Read Biblija - Pe Baltitko Romani čib (Romanes) 2019 Baltic Romani Bible 2 Paralipomienono 15 Bible Online

2 Paralipomienono 15 - Biblija - Pe Baltitko Romani čib (Romanes) 2019 Baltic Romani Bible bible

2 Paralipomienono 15

¹Tedy pe Azarijaste, Odiedoskire čhavéste, gijá telé Devléskiro Dúho (Fáno),

²i vygijá jov gil (pe strieč) Asaske i phendiá léske: “Šun man, Asá i saró Ju'da i Vieniamino: te javél Devél tuménca, kiéli tumé javéna Lésa; i kóli javéna te rodén Les, tumé lathéna Les; kóli jačkirena Les, to i Jov jačkiréla tumen.

³But dyvesá Izrailjo sys bi čačuneskiro Devléskiro i bi rašaskiro, savó sykliakirelas, i bi zakonoskiro;

⁴ne kiéli jov risjola godiása dro pharipén péskiro ke Raj Devél, Devél Izrailjoskiro, i lathéla Les, Jov déla lénge te lathén Pes.

⁵Dre dolé dyvesá na javéla ramánjo (miro) ni vygiibnytkoneske, ni zagiibnytkoneske, pal-dová so baró piridživipen javéla saré phuvjákire manušénde.

⁶Manušá javéna te marénpe manušénca, i fóro forosa, pal-dová so Devél janéla len dre túga raznone bidenca.

⁷Ne tumé zoraljon, i mek te na jačen bizorjákire tumaré vastá, pal-dová so isyn nagrada (mazúri) pal tumaré réndy.”

⁸Kiéli šundiá Asá dalé lavá i angilphenybén (proročynyben) Odiedoskire-prorokoskire čhavéskire, tedy lyjá pes dre vastá i vyčhurdyja najudýtka magiribena saré phuvjátyr Judaskirjatyr i Vieniaminoskirjatyr i for'ndyr, savé jov lyjá pe Jefriemóskiri bérga, i neviakirdia Ráskire-Devléskiro altárjo, savó sys angíl trémo Ráskire-Devléskiro.

⁹I skedyjá sarén manušén Judastyr i Vieniaminostyr i manušén, savé dživdé lésa, savé piriginé Jefriemostyr i Manasijastyr i Simieonostyr; pal-dová so but Izrailjostyr piriginé ke jov, kiéli dykhné, so Raj Devél, Devél léskiro, sys lésa.

¹⁰I skedynépe dro Jerusalimo pe tríto čhon, dre dešupandžto berš, syr Asá lyjá te kralinél;

¹¹i jandlé dro dová dyvés svénto dyibén Ráske-Devléske doresybnastyr, savó jandlé, baré kheritkoné murdaléndyr eftašelá i tykné eftá tysjoncy;

¹²i zaginé dro zaviéto, sob (kaj) te lathes péskire Ras-Devlés, dadengíre Devlés, saré péskire iléstyr i saré péskire diéstyr;

¹³a kažno (sváko), kon na léla te rodél Ras-Devlés, Izrailjoskire Devlés, bangó javéla te merél, ci tyknó jov, ci baró, ci murš, ci džuvlý.

¹⁴I sovlahade Ráske-Devléske zoralé zaniása (glosasa) i godlypnasa, i pašýl zan rogengiri i gornoskiri.

¹⁵I radyndlepe saré Judejákire manušá dalé sovlahake, pal-dová so saré péskire iléstyr i saré kamibnasa lathné Les, i Jov dyjá lénge te lathén Pes. I dyjá lénge Raj Devél ramánjo (miro) saré rigéndyr.

¹⁶I Maahatyr, péskire datyr, králi Asá, otlyja kralipnaskiro baripén pal dová, so joj kerdiá idolo vaš dembitko vešoro. I rosčingirdia Asá idolo lákiro, i čingirdia les pe koterá, i xačkirdiá pe Kiedronoskiro dólo.

¹⁷Na dykhí, so vučipyna na sys otparude dro Izrailjo, ne iló Asáskiro sys sarésa otdynó Ráske-Devléske dre saré léskire dyvesá.

¹⁸I jandiá jov obsvencyndle khoré (sasúdy) léskire dadéskire i léskire priedmiéty, savé jov posviencyndia vaš Devléskiro Kher, rup, i suvnakái, i khoré.

¹⁹I na sys maribén ke trijánda pándžto berš dro Asáskiro kralipén.