Read Biblija - Pe Baltitko Romani čib (Romanes) 2019 Baltic Romani Bible 2 Paralipomienono 11 Bible Online

2 Paralipomienono 11 - Biblija - Pe Baltitko Romani čib (Romanes) 2019 Baltic Romani Bible bible

2 Paralipomienono 11

¹I javdiá Rovoámo dro Jerusalimo, i khardiá Judáskire i Vieniaminaskire kheréstyr šel ohtodešá tysjoncy fedyršone xaladén, sob (kaj) te marénpe Izrailjosa i te riskirén kralipén Rovoamoske.

²I sys Ráskire-Devléskiro lav ke Samiéjo, savó sys Devléskiro manúš, i sys phendló:

³“Phen Rovoamoske, Solomonóskire čhavéske, Judejákire kralíske, i saré Izrailjoske dre Judáskiro i Vieniaminoskiro rodycóske:

⁴adiáke rakiréla Raj Devél: “Na psirén i na kerén maribén tumaré pšalénca; risjon sváko (kažno) dro péskiro kher, pal-dová so Me kerdjom davá.” Jone šundlé Ráskire-Devléskire lavá i risiné giibnastyr proti Jerovoamoste.

⁵Rovoámo dživdiá ke Jerusalimo; jov oblydžija fórja dre Judéia vantenca.

⁶Jov kerdiá zoraledýr Vifliejémo, i Jefamo, i Fiekoia,

⁷i Viefcuro, i Soho, i Odolamo,

⁸i Giéfo, i Mariéšo, i Zifo,

⁹i Adoraimo, i Lahiso, i Azieka,

¹⁰i Cora, i Aialono, i Xievróno, savé sys dre Judáskiro i Vieniaminoskiro ródyco.

¹¹I kerdiá jov dalé tvárdymi (kriéposti), i čhudiá dre lénde barydyrén pe rakhiben vaš maró i vešytko dzet i mol.

¹²I dyjá jov dro kažno fóro ščýty i čhurdyibnytka bustiá (kop'i), i kerdiá len drieván zoralé. I jačnépe pal léste Ju'da i Vieniamino.

¹³I rašaja, i Lievíty, savé sys pir sarí Izrailjoskiri phuv, skedynépe ke jov saré rigéndyr,

¹⁴pal-dová so jačkirdé Lievíty péskire pašýl-foritka kherá i péskire majonki, i javné dre Judéia i dro Jerusalimo; adiáke syr jačkirdiá len Jerovoámo i léskire čhavé Ráskire-Devléskire rašaibnastyr

¹⁵i čhudiá jov péste žriecen pe vučipená, i ke buzne (kozly), i ke terné guruva, savé jov kerdiá.

¹⁶A pal lénde sarén Izrailjoskire rodycendyr, savé otdyné iló péskiro, sob (kaj) te lathes Ras-Devlés, Devlés Izrailjoskires, savé javénas dro Jerusalimo, sob (kaj) te janes svénto dyibén péskire Ráske-Devléske, dadengíre Devléske.

¹⁷I kerdé jone zoraledýr Judáskiro kralipén, i podrikirenas Rovoamos, Solomonóskire čhavés, trin berš, pal-dová so jone psirdé dromésa Davidoskiresa i Solomonoskiresa dre dalé trin berš.

¹⁸I lyjá péske Rovoámo dre romniáte (paloróm) Mahalafa, čha Jerimofoskirja, Davidóskire-čhavéskire, i Avihailia, Jeliavoskirja čha, Jesiejoskire-čhaveskirja,

¹⁹i joj bijandiá léske čhavén: Iieusos, i Šemarijas, i Zagamos.

²⁰Paló (poslie) láte jov lyjá Maaha, Aviesalomoskirja čha, i joj bijandiá léske Avijas, i Atajos, i Zizos i Šelomifos.

²¹I kamdiá Rovoámo Maaha, Aviesalomoskirja čha, butýr saréndyr romniéndyr i naložnicendyr peskirendyr, pal-dová so sys léste dešuohto romniá i šovdešá naložnicy, i léstyr bijándyne biš te ohtó čhavé i šovdešá čhaja.

²²I čhudiá Rovoámo Avijas, Maahaiakire čhavés, šeralesa i thagarisa (kniazjosa) pe léskire pšalénde; pal-dová so jov kamdiá te čhuvél les kralísa.

²³I kerdiá jov god'vares, i bičhadiá sarén peskiren čhavén pir saré Judáskire i Vieniaminóskire phuvjá, dre saré fórja zoralé tynénca, i dyjá lénge pleskiriben baró, i jov lathiá but romnien vaš lénge.