Read Biblija - Pe Baltitko Romani čib (Romanes) 2019 Baltic Romani Bible 1 Paralipomienono 13 Bible Online

1 Paralipomienono 13 - Biblija - Pe Baltitko Romani čib (Romanes) 2019 Baltic Romani Bible bible

1 Paralipomienono 13

¹I radindiape Davído barydyrénca pe tysjoncy, barydyrénca pe šelá i sarénca šeralenca,

²i phendiá Davído saré Izrail'tianengire skedyibnaske: “Kóli trej tuménge, i kóli pe dová javéla vólia amaré Ráskire-Devléskiri, amaré Devléskiri, to bičhavasa pir saró svéto ke javír amaré pšála, pir sarí Izrailjoskiri phuv, i khetané lénca ke rašaja i Lievíty, dre fórja i gavá léngire, ob (kaj) jone te skedénpe ke ame;

³i janasa ke pe kovčego amaré Devléskiro, pal-dová so dre Saulóskire dyvesá ame na risjovasas ilésa ke jov.”

⁴I phendiá saró skedyibén: “Mek te javél adiáke”, pal-dová so davá réndo (diélo) sarénge manušénge zdyjape čačunó.

⁵Adiáke skedyjá Davído sarén Izrail'tianén, Šihorostyr Jegiptoskirestyr ke zagiibén dro Jemafo, sob (kaj) te janén Devléskiro kovčego o Kiríaf-Iarimostyr.

⁶I gijá Davído i saró Izrailjo dro Kiríaf-Iarimo, so isyn dre Judéia, sob (kaj) te janén odothýr kovčego Ráskire-Devléskiro, Devléskiro, savó isyn beštó pe xieruvimy, pe savó phenélape Léskiro lav.

⁷I lydžiné kovčego Devléskiro pe nevó vurdén Avinadavoskire kheréstyr; i Oza i Ahiia lydžiné vurdén.

⁸Davído i saré Izrail'tiáni bašade angíl Devléste saré zorjátyr, giliénca, pe luty i arfy, i bubny, i cymbaly i rógi (truby).

⁹Kiéli doginé jone ke Xidonoskiri šúrna (gumno), Oza protyrdyjá péskiro vast, sob (kaj) te podrikirél kovčego, pal-dová so guruva band'kirde les.

¹⁰Ne Devél xoliásyja pe Ozaste i muliakirdiá les pal dová, so jov protyrdyjá péskiro vast ke kovčego; i jov daj-pac' myjá angíl Devléskiro muj.

¹¹I zadumindiape Davído, so Devél muliakirdiá Ozas. I khardiá dová štéto Perec-Ucca “Ozaskiro xasibén’, adiáke jov kharélape ke davá dyvés.

¹²I strahadyja Davído Devléstyr dro dová dyvés, i phendiá: “Syr zalydžava me ke pe Devléskiro kovčego?”

¹³I na lydžijá Davído kovčego ke pe dro fóro Davidóskiro, a riskirdiá drom lésa ke Aviedaroskire-Giefianinoskiro kher.

¹⁴I jaciápe kovčego Devléskiro Aviedaroste, dro léskiro kher, trin čhoná, i bahtiakirdiá Devél Aviedaroskiro kher i saró, so sys léste.