietoskire lylvarjakire lavá, saví lathija (lastia) dro Ráskire-Devléskiro Kher.

³Paló (poslie) dová králi terdijá pe vučó štéto pašýl stýlbo (čebotar') i kerdiá angíl Ráskire-Devléskiro muj zaviéto — te džas pal Raste-Devléste i te rakhén priphenybená Léskire, i sykadyiben otčhakiriben Léskiro i uphenybená Léskire saré iléstyr i saré diéstyr, sob (kaj) te spolninen dalé Zavietoskire lavá, savé isyn čhindlé dre daja lylvarí. I saré manušá zaginé dro Zaviéto.

⁴I priphendiá králi Xielkijaske anglatuné rašáske, i javire rašange, i manušénge, savé sys terdé pe rakhiben pašýl progo te vylydžan Ráskire-Devléskire Khangirjátyr saré khoré (sasúdy), savé kerdé vaš Vaalo, i vaš Astarta, i vaš saró xaladybén bolybnytko, i te xačkirén len pal Jerusalimo, pe dólo Kiedrono, i priphendiá léngiro práho te otlydžan dro Viefíljo.

⁵I otčhudia dre rig jov rašán-žriecen, savén čhudé Judejákire králja, sob (kaj) te thuvliakiren pe vučipená dre Judejákire fórja i pašýl Jerusalimo, — i savé thuvliakirde Vaaloske, khameske, i čhoneske, i čergeniénge, i saré xaladybnaske pe bolybén.

⁶I vylydžijá Astarta (svénto drévo) Ráskire-Devléskire Khereskir pal Jerusalimo, ke Kiedronoskiri sýgno rékica (lenorí), i shačkirdiá la pašýl Kiedronoskiri sýgno rékica (lenorí), i streindia la dre práho, i čhurdyjá la pe mulýtka (múrsy), kaj garadé saré manušá.

⁷I rosphagirdiá jov kherá biladžakuné-džuvliéngire, savé sys pašýl Ráskire-Devléskiri Khangirí, kaj džuvliá khudé ídi vaš Astarta.

⁸I vylydžijá sarén rašán-žriecen Judejákire for'jéndyr, i magirdia vučipená, pe savé kerdé xačkiribén, Gievatyr ke Virsávija, i rosphagdia vučipená angíl pórta, — doiá, saví pašýl zagiibén dre pórta Isusoskiri, kon sys foróskiro barydyr, i doiá, saví sys pe zérvo (liévo) rig pašýl foróskiri pórta.

⁹Ke saró rašaja pe vučipená na jandlé svénta dyibená Ráske-Devléske pe altárjo Ráskire-Devléskiro dro Jerusalimo, priesna mariklia xané khetané péskire pšalénca.

¹⁰I magirdia jov Tofieto, so isyn pe Jenomoskire-čhavéngiro dólo, sob (kaj) nikón te na prolydžal čhavés péskires i čha peskirjá pirdál jag Molohoske.

¹¹I otparudia gren, savén čhudé Judejákire králja khameske angíl zagiibén dro Ráskire-Devléskiro Kher pašýl štúby Niefane-Mieliehoskire, kon sys skopco (jévnuho), so sys dre Faruima, maribnýtka vurdyná khameske shačkirdiá jagása.

¹²I altári pe štubakiri stréha (čhakín) Ahazovoskiri, savé kerdé Judejákire králja, i altári, savé kerdiá Manásija pe duj gredy (dvory) Ráskire-Devléskire Khereskire, rosphagirdiá králi Iosija, i mekciá telé odothýr, i čhurdyjá práho léngiro dre Kiedronoskiri sýgno rékica (lenorí).

¹³I vučipená, savé sys angíl Jerusalimo, pe čačí rig Olivitkone bergátyr, savé kerdiá Solomóno, Izrailjoskiro králi Astartake, džungalypén Sidonoskiro, i Xamososke, džungalypén Moavitoskiro, i Milhomoske, džungalypén Amonitoskiro, magirdia králi.

¹⁴I phagirdiá jekh pal jekh statuly, i vyčingirdia demby vyčhinybnasa, i pherdiakirdiá léngiro štéto manušéngire kokalenca.

¹⁵Adiáke-pac' i altárjo, savó sys dro Viefíljo, i vučipén, savó kerdiá Jerovoámo, Navatoskiro čhavó, savó zalydžijá Izrailjo dro grého, — adiáke-pac' i altárjo dová i vučipén jov rosphagirdiá, i xačkirdiá davá vučipén, streindia dro práho, i shačkirdiá demby vyčhinybnasa.

¹⁶I podykhciá Iosija, i dykhciá mulytka (mursy), savé sys odój pe bérga, i bičhadiá, i lyjá kokalý móĥilkendyr, i xačkirdiá pe altárjo, i magirdia les pir Ráskire-Devléskiro lav, savó rakirdiá angíl sarénde Ráskire-Devléskiro manúš, savó angilphendia (proročyndia) dalé dyvesá.

¹⁷I phendiá Iosija: “So davá za pomniko (obielisko), savó me dykháva?” I phendlé léske foróskire manušá: “Davá isyn Devléskire-manušeskiri koplíca, savó javélas Judejátyr, i savó dyjá te džinél pal dová, so tu kerésa pe altárjo Viefiljoskiro.

¹⁸I phendiá jov: “Jačkiren les dro ramánjo (miro); nikón te na čilavel léskire kokalý?” I zrakhné kokalý léskire i prorokoskire kokalý, savó sys Samarijatyr.

¹⁹Adiáke-pac' i saré mangipnytka štéty vučipnaskire dre Samarijakire fórja, savé kerdé Izrailjoskire králja, xoliakiri Ras-Devlés, rosphagirdiá Iosija, i kerdiá lénca dová-pac', so kerdiá jov dro Viefíljo.

²⁰I zaphusadia jov sarén rašán-žriecen vučipnaskiren, savé odój sys, pe altári, i xačkirdiá manušéngire kokalý pe lénde, — i risijá dro Jerusalimo.

²¹I priphendiá králi saré manušénge, pheni/y: “Kerén Patradí Ráske-Devléske tumareske, syr isyn čhindló dre daja zavietoskiri lylvarí.”

²²Pal-dová so na sys kerdy dasaví Patradí sendar'jéngire dyveséndyr, savé sendiakirde Izrailjo, i dre saré dyvesá Izrailjoskire kral'jéngire i Judejákire-kral'jéngire.

²³A pe dešuohtoto berš kralískire Iosijaskire sys kerdy doiá Patradí Ráske-Devléske dro Jerusalimo.

²⁴I manušén, savé vykharena mulen, i čovahanen pir primiéty, i kherítka ídoly, i ídoly, i saré brytkimy, savé javné pe Judejakiri phuv i dro Jerusalimo, vytradyjá i rozmardiá Iosija, sob (kaj) te kerél saró pir lavá Zakonóskire, savé isyn začhindlé dre lylvarí, saví lathja (lastia) Xielkija, rašái, dro Ráskire-Devléskiro Kher.

²⁵Adasaves, syr jov, na sys kralís angledýr léstyr, savó te risjolas ke Raj Devél saré péskire ilésa, i saré diésa peskiresa, i saré péskire zor'jénca, pir saró Mojzáskiro Zakóno; i paló (poslie) léste na terdijá adasavó syr jov.

²⁶Usajékh Raj Devél na otčhudia Péskiri bari xolý, savjása zahačíia xolý Léskiri na Judaste pal saré teliakiribena, savénca xoliakirdia Les Manásija.

²⁷I phendiá Raj Devél: “Judas otčhurdava Me Miré móstyr, syr otčhurdyjom Me Izrailjo, i otriskirava davá fóro Jerusalimo, savó Me vykedyjom, i Kher, pal savó Me phendjom: ‘Javéla lav Miro odój.’”

²⁸Javír lav pal Iosijaste i pal saró, so jov kerdiá, isyn začhindló dre beršýtka arhívy pal kral'jénde Judejátyr.

²⁹Dre saré léskire dyvesá gijá faraóno Niehao, o Jegiptóskiro králi, proti Asirijákire kralíste, pe reka (len') Jevfrato. I vygijá králi Iosija proti léske, i odová zamardiá les dro Miegidono, kiéli dykhciá les.

³⁰I léskire pishárja lydžiné les mules Miegidonostyr, i jandlé les dro Jerusalimo, i garadé les dre léskiri koplíca. I lyné manušá dolé phuvjátyr Ioahazos, Iosijaskire čhaveskiri, i pomakhne les i čhudé les kralísa zamiést léskire-dadéste.

³¹Biš te trin berš sys Ioahazoske, kiéli jov jaciá kralísa, i trin čhoná jov sys kralísa dro Jerusalimo; lav léskire-dákiro sys Xamutal', Jeriemiejoskiri čhaj, Livnatyr.

³²I kerdiá jov fuipén dre Ráskire-Devléskire jakhá dro saró adiáke, syr kerdé léskire dadá.

³³I zarikirdia les faraóno Niehao dre Rivla, pe Jemafoskiri phuv, sob (kaj) jov te na kralinél dro Jerusalimo, — i čhudiá štrafo pe phuv šel talánty rup i talanto suvnakái.

³⁴I čhudiá kralísa faraóno Niehao Jeliakimos, Iosijáskiro čhavés, pe štéto zamiést Iosijáskiro, léskire-dadéste, i parudia léskiro lav pe Ioakimoste; Ioahazos lyjá i otlydžija les dro Jegípto, kaj jov i myjá.

³⁵Jov lelas i rup i suvnakáj i délas Ioakimo faraonóske: jov kerdiá timín phuvjake kažnoné manušéstyr phuvjátyr pir péskiri timín vaš dová, sob (kaj) te otdél faraonóske Niehaoske.

³⁶Biš te pandž berš sys Ioakimoske, kiéli jov jaciá kralísa, i dešujekh berš sys jov kralísa dro Jerusalimo; lav léskire-dákiro sys Ziebuda, Fiedaijaskiri čhaj, Rumatyr.

³⁷I kerdiá jov nalačhés dre Ráskire-Devléskire jakhá dro saró adiáke, syr kerdé léskire dadá.