Read Biblija - Pe Baltitko Romani čib (Romanes) 2019 Baltic Romani Bible 4 Kralip 24 Bible Online

4 Kralip 24 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 24

¹Dre léskire dyvesá gijá pe léste Navuhodonosóro, Vavilonóskiro králi, i kerdiápe Ioakimo vužlo léske pe trin berš, ne paló dová (poslie) otgijá léstyr.

²I bičhadiá pe léste Raj Devél baró ke dar xaladybén Xaldiejéngiro, i xaladybén Sirijanengiro, i xaladybén Moavitianengiro, i xaladybén Amonitianengiro, — bičhadiá len pe Judaste, sob (kaj) te xasiakirél les pir Ráskire-Devléskiro lav, savó Jov phendiá pirdál Péskire pishar'jénde, prorokénde.

³Pir uphenybén Ráskiro-Devléskiro sys Judasa dová, sob (kaj) te otriskirel les Léskire móstyr pal gréhi Manasijáskire, pal saró, so jov kerdiá.

⁴I pal rat, savó sys bibangipnaskiro, savó jov pročhudia, pherdiakirdiá Jerusalimo bibangipnaskire ratésa, Raj Devél na zakamdiá léske te otmekél.

⁵Javír lav pal Ioakimoste i pal saró, so jov kerdiá isyn začhindló dre beršýtka arhívy pal kral'jénde Judejátyr.

⁶I pasijá viéčnes Ioakimo péskire dadénca, i jaciá kralísa Iiehonija (Jehonija), léskiro čhavó, pe štéto léskiro.

⁷Králi Jegiptóskiro na vygijá maribnása butýr péskire phuvjátyr, pal-dová so lyjá králi Vavilonóskiro saró, Jegiptóskire sygnone rekicatyr (lenorjatyr) ke reka (len') Jevfrato, so sys Jegiptóskire-kralískiri.

⁸Dešuohto berš sys Jehonijaske, kiéli jov jaciá kralísa, i trin čhoná sys kralísa dro Jerusalimo; lav léskire dákiro sys Niehušta, Jelnafanoskiri čhaj, Jerusalimóstyr.

⁹I kerdiá jov fuipén dre Ráskire-Devléskire jakhá dro saró adiáke, syr kerdiá léskiro dad.

¹⁰Dre dolé dyvesá podginé pishárja Navuhodonosoroskire, Vavilonóskire-kralískire, ke Jerusalimo, i oblyne (občhude) trusciál (krugom) xaladybnasa fóro.

¹¹I javdiá Navuhodonosóro, Vavilonóskiro králi, ke fóro, kiéli léskire pishárja občhuvenas les trusciál (krugom).

¹²I vygijá Jehonija, Judejákiro králi, ke Vavilonóskiro králi, jov i daj léskiri, i dynárja léskire, i thagárja léskire, i jevnuhi (skopcy) léskire, i lyjá len Vavilonóskire králi dro pliéno pe ohtóto (bidujéngiro déšto) berš péskire kralipnaskiro.

¹³I vylydžijá jov odothýr saré kučipena Ráskire-Devléskire Khereskir i barvalypén kralískire kheréskiro; i phagirdiá, syr vyphendia Raj Devél, saré suvnakuné khoré (sasúdy), savé o Solomóno, Izrailjoskiro králi, kerdiá dre Khangirí Ráskire-Devléskiri.

¹⁴I vybičhadia saró Jerusalimo, i sarén thagar'jén, i sarén murškanen xaladén, — deš tysjoncy sys vybičhade, — i sarén kherá-keribnaskiren (plotniken) i faurnar'jen (petalengiren, kuzniecen); nikonés na jaciápe, apríč čororé manušénde pe doiá phuv.

¹⁵I piričhudia jov te dživél Jehonijas dro Vavilóno; i kraliskirja da, i kralískire džuvlién (romnien), i léskire skopcen, i jov zoralen otlydžija jov, syr pliennonen Jerusalimóstyr dro Vavilóno.

¹⁶I saré xaladén ginybnasa eftá tysjoncy manušén, i grafar'jen (spiecen te risynen) i spiecen te ĥazdén kherá tysjonco, sarén murškanen, savé psirdé pe maribén, zalydžijá Vavilonóskiro králi dro pliéno te dživén ke Vavilóno.

¹⁷I čhudiá Vavilonóskiro králi Matfanijas kralísa, kakes Jehoniijaskires, pe štéto léskiro, i parudia léskiro lav pe Sedekíia.

¹⁸Biš te jekh berš sys Sedekijaske, kiéli jov jaciá kralísa, i dešujekh berš jov sys kralísa dro Jerusalimo; lav léskire dákiro sys Xamutal', Jeriemiejoskiri čhaj, Livnatyr.

¹⁹I kerdiá jov nalačhés dro Ráskire-Devléskire jakhá dre saró adiáke, syr kerdiá Ioakimo.

²⁰Bari xolý Ráskire-Devléskiri sys pe Jerusalimo i pe Judaste ke dová, so Jov otriskirdia len Péstyr. I otčhudia pes Sedekíia Vavilonóskire kralístyr.