Read Biblija - Pe Baltitko Romani čib (Romanes) 2019 Baltic Romani Bible 2 Paralipomienono 12 Bible Online

2 Paralipomienono 12 - Biblija - Pe Baltitko Romani čib (Romanes) 2019 Baltic Romani Bible bible

2 Paralipomienono 12

¹Kiéli Rovoamóskiro kralipén jaciá zoraló, i jov jaciápe zoraló, tedy jov jačkirdiá Ráskire-Devléskiro Zakóno, i saró Izrailjo lésa.

²Pe pándžto berš kralipén Rovoamóskiro, o Susakimo, Jegiptóskiro králi, gijá pe Jerusalimo, — pal-dová so jone otginé Rástyr-Devléstyr,

³Léste sys tysjonco duj šelá maribnýtka vurdená i šovdešá tysjoncy manušén, savé sys uklisté pe grénde; i na sys ginybén manušénge, savé javné lésa Jegiptóstyr: Livijanenge, Sukhitamenge i Jefioplianenge;

⁴i Susakimo lyjá fórja zoralé tynénca dre Judéia, i javdiá ke Jerusalimo.

⁵Tedy Samiéjo, proróko, javdiá ke Rovoámo i thagárja Judejákire, savé skedynépe dro Jerusalimo, zrakhi pes Susakimostyr, i phendiá lénge: “Adiáke rakiréla Raj Devél: ‘Tumé jačkirdé Man, pal dová i Me jačkirava tumen dre vastá Susakimoskire.’”

⁶I primirindlepe thagárja Izrailjoskire i králi, i phendlé: “Isyn čačunó Raj Devél!”

⁷Kiéli dykhciá Raj Devél, so jone lyné te kandén (primirindlepe), tedy sys Ráskire-Devléskiro lav ke Samiejo, i sys phendló: “Jone jačné štyl (primirindlepe); na muliakirava len i sýges Me dáva lénge zrakhibén, i na pročhuvelape xolý Mirí pe Jerusalimo Susakimoskire vastésa;

⁸usajékh jone javéna léskire dynar'jénca, sob (kaj) te džinén, savó te javél dynaribén Mánge i te dynarinén phuvjákire kralipnaske.”

⁹I javdiá Susakimo, Jegiptóskiro králi dro Jerusalimo, i jov lyjá péske kučipén Ráskire-Devléskire Khereskir i kralískire-kheréskiro kučipén; saró lyjá jov, lyjá i suvnakuné ščýty, savé kerdiá Solomóno.

¹⁰I kerdiá králi Rovoámo, pe léngiro štéto, xarkuné ščýty, i otdyjá len pe vastá barydyrénge rakhibnar'jéngirenge, savé rakhne zagiibén dro kralískiro kher.

¹¹Kiéli zadžalas králi dro Ráskire-Devléskiro Kher, to javénas rakhibnárja i lydžiné len, i paló dová nevés otlydžine len dre komorki rakhibnar'jéngire.

¹²I kiéli jov jaciá te kandel, tedy otrisija léstyr Ráskire-Devléskiri xolý, i na xasiakirdiá les ke kónco (ke jagóro); pir saró i dre Judéia sys vari-so lačhó.

¹³I terdijá zoralés králi Rovoámo dro Jerusalimo, i sys kralísa. Štardešá jekh berš sys Rovoamoske, kiéli jov jaciá kralísa, i dešuefta berš sys kralísa dro Jerusalimo, dre fóro, savó saré Izrailjoskire rodendyr vykedyjá Raj Devél, sob (kaj) odój te javél Léskiro lav. Lav léskire-dákiro sys Naama, Amonitianka.

¹⁴I kerdiá jov fuipén, pal-dová so jov na čhudiá péskiro iló ke dová, sob (kaj) te lathel Ras-Devlés.

¹⁵Réndy (diély) Rovoamoskire, anglatuné i palatuné (posliednia), isyn začhindlé dre arhívy Samiejoskire-prorokoskire i Adaskire-rodengiri istorija. I sys maribén Rovoamoste Jerovoamosa dre saré dyvesá.

¹⁶I pasijá Rovoámo péskire dadénca, i sys garadó dre Davidóskiro fóro. I jaciá kralísa Avijá, léskiro čhavó, pe štéto léskiro.