Read Biblija - Pe Baltitko Romani čib (Romanes) 2019 Baltic Romani Bible 1 Paralipomienono 20 Bible Online

1 Paralipomienono 20 - Biblija - Pe Baltitko Romani čib (Romanes) 2019 Baltic Romani Bible bible

1 Paralipomienono 20

¹Pirdál berš, dro dová-pac' časo, kiéli králja vydžána pe maribén, vylydžijá Ioávo xaladén i lyjá te čhučakirel (te opustošynel) Amonitianengiri phuv, i javdiá i občhudiá trusciál xaladybnasa Rava. Davído jaciápe dro Jerusalimo. Ioávo, zalyja Rava, rosphagirdiá la.

²I lyjá Davído vienco (koróna) léngire kralískiro šerestyr; i dre léste sys talanto suvnakáj pharipnasa, i dróga bará sys pe léste; i sys jov čhudo pe šeró Davidóskiro. I drieván but doresybén vylydžijá foróstyr.

³A manušén, savé sys dre léste, vylydžijá i muliakirdiá len pilenca (rizilenca), sastruné vymaralkenca i toverenca. Adiáke kerdiá Davído sarénca Amonitianengire for'jenca, i risijá Davído i saré manušá dro Jerusalimo.

⁴Paló dová jaciá maribén Filistimlianenca dro Gaziéro. Tedy Sovohajo, Xušatianino, domardiá Safos, jekhés Riefaimoskire rodóstyr. I jone štylyne.

⁵I nevéstyr (nevés) sys maribén Filistimlianenca. Tedy o Jelhanamo, Iairoskiro čhavó, domardiá Lahmijos, pšalés Goliafonoskires, Giefianinos, savéste kašt dre čhurdybnytko bust sys syr vešyna dre tkačoskiro stanko.

⁶Sys iščo (inké) maribén dre Giefa. Odój sys jekh baró manúš, savéste sys pir šov angušta, sarén biš te štar. I jov adiáke-pac' sys Rafaimoskire rodóstyr.

⁷Jov koscia Izrailjo; ne Ionafáno, čhavó Šymaskiro, Davidóskire pšaleskiro, čhindiá les ke maribén.

⁸Davá sys odolé, savé bijándyne Riefaimendyr dre Giefa, i jone pyné Davidóskire vastéstyr i léskire-dynar'jéngire vasténdyr.