Read Biblija - Pe Baltitko Romani čib (Romanes) 2019 Baltic Romani Bible 4 Kralip 3 Bible Online

4 Kralip 3 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 3

¹Iorámo, Ahavoskiro čhavó, jaciá kralísa pe Izrailjo dre Samárija pe dešuohtoto berš Iosafatóskiro, jov jaciá kralísa Judejakiresa, i sys jov králi dešudúj berš.

²I kerdiá jov nalačhés dre jakhá Ráskire-Devléskire, mek na adiáke, syr léskiro dad i léskiri daj: jov zlyjá statula Vaaloskiri, saví kerdiá léskiro dad;

³Usajékh ke gréhi Jerovoamoskire, čhavéskire Navatoskire, savó zalydžijá dre grého Izrailjo, jov rikirdiape, na otgijá léndyr.

⁴O Miesa[1], Moavitoskiro králi, sys barvaló skotosa i bičhavelas Izrailjoskire kralíske pir šel tysjoncy bakrén i pir šel tysjoncy bakrén naobčhindlen.

⁵Ne kiéli myjá Ahávo, to Moavitoskiro králi otgijá Izrailjoskire kralístyr.

⁶I vygijá králi Iorámo dre dolé dyvesá Samarijatyr, i kerdiá obdykhiben saré Izrail'tianenge;

⁷I gijá, i bičhadiá ke Iosafáto, Judejákiro králi, te phenén: “Králi Moavitoskiro otgijá mándyr, ci džása tu mánca pe maribén proti Moávo?” Jov phendiá: “Džáva; syr tu, adiáke i me, syr tyré manušá, adiáke i miré manušá, syr tyré grajo, adiáke i miré graja.”

⁸I phendiá: “Save dromésa te džas aménge?” Jov phendiá: “Čhučé phuvjákire, Edomoskire dromésa.”

⁹I gijá Izrailjoskiro králi, i Judejákiro králi, i Edomoskiro králi, i giné jone trusciál eftá dyvesá, i na sys paní vaš xaladenge i vaš kheritkone murdalénde (skoto), savó gijá pal lénde.

¹⁰I phendiá Izrailjoskiro králi: “Ah! Khardiá khetané Raj Devél trinen adalen kral'jén, sob (kaj) te otdél len dre Moavoskire vastá.”

¹¹I phendiá Iosafáto: “Ci nane adáj Ráskire-Devléskire prorokós, sob (kaj) aménge te phučaspe Rástyr-Devléstyr pirdál léste?” I otphendiá jekh dynar'jéndyr (slugéndyr) Izrailjoskire kraliskirendyr, i phendiá: “Adáj isyn Jelisiéjo, čhavó Safatoskiro, savó podelas paní pe vastá Ilijaske.”

¹²I phendiá Iosafáto: “Isyn léste lav Ráskire-Devléskiro.” I giné ke jov králi Izrailjoskiro, i Iosafáto, i králi Jedomoskiro.

¹³I phendiá Jelisiéjo Izrailjoskire kralíske: “So mánge i túke? Džá ke tyré-dadéskire proróki i ke tyré dákire proróki.” I phendiá léske králi Izrailjoskiro: “Nad, pal-dová so Raj Devél khardiá khetané adarík triné adalen kral'jén, sob (kaj) te otdél len dre Moavoskiro vast.”

¹⁴I phendiá Jelisiéjo: “Te javél džidó pe viéki Raj Devél, Devél bolybnáskire-jangoléngire, angíl Savéste me som terdó! Kóli by me te na kutiakirav Iosafatos, kralís Judejakires, tedy me na podykhava by pe túte i te na dykháv by tut.

¹⁵Akaná kharén mánge manušés, savó bašavela pe gusli.” I kiéli manúš bašadia pe gusli, tedy vast Ráskire-Devléskiro čiladiá Jelisiejos.

¹⁶I jov phendiá: “Adiáke rakiréla Raj Devél: ‘Kerén pe davá dólo (xohoi) rovy (xohoiá) pale’;

¹⁷pal-dová so adiáke rakiréla Raj Devél: “Tumé na dykhéna balvál, i tumé na dykhéna bryšýnd, a davá dólo te pherdjol paniésa, savó javéla te p'jel tumé i tyknó i baró tumaró skoto.

¹⁸Ne davá nábut (kutý) angíl Ráskire-Devléskire jakhá; Jov i Moavos otdéla dre tumaré vastá.

¹⁹I tumé domarena saré fórja zoralé tynénca, i saré, šeritka fórja i saré fedyrša vešá sčingirena, i saré panieskire ĥanyngorja zaprudinena, i saré fedyrša feldýtka štéty začhurdena barénca.

²⁰Ne zlokosa (rankosa), kiéli ĥazdéna mareskiro janybén, jekhátyr (srázu) lyjá te čhuvél paní pir drom Edomostyr, i perdija phuv paniésa.

²¹Kiéli Moavitiani šundlé, so džána králja te marénpe lénca, tedy skedyné sys saré, lyi manušéstyr, savó nosindia simiri i phuredýr, i terdiné pe kustýk (granica).

²²Pe zlóko (ránko) uštyné jone tasiárles (ránes); i, kiéli kham zaziaindia pe paní, Moavitianenge durál sykadyjá davá paní lolesa, syr rat.

²³I phendlé jone: “Davá isyn rat: mardépe králja maškír péste i domardé jekh jekhés; akaná pe doresybén, Moávo!”

²⁴I javné jone ke Izrailjoskiro stáno. I uštyné Izrail'tiáni, i lyné te marén Moavitianen, i odolé prastándyne léndyr, a jone usajékh na pirijačne te džán pe lénde i te marén Moavitianen.

²⁵I fórja rosphagirdé, i pe kažno fedyršo pe félda kotér (kusko) čhurdyné kažno pir bar i začhurdyne les; i saré panieskire thadyipena zaprudindle, i saré fedýr vešá čingirde telé, adiáke so jačnépe jekh bará dre Kir-Xariešeto. I obgine léskire xaladé praščasa, i rosphagirdé les.

²⁶I dykhciá Moavitoskiro králi, so maribén pirizorjakirela (piridolinela) les, i lyjá pésa eftašelá manušén, savé marenaspe kurtalása, sob (kaj) te prodžal ke Jedomoskiro králi; ne na mogindlé.

²⁷I lyjá jov anglatunes-péskire čhavés, savéske treindiá te javél kralísa pe štéto léskiro, i ĥazdyjá jov les vaš célo shačkiribén pe vánta. Davá kerdiá bari xolý dre Izrail'tianende, i jone otginé léstyr, i risiné pe péskiri phuv.