Read Biblija - Pe Baltitko Romani čib (Romanes) 2019 Baltic Romani Bible 4 Kralip 6 Bible Online

4 Kralip 6 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 6

¹I phendlé čhavé prorokéngire Jelisiejoske: “Ĥáda, štéto, kaj ame dživasa pašýl túte, tiasno (tango) isyn vaš aménge.

²Džása ke Iordáno, i lása odothýr kažno (sváko) pir jekh berno, i kerása péske odój štéto vaš džiibén.” Jov phendiá: “Džán.”

³I phendiá jekh: “Ker lačhipén, džá i tu dynar'jénca tyrenca.” I phendiá jov: “Džáva.”

⁴I javdiá lénca, i javné ke Iordáno, i lyné te čingiren veš.

⁵I kiéli jekh léndyr radia veš, to léskiro tover pyjá dre paní. I zadyja gódla jov, i phendiá: “Ai, miro xulájo! Tover lynó sys pe podrikiribén!”

⁶I phendiá Devléskiro manúš: “Kaj jov pyjá?” Jov sykadiá léske štéto. I otčhingirdia jov kotér (kusko) vešéstyr, i čhurdyjá odorík, i vyplyvindia (dyja plíma upre) tover.

⁷I phendiá jov: “Le péske.” Jov protyrdyjá péskiro vast i lyjá les.

⁸Králi Sirijákiro gijá maribnása pe Izrail'tianende i radindiape péskire dynar'jénca, rakirí: “Dro dasavó i dro dasavo štéto me terdiakirava péskiro xaladybén.”

⁹I bičhadiá Devléskiro manúš ke králi Izrailjoskiro te phenén: “Rakhpe te džas dalé štetosa, pal-dová so odój Sirijani zapasine.”

¹⁰I bičhadiá Izrailjoskiro králi pe dová štéto, pal savó rakirdiá léske Devléskiro manúš i prirakhcia les; i zrakhciá pes odój na jékhvar i na duj móly.

¹¹I lyjá te pharjol Sirijakire-kralískiro iló pir daja vakancyja (davá slučajo), i khardiá jov peskiren dynar'jén, i phendiá lénge: “Phenén mánge, kon amarendyr isyn paló jekh Izrailjoskire kralísa?”

¹²I phendiá jekh léskire dynar'jéndyr (slugéndyr): “Nikón, miro xulájo, králi; a Jelisiéjo proróko, savó isyn ke Izrailjo, jov piriphenela Izrailjoskire kralíske i dolé lavá, savé tu rakirésa dre soibnytko tyrí štúba.”

¹³I phendiá jov: “Džán, dodžinenpe, kaj jov isyn; me bičhaváva i lavá les.” I rosphendlé léske, i phendlé: “Ĥáda, jov isyn dre Dofaima.”

¹⁴I bičhadiá odorík gren, i maribnýtka vurdená, i but xaladén. I javné ratý, i oblyne trusciál fóro.

¹⁵Pe zlóko (ránko) Devléskire-manušéskiro butiarno uštyjá i vygijá; i ĥáda, xaladé sys trusciál fóro, i grajo, i maribnýtka vurdyná. I phendiá léske dynári léskiro: “Saró, miro xulájo, so aménge te kerás?”

¹⁶I phendiá jov: “Na dar, pal-dová so odolén, savé isyn aménca, butýr syr odolén, savé isyn lénca.”

¹⁷I mangdiápe Jelisiéjo, i rakirdiá: “Rajo Dévla! Otčhakir léske jakhá, sob (kaj) jov te dykhél.” I otčhakirdiá Raj Devél jakhá dynaríske, i jov dykhciá, i ĥáda, sarí bérga isyn pherdý grenca i maribnytkoné vurdynenca dre jag trusciál Jelisiejoste.

¹⁸Kiéli giné ke jov Sirijani, Jelisiéjo mangdiápe Ráske-Devléske i phendiá: “Korjakir len.” I Jov korjakirdia len, pir Jelisiejoskiro lav.

¹⁹I phendiá lénge Jelisiéjo: “Davá isyn na dová drom i na dová fóro; džán pal mánde, me lydžáva tumen ke odová manúš, savés tumé rodéna.” I jandiá len dre Samárija.

²⁰Kiéli jone javné dre Samárija, Jelisiéjo phendiá: “Rajo Dévla! Otčhakir jakhá lénge, sob (kaj) jone te dykhén.” I otčhakirdiá Raj Devél jakhá lénge, i dykhné, so jone sys maškirál Samárija.

²¹I phendiá Izrailjoskiro králi Jelisiejoske, dykhí len: “Ci te na domares len, miro dádo?”

²²I phendiá jov: “Na domar. Naúšto tyré kurtalása i tyré lukosa tu lyjan len dro pliéno, sob (kaj) te domares len? Sykáv lénge maró i paní; mek jone te xan i te p'jen, i mek jone te džán ke péskiro khieningo.”

²³I kerdiá jov lénge baró xabén, i jone xané i piné. I otmekciá jov len, i giné jone ke péskiro khieningo. I na psirdé butýr dolé baré ke dar xaladybena Sirijakire pe Izrailjoskiri phuv.

²⁴Paló davá (poslie) skedyjá o Vienadado, Sirijákiro králi, sarén péskire xaladén, i vygijá, i občhudiá trusciál xaladybnasa Samárija.

²⁵I sys bari bokh dre Samárija, kiéli jone občhude trusciál xaladybnasa la, adiáke, so oslytko šeró bikindiape pir ohtodešá šékieli rup, i štárto paš golumboskire ĥneico — pe pandž šékieli rup.

²⁶Jekhvar Izrailjoskiro králi gijá pir vánta, i džuvlý godlása rakirdiá léske: “Pomógin, xulájo miro, králi.”

²⁷I phendiá jov: “Kóli na pomoginela túke Raj Devél, ci pomoginava me túke, ci šurnatyr, ci priesostyr?”

²⁸I phendiá králi láke: “So túke?” I phendiá joi: “Adaja džuvlý rakirdiá mánge: ‘Otdé péskires čhavés, sob (kaj) te xas les adadyvés, a mires čhavés shasa atasiá.’

²⁹I keradiam ame miré čhavés, i xajam les. I me phendjom láke pe javír dyvés: ‘Otdé tyré čhavés, i xasa les.’ Ne joj garadia péskires čhavés.”

³⁰Králi vyšundia lavá džuvliakire, roskustia péskire ídi: i gijá jov pir vánta, i manušá dykhné, so gonó praskasa (zolasa) sys pe kokoré léskire masá.

³¹I phendiá jov: “Mek dová i dová keréla mánge Devél, i iščo (inké) butýr keréla, kóli jačélape šeró Jelisiejoskiro, Safatovoskire-čhavéskiro, pe léste adadyvés.”

³²Jelisiéjo sys beštó dro péskiro kher, i godephuré sys bešté léste. I bičhadiá králi manušés péstyr. Angledýr, syr javdiá manúš, savés bičhadé ke jov, jov phendiá godé phurenge: “Ci dykhéna tumé, so adavá manúš, čhavó umaribnariskiro, bičhadiá te zlen mándyr šeró? Dykhén, kiéli javéla manúš, savés bičhadé, zakeren vudár i pritasaven les vudarenca. A ĥáda, i lopotymo léskire xuláskire ĥerengiro pal léste.”

³³Iščo jov rakirdiá lénca, i ĥáda, manúš, savó sys bičhadó, javdiá ke jov i phendiá: “Ĥáda, savó fuipén Rástyr-Devléstyr, so iščo (inké) mánge angíl te užakirav Rástyr-Devléstyr?”