Read Biblija - Pe Baltitko Romani čib (Romanes) 2019 Baltic Romani Bible 1 Paralipomienono 18 Bible Online

1 Paralipomienono 18 - Biblija - Pe Baltitko Romani čib (Romanes) 2019 Baltic Romani Bible bible

1 Paralipomienono 18

¹Paló (poslie) davá Davído pirimardia Filistimlianen, i štyliakirdia len, i lyjá Giéfo i fórja, savé sys tel léskiri zor.

²Jov pirimardia adiáke-pac' Moavitianen, i kerdépe Moavitiani Davidóskire pishar'jénca, i lydžiné léske dyibén (dan').

³I pirimardia Davído Adraazaros, Suvakire kralís, dro Jemafo, kiéli odová gijá te zoraliakirel péskiro vast pašýl reka (len') Jevfrato.

⁴I lyjá Davído léstyr tysjonco maribnýtka vurdyná, eftá (bitrinéngiro deš) tysjoncy manušén, savé sys uklisté pe grénde i biš tysjoncy manušén, savé giné pezal, i rosphagirdiá Davído saré maribnýtka vurdyná, (piričhiny žyly grénde) i jačkirdiá léndyr féni šel.

⁵Sirijani Damaskostyr javné te poden vast (pe pomoš) Adraazaroske, Suvakire kralíske, ne Davído domardiá biš te duj tysjoncy Sirijanen.

⁶I čhudiá Davído rakhibnytkone xaladén dre Sirija Damaskoskiri, i kerdépe Sirijani Davidóskire pishar'jénca, lydžyi léske dyibén. I pomogindia Raj Devél usiéndie (kaj jov te na džal) Davidóske.

⁷I lyjá Davído suvnakuné ščýty, savé sys Adraazaroskire pishar'jénde, i jandiá len dro Jerusalimo.

⁸A Tivhafatyr i Kunostyr Adraazaroskire for'jéndyr lyjá Davído drieván but xarkóma (mied'). Látyr Solomóno kerdiá xarkuno mórjo (derjáv), i stýlby xarkuné, i khoré (sasúdy) xarkuné.

⁹I šundiá Fojo[2], králi Imafostyr, so Davído domardiá saré xaladén Adraazaroskiren, Suvakiren kraliskiren.

¹⁰I bičhadiá Ioramos, péskire čhavés, ke králi Davído, te vyphenel “šel lačhé dyvesá” léske i te parikirel léske pal dová, so jov mardiápe Adraazarosa i zamardiá les, — pal-davá so Fojo sys dre maribén Adraazarosa, — i jov lyjá pésa kažna (rázna) khoré suvnakuné, rupuvé i xarkuné.

¹¹I otdyjá len králi Davído Ráske-Devléske khetané rupésa i suvnakása, savó jov lyjá saré Najudytkoné manušéndyr: Idumejanendyr, Moavitianendyr, Amonitianendyr, Filistimlianendyr i Amalikitianendyr.

¹²I Aviesa, Saruiaskiro čhavó, domardiá Idumejanen, pe Londo dólo, dešuohto tysjoncy;

¹³I čhudiá Davído dre Idumiéia rakhibnar'jéngire xaladén, i kerdépe saré Idumejani Davidóske pishar'jénca. Raj Devél pomogindia Davidóske ŭsiendie, karik jov na psirdiá.

¹⁴I sys kralísa Davído pe saró Izrailjo, i kerdiá séndo i čačipén sarénge péskire manušénge.

¹⁵Ioávo, Saruiaskiro čhavó, sys xaladéngiro barydyró, i Iosafáto, Ahiludoskiro čhavó sys kanceliari (pisarjo),

¹⁶Sadoko, Ahituvoskiro čhavó, i Avimieliého, Aviafaroskiro čhavó — rašaja, a Susa — čhinybnari pe lylá.

¹⁷O Vaniéia, Iodajoskiro čhavó — pe Xieliefiejénde i Fieliefiejénde; a Davidóskire čhavé sys anglatuné šeritka pašýl kralíste.