Read Biblija - Pe Baltitko Romani čib (Romanes) 2019 Baltic Romani Bible 4 Kralip 7 Bible Online

4 Kralip 7 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 7

¹I otphendiá Jelisiéjo: “Šunén Ráskire-Devléskiro lav: “Adiáke rakiréla Raj Devél: atasiá dre davá časo miéra fedyršone jaržeskiri javéla pir šékieljo, i duj miery ĥersto (jačmienjo) pir šekielie, pašýl pórta Samarijakiri.”

²I otphendiá thagariskiro-manúš, pe vast saveskiro králi čhudiá kun', Devléskire manušéske, i phendiá: “Kóli by Devél i te otčhakirel fenštry pe bolybén, i tedy, ci moginéla davá te javél?” I phendiá odová: “Ĥáda, dykhésa tyré jakhénca, ne te xas davá na javésa.”

³Štar prokazytka manušá sys angíl zagiibén dre pórta i rakirdé jone jekh jekhéske: “So aménge te bešas adái, užakiri meribén?

⁴Kóli te skedespe aménge te džas dre fóro, tedy dre fóro isyn bokh, i ame odój merasa; kóli te bešas adái, tedy ame adiáke-pac' merasa. Džása fedýr dro Sirijákiro stáno (lod). Kóli jačkirena jone amen džiden, javása te dživás; a kóli muliakirena, to merasa.”

⁵I uštyné jone dro ciamlypén, syr iščo (inké) dyvesjola, sob (kaj) te džán dro Sirijákiro stáno. I javné ke Sirijakire-stanoskiro jagóro (krajo), i ĥáda, nane odój ni jekhe manušés.

⁶Raj Devél kerdiá dová, so Sirijakire stanoske pošundiape gruko maribnytkoné-vurdenengiro i grengiri grimityma, šumo buté-xaladéngiro. I phendlé jone jekh jekhéske: “Čačes, lyjá pal lové proti aménde Xietieiskone i Jegiptóskire kral'jén, sob (kaj) te džas pe aménde.”

⁷I uštyné, i prastándyne dro ciamlypén, i mekné péskire šátry, i gren peskiren, i oslen peskiren, saró stáno, syr jov sys, i prastándyne, zrakhi pes.

⁸I javné odolé (prokazytka) manušá ke stanoskiro jagóro (krajo), i zaginé dre jekh šátra, i xané i piné, i lyné odothýr rup, i suvnakái, i ídi, i giné i garadé. Giné iščo (inké) dre javír šátra, i odój lyné, i giné i garadé.

⁹I phende jekh jekhéske: “Na adiáke ame kerása. Dyvés davá — dyvés bahtalé nevipnasa. Kóli ame na sygniakirasa i javása te užakiras zlóko, to tedy peréla pe aménde bang. Džása i rosphenasa kralískire kheréske.”

¹⁰I javné, i khardé foróskire rakhibnar'jén pe pórty, i rosphendlé lénge, rakirí: “Ame psirdiam dro Sirijákiro stáno i rosphendiam lénge, i ĥáda, nane odój ni manušés, ni manušeskiri zan, a jekh grajo priphandle, i osly (miegárja) priphandle, i šátry, syr te javén lénge.

¹¹I khardé jone rakhibnar'jen i piridyne nevipen dre kokoró kralískiro kher.

¹²I uštyjá králi ratý, i phendiá péskire dynar'jénge: “Me phenáva tuménge, so keréna aménca Sirijani. Jone džinéna, so ame pirilydžasa bokh, i vyginé jone stanostyr, sob (kaj) te garadjon dre félda, duminy adiáke; kiéli jone vydžána foróstyr, ame zauhtylasa len džidenca i zadžasa dre fóro.”

¹³I otphendiá jekh manúš, savó sys dynarisa pašýl léste, i phendiá: “Mek te len pandžé gren, savé jačnépe dro fóro (saré vol'none otriadendyr Izrail'tianendyr jekh i jaciápe dre léste, — saré vol'na otriády Izrail'tianén, savé xasiné), i bičhavasa i dykhasa.

¹⁴I lyné dujén gren, dyné andré len dre maribnýtka vurdyná. I bičhadiá králi palál Sirijakire xaladénde, phení: “Džán, podykhen.”

¹⁵I tradyne pal lénde ke Iordáno, i ĥáda, saró drom sys zasčhudo idiénca i bagažosa, savé čhurdyné Sirijani, kiéli sygniakirde péskiro našyben. I risiné manušá, savé sys bičhadé, i rosphendlé kralíske.

¹⁶I vyginé manušá, i rosčorde stáno Sirijákiro, i sys miéra jaržó fedyršo pir šékieljo, i duj miery ĥersto (jačmiénjo) pir šékieljo, pir Ráskire-Devléskiro lav.

¹⁷I králi čhudiá odolés thagariskire-pomogibnaskiro (sanovnikos), pe vast saveskiro jov obrikirdiape, pašýl pórta; i rosštakurde les manušá dre pórta, i jov myjá, syr phendiá Devléskiro manúš, savó rakirdiá, kiéli jov ke králi.

¹⁸Kiéli rakirdiá Devléskiro manúš kralíske adiáke: “Duj miery ĥersto (jačmiénjo) pir šékieljo, i miéra fedýr jaržó pir šékieljo javéla atasiá dre davá časo pašýl pórta Samarijakiri”,

¹⁹Tedy i otphendiá davá thagariskiro-pomogibnaskiro (sanovniko) Devléskire manušéske i phendiá: “Kóli by Devél i otčhakirdiá fenštry pe bolybén, i tedy ci moginelas davá te javél?” A jov phendiá: “Dykhésa tyré jakhénca, ne te xas davá na javésa.”

²⁰Adiáke i kerdiápe lésa; i zatopčyndle (rosštakirde) les manušá dre pórta, i jov myjá.