Read Biblija - Pe Baltitko Romani čib (Romanes) 2019 Baltic Romani Bible 4 Kralip 9 Bible Online

4 Kralip 9 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 9

¹Proróko Jelisiéjo khardiá jekhés prorokéngire čhavéndyr i phendiá léske: “Phande truscial tyré trušula, i le davá khoró (sasudo) jeliejosa dro tyró vast, i džá dro Ramófo Galaadoskiro.

²Javi odorík, lath odój Iiujos, Iosafatoskire čhavés, Namiesijoskire čhavés, i poddža, i phen léske te vydžál péskire pšaléndyr, i zalydža les dre andratuný štúba.

³I le khoró jeliejosa, i vyčhuv pe léskiro šeró, i phen: ‘Adiáke rakiréla Raj Devél: Me pomakhava tut dre kralíste pe Izrailjo.’ Tén'ci otčhakir vudár, i prasta, i na užakir.”

⁴I gijá ternó manúš, prorokengiro čhavó, dre Ramófo Galaadoskiro.

⁵I javdiá, i ĥáda, isyn bešté xaladéngire barydyrá. I phendiá: “Mánde isyn lav ke tu, xaladéngiro barydyró.” I phendiá Iiújo: “Ke kon sarén améndyr?” I phendiá jov: “Ke tu, xaladéngiro barydyró.”

⁶I uštyjá jov, i zagijá dro kher. I ternó manúš vyčhudiá jeliéjo pe léskiro šeró, i phendiá léske: “Adiáke rakiréla Raj Devél, Devél Izrailjoskiro: ‘Akana Me makhava tut dre kralíste pe Ráskire-Devléskire manušénde, pe Izrailjo.

⁷I tu vymaresa kher Ahavoskiro, tyré-xulaskiro, sob (kaj) Mánge te othav pale (otomscinav) pal rat pishar'jéngiro, Miré prorokengiro i pal rat saré pishar'jéngiro, savé sys Ráskire-Devléskire, savé myné Jezavieliakire vastéstyr.

⁸I xasjola saró Ahavoskiro kher, i Me zamarava Ahavoste kažnoné muršés, kon kindiakirelape ke vánta, i bešybnaris i kon jaciápe dro Izrailjo.

⁹I keráva Me kher Ahavoskiro, syr kher Jerovoamoskiro, Navatoskire čhavéskiro, i syr Vaasaskiro kher, Ahiinoskire čhavéskiro.

¹⁰Jezavielia shana džukela pe Izrailjoskiri félda, i nikón na garavela la.’” I otčhakirdiá vudár, i nastiá.

¹¹I vygijá Iiújo ke léskire-xuláskire dynári, i phendlé léske: “Ci ramanjosa (mirósa)? Pal so sys javi ke tu davá bigodiakiro.” I phendiá lénge: “Tumé džinéna adales manušés i so jov rakiréla.”

¹²I phendlé: “Na čačipén, phen aménge.” I phendiá jov: “Dová i dová jov phendiá mánge, rakirí: ‘Adiáke rakiréla Raj Devél: Pomakhava tut dre kralíste pe Izrailjo.’”

¹³I sygniakirde jone, i lyné kažno (sváko) péskiri ídia, i počhude léske pe sama ĥerunia (stupien'ki), i zabašade rogosa, i phendlé: “Iiújo jaciá kralísa!”

¹⁴I gijá Iiújo, Iosafatóskiro čhavó, Namiesijevoskire-čhavéskiro, pe Ioramoste; Iorámo ž sys sarénca Izrail'tianenca dro Ramófo Galaadsko pe rakhiben proti Azailoste, Sirijakire kralíste.

¹⁵Trej te phenas, so kokoró králi Iorámo risijá, sob (kaj) te sastiakirelpe dre Izriejeljo čhinybnastyr, savó kerdé léske Sirijani (Aramiéicy), kiéli jov mardiápe Azailosa, Sirijakire kralísa. I phendiá Iujo: “Kóli tumé san dre jekh godý, tedy mek nikón te na džal peske foróstyr, sob (kaj) te džas te podes zan (zvies') dre Izriejeljo.”

¹⁶I beštia Iiújo pe greste, i tradyjá dre Izriejéljo, kaj sys paštó Iorámo, i karik Ohozija, králi pe Judéia javdiá te dykhelpe Ioramosa.

¹⁷Pe vučardý (bašnia) dro Izriejéljo sys terdó rakhibnari, i dykhciá jov baró ke dar xaladybén Iiujoskiro, kiéli jone giné, i phendiá: “Baró ke dar xaladybén dykháva me.” I phendiá Iorámo: “Le manušés, savó beštó uklisté pe greste, i bičháv gil (pe strieč) lénge, i mek te phenél ci ramanjosa (mirósa)?”

¹⁸I vytradyjá manúš uklisto pe greste gil léske, i phendiá: “Adiáke rakiréla králi: ‘Ci ramanjosa (mirósa)?” I phendiá Iiújo: “So túke ke ramánjo (miro)? Trade pal mánde.’ I rosphendiá rakhibnari, i phendiá: “Uklisto dotradyja ke jone, ne na risjola.”

¹⁹I bičhadé javirés manušés uklisté pe greste, i jov pritradyja ke jone, i phendiá: “Adiáke rakiréla králi: ‘Ci ramanjosa?’” I phendiá Iiújo: “So túke ke ramánjo? Trade pal mánde.”

²⁰I rosphendiá rakhibnari, i phendiá: “Dotradyja uklisto ke jone, i na risjola; a mina, syr jov džála, isyn sýrby Iiujoskiri, Namiesijoskire čhaveskiri, pal-dová so jov džála sýges.”

²¹I phendiá Iorámo: “De andré”: i dyné andré léskiro maribnýtko vurdén. I vygijá Iorámo, Izrailjoskiro králi, i Ohozija, králi pe Judéia, kažno (sváko) pe péskiro vurdén. I vyginé gil Iiujoske, i strenindlepe lésa pe Navufiejoskiri-Izriejel'tianinoskiri félda.

²²I kiéli dykhciá Iorámo Iiujos, tedy phendiá: “Ci ramanjosa san tu, Iiújo?” I phendiá jov: “Savó ramánjo pašýl Jezavieliakiro biladžaipén, tyré-dákiro, i pašýl but lákire čovahaniakiribena?”

²³I riskirdiá Iorámo péskire vastá, i prastándyja, i phendiá Ohozije: “Bikindle amen, Ohozijo!”

²⁴A Iiújo ottyrdyja lúko péskire vastésa i popyja Ioramoske maškír léskire psiké, i progijá maribnýtko bust pirdál léskiro iló, i pyjá jov pe péskiro maribnýtko vurdén.

²⁵I phendiá Iiújo Bidekaroske, ráske peskireske pe xaladénde: “Le, čhurde les pe Navufiejoskire-Izriejelitianinoskiro feldakiro kotér; pal-dová so priripir, syr ame túsa tradyjam dujdžiné palál Ahavoste, léskire dadéste, i syr Raj Devél phendiá pe léste dasavo angilphenybén.

²⁶Čačó, rat Navufiejoskiro i rat, léskire-čhavéngiro, dykhcjom me tasiá, rakiréla Raj Devél, i Me othava pale (otomstinava) túke pe daja félda. I adiáke le, čhurde les pe félda, pir Ráskire-Devléskiro lav.”

²⁷Ohozija, Judejákiro králi, syr dykhciá davá, to prastándyja pir drom ke kher, so sys dre únta (sado). I tradyjape pal léste Iiújo, i phendiá: “Marén les pe vurdén.” Davá sys pe vučipén Gur, so isyn pašýl Ivlieamo. I prastándyja jov dre Miegidono, i myjá odój.

²⁸I lydžiné les pishárja léskire dro Jerusalimo, i garadé les dre léskiri koplíca, léskire dadésa, dro Davidóskiro fóro.

²⁹Pe dešupervo berš Ioramóskiro, Ahavoskire-čhavéskiro, jaciá kralísa Ohozija dre Judéia.

³⁰I javdiá Iiújo dro Izriejéljo. E Jezaviél', doresciá zan, vymakcia péskiro muj, i prikedyja péskiro šeró, i dykhciá dre fenštra.

³¹Kiéli Iiújo zagijá dre pórta, to joj phendiá: “Ci isyn ramánjo Zamvrijoske, péskire khieningoskire zamaribnariske?”

³²I ĥazdyjá jov péskiro muj ke fenštra, i phendiá: “Kon isyn mánca, kon?” I vydykhne ke jov duj, trin jévnuhi.

³³I phendiá jov: “Čhurdén la javrí.” I vyčhurdyne la. I bryznindia lákiro rat pe vánta i pe grénde, i zatopčyndle (štakirde) la.

³⁴I javdiá Iiújo, i xaja, i pija, i phendiá: “Lathén adalia bibahtalia i garaven la, adiáke, syr joj isyn kralískiri čhaj.”

³⁵I giné te garaven la, i na lathné látyr ničý, apríč čeriepostyr i ĥerendyr, i anguštendyr pe vastá.

³⁶I risiné, i rosphendlé léske. I phendiá jov: “Dasavo sys Ráskire-Devléskiro lav, savó Jov phendiá pirdál Péskire pishariste, Ilijaste Fiesvitianinoste, kiéli phendiá jov pe Izrailjoskiri félda “Shana džukela Jezavieliakiro trúpo.

³⁷I javéla Jezavieliakiro trúpo pe kotér phuv Izriejeljoskiri, syr gnejo pe félda, adiáke so nikón na phenéla: ‘Davá isyn Jezaviel'.’”