Read Biblija - Pe Baltitko Romani čib (Romanes) 2019 Baltic Romani Bible 4 Kralip 4 Bible Online

4 Kralip 4 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 4

¹Jekh prorokéngire-čhavengiri džuvlý roibnasa rakirdiá Jelisiejoske: “Pishári tyró, miro rom, myjá. A tu džinésa, so pishári tyró darandyja Rástyr-Devléstyr. Kakaná javdiá lovitko kofari te lel dujén miren čhavén dre pishar'jénde péske.”

²I phendiá láke Jelisejo: “So mánge te keráv túke? Phen mánge, so isyn túte dro kher?” Joj phendiá: “Nane pisharicate ničý dro kher, apríč khoró (sasudo) jeliejosa.”

³I phendiá jov: “Džá, pomang péske khoré pe rig, saré tyré susiedendyr (kotar'jendyr), khoré (sasúdy) čhučé; skéde but.”

⁴I džá, začhakir vudár pal péste i pal tyré čhavénde, i čhuv dre saré dalé khoré; otčhuv pherdé.”

⁵I gijá léstyr, i začhakirdia vudár pal péste i pal péskire čhavénde. Jone podenas láke, a joj čhuvelas.

⁶Kiéli pherdiakirde sys khoré, joj phendiá péskire čhavéske: “Pode mánge iščo (inké) khoró.” Jov phendiá láke: “Nane butýr khoré.” I pirijaciá ksil.

⁷I javdiá joi, i rosphendiá Devléskire manušéske. Jov phendiá: “Džá, bikin ksil i zapleskir tyré dlugi; so jačélape, dolesa javésa te dživés tyré čhavénca.”

⁸Dro jekh dyvés javdiá Jelisiéjo dro Sonamo. Odój jekh barvaly džuvlý mangdiá les ke pe te xal maró; i kiéli jov javélas, usady (sak) zadžalas odorík te xal maró.

⁹I phendiá joj péskire romeske: “Ĥáda, me džinóm, so Devléskiro manúš, savó prodžála kažno mólo mamúj aménde, isyn svénto.

¹⁰Kerása nabari štúba uprál pe vánta i čhuvasa léske odój čhuibén (pasindly), i skamínd, i banko (skamus), i momolýtko (svietíl'niko); i kiéli jov javéla te javél ke ame, mek te zadžál odorík.”

¹¹Dro jekh dyvés jov javdiá odorík, i zagijá dre nabari štúba, i pasijá odój.

¹²I phendiá jov Gijezijoske, péskire dynaríske: “Khar adalja Sonamitianka.” I khardiá la, i joj terdijá angíl léste.

¹³I phendiá léske: “Phen láke: ‘Ĥáda, tu adiáke duminesa ilytkes pal aménde; so te kerás by túke? Ci na trej te porakiras nábut pal túte kralísa, ci xaladéngire barydyrésa?” Joj phendiá: “Nad, maškír péskire manušénde me dživáva.”

¹⁴I phendiá jov: “So te kerés láke?” I phendiá Gijeziéjo: “Ĥáda, čhavés nane láte, a rom lákiro isyn phuró.”

¹⁵I phendiá jov: “Khar la.” Jov khardiá la, i terdijá joj dre vudará.

¹⁶I phendiá jov: “Pirdál berš, dro davá-pac' časo, tu javésa te rikires pe vastá čhavés.” I phendiá joi: “Nad, xulájo miro, Devléskiro manúš, na xohav tyrja dynarka.

¹⁷I džuvlý jaciá pharí, i bijandiá čhavés pe javír berš, dre dová-pac' časo, syr phendiá láke Jelisiéjo.

¹⁸I podbarija čhavoró, i dro jekh dyvés gijá ke péskiro dad, ke žniécy.

¹⁹I phendiá péskire dadéske: “Šeró miro! Šeró miro dukhala!” I phendiá odová péskire dynaríske: “Lýdža les ke léskiri daj.”

²⁰I lydžijá les, i jandiá les ke daj léskiri. I jov sys beštó pe čangá láte ke pašdyves, i myjá.

²¹I gijá joi, i čhudiá les pe čhuibén Devléskire manušéskiro, i začhakirdia les, i vygijá.

²²I khardiá péskire romes, i phendiá: “Bičháv mánge jekhés dynar'jéndyr (slugéndyr) i jekha oslica; me tradava ke Devléskiro manúš i risjováva.”

²³Jov phendiá: “Palsó túke te trades ke jov? Adadyvés isyn na nevočhon i na sávato.” Ne joj phendiá: “Mištó.”

²⁴I dyjá joj andré oslica, i phendiá péskire dynaríske: “Lýdža i džá; na terdjov, paka me phenáva túke.”

²⁵I gijá, i javdiá ke Devléskiro manúš, ke bérga Karmilo. I kiéli dykhciá Devléskiro manúš la durál, to tedy phendiá péskire dynaríske Gijezijoske: “Davá isyn odoia Sonamitianka.

²⁶Prasta gil láke i phen láke: ‘Ci sasty tu san? Ci sastó tyró rom isyn? Ci sastó čhavoró isyn?’” — Joj phendiá: “Saste.”

²⁷Kiéli joj iavdiá ke Devléskiro manúš pe bérga, to uhtyldia les pal ĥerá. I podgíia Gijeziejo, sob (kaj) te otlydžal la; ne Devléskiro manúš phendiá: “Jačkir la; di láte dukhala, a Devél garadia davá mándyr i na dyjá zan (zvies') mánge.”

²⁸I phendiá joi: “Ci mangdjom me čhavés miré xulastyr? Ci na rakirdjom me: ‘Na xohav man?’”

²⁹I phendiá jov Gijeziejoske: “Obphande tyré trušula, i le destó miro dre tyró vast, i džá. Kóli streninesa vari-konés-to, na de “dobridim” léske, i kóli kon javéla te del “dobridim” túke, na otphen léske. I čhuv mirí khija pe muj čhavoreske.”

³⁰I phendiá čhavoreskiri daj: “Te javél pe viéki džidó Raj Devél i džidó di tyró! Na otiačava tútyr.” I jov uštyjá, i gijá pal láte.

³¹Gijeziéjo gijá angíl lénde i čhudiá destó pe čhavoreskiro muj. Ne na sys ni zan, ni otphenybén. I vygijá pe strieč léske, i rosphendiá léske, i phendiá: “Na prosovelape čhavoró.”

³²I zagijá Jelisiéjo dro kher, i ĥáda, muló čhavoró isyn paštó pe léskiro čhuibén.

³³I zagijá, i začhakirdia vudár pal péste, i mangdiápe Ráske-Devléske.

³⁴I ĥazdyjápe i pasijá pe čhavoreste i čhudiá péskire uštá ke léskire uštá, i péskire jakhá ke léskire jakhá, i péskire vastá ke léskire vastá, i vydind'kirdia masá péskire pe léste, i statija čhavoreskiro trúpo.

³⁵I uštyjá, i progijá pir štúba pale i angle; tén'či (potom) nevéstyr ĥazdyjápe i vydind'kirdia masá péskire pe léste. I čihnindia čhavoró eftá móly, i otčhakirdiá čhavoró péskire jakhá.

³⁶I khardiá jov Gijezijos, i phendiá: “Khar adalja Sonamitianka.” I odová khardiá la. Joj iavdiá ke jov, i jov phendiá: “Le tyré čhavés.”

³⁷I podgíia, i pyjá léske dre ĥerá, i poklonindiape ke phuv. I lyjá péskire čhavés, i gijá.

³⁸Jelisiéjo risijá dro Galgálo. I sys bokh pe doiá phuv; i prorokéngire čhavé sys bešté angíl léste. I phendiá jov péskire dynaríske: “Čhuv baró kotlo (kakávi) i keráv pahljobka vaš prorokéngire čhavénge.”

³⁹I vygijá jekh léndyr pe félda te skedel šaha, i lathiá buso (diko) xrústo, savó krencynelape, i skedyjá léstyr busa bobirki (ĥurki) pherdý péskiri ídia. I javdiá i čhindiá len pe koterá dre kakávi (kotlo), adiáke, syr jone na džindlé len.

⁴⁰I čhudé lénge te xan. Ne syr syg jone lyné te xan ĥensto zumi, tedy ĥazdyné gódla i rakirdé: “Meribén dre kakávi, Devléskiro manúš!” I na mogindlé te xan.

⁴¹I phendiá jov: “Den jaržó.” I čhudiá les dre kakávi, i phendiá Gijezijoske: “Čhuv manušénge, mek te xan.” I na jaciá ničý fuipén dre kakávi.

⁴²Javdiá vari-kon Vaalšališatyr i jandiá Ráskire-Devléskire manušéske pérvo marunó barjakirdó (plódo): biš ĥerstytka (jačmienytka) laby maró i syrova ziarny dre šyluha (lupiny). I phendiá Jelisiéjo: “Otdé manušénge, mek te xan.”

⁴³I phendiá léskiro dynári: “So date me te dav šele manušénge?” I phendiá jov: “Otdé manušénge, mek te xan; pal-dová so adiáke rakiréla Raj Devél: “Čaljona i jačélape.’”

⁴⁴Jov podyja lénge, i jone čalyne, i iščo (inké) jaciápe, pir Ráskiro-Devléskiro lav.