Read Biblija - Pe Baltitko Romani čib (Romanes) 2019 Baltic Romani Bible 2 Paralipomienono 26 Bible Online

2 Paralipomienono 26 - Biblija - Pe Baltitko Romani čib (Romanes) 2019 Baltic Romani Bible bible

2 Paralipomienono 26

¹I lyné saré Judejákire manušá Ozijas, savéske sys dešušov berš, i čhudé les kralísa pe léskire-dadéskiro Amasijaskiro štéto.

²Jov kerdiá Jelafo i otdyjá les Judénge, paló dová (poslie), syr pasijá králi viéčnes péskire dadénca.

³Dešušov berš sys Ozijaske, syr jaciá jov kralísa, i pandždešá duj berš jov sys kralísa pe Jerusalimo; lav léskire-dákiro sys Iieholijá, Jerusalimóstyr.

⁴I kerdiá jov lačhés dre Ráskire-Devléskire jakhá adiáke-pac', syr kerdiá Amásija, léskiro dad;

⁵I risjolas godiása jov ke Devél dre Zaharijaskire dyvesá, savó sykliakirdiá pal Devléskiri dar; i dre dolé dyvesá, kiéli jov risjolas godiása ke Raj Devél, to pomogindia léske Devél.

⁶I jov vygijá, i mardiápe Filistimlianenca, i rosphagirdiá Giefoskire vánty, vánty dre Iavniéia, vánty dre Azoto; i kerdiá fórja dre Azotoskiri okruga i Filistimlianende.

⁷I pomogindia léske Devél proti Filistimlianende i proti Aravitianende, savé dživdé dro Gur-Vaalo, i proti Mieunitianende;

⁸I dénas Amonitiani dan' Ozijaske, i dogijá léskiro lav ke Jegiptóskiri rig; pal-dová so jov sys drieván zoraló.

⁹I kerdiá Ozíia vučardia (bašni) dro Jerusalimo pe venglytko pórta i pe doloskiri pórta i pe venglo, i zoraliakirdia len.

¹⁰I kerdiá jov tury pe čhučí phuv (pušča) i ĥanadia but vendarinia (vodojo'my), pal-dová so léste sys but kherítka murdalá, i pe telatuné phuvjá, i pe loščyny, i phuvjákire butiarnen i sadovniken (barjakirén) pe bérgi i pe Karmilo; pal-dová so jov kamdiá, sob (kaj) te obkeren phuv.

¹¹Sys Ozijaste i xaladé, savé vydžánas pe maribén otriadenca, pir léngiro čyslo (gin) dre čhinybén dre piričhinyben, savó sys čhudo vastésa Iieieloskiresa čhinybnarisa (pisarjo'sa) i Maasejaskire dykhibnarisa (nadziratieljo'sa), tel vast Xananijaskiro, jekhe kral'jéngirendyr ras pe xaladénde.

¹²Sarén manušengiren šeralen pe stréčy (pokoliénii), murškané xaladén, sys duj tysjoncy šovšelá,

¹³i tel vast léngire xaladéngire-zorjakiro sys trin šelá eftá tysjoncy pandžšelá, savé vyginé pe maribén murškané xaladenca, te den vast kralíske proti vergoste.

¹⁴I skedyjá vaš lénge Ozíia, vaš saré xaladenge, ščýty, i čhurdypnytka bustiá (kop'i) i šljomy, i laty, i luki, i praščy te čhurdén bará.

¹⁵I kerdiá jov dro Jerusalimo godes-pridumindle mašyny, sob (kaj) jone te javén pe tury i pe véngly te čhurdén maribnýtka bustiá (striély) i baré bará. I rozlydžijape léskiro lav dur; pal-dová so jov divnes durjakirdia pes, i kerdiápe zoraló.

¹⁶Ne kiéli jov kerdiápe zoraló, to zaphutija léskiro iló pe léskiro xasibén, i jov kerdiápe zlydarisa angíl Raste-Devléste, Devléste peskireste; pal-dová so jov zagijá dre Khangirí Ráskire-Devléskiri, sob (kaj) te xačkirel fimiámo pe altárjo kadilasa.

¹⁷I gijá pal léste Azárija, rašái, i lésa ohtodešá Ráskire-Devléskire rašaja, fedyršonen manušén.

¹⁸I ĥazdynépe proti Ozijaste, kralíste, i phendlé léske: “Na túke, Ohózije, te kadines Ráske-Devléske; davá réndo isyn rašángiro, Aaronóskire-čhavéngiro, savé isyn vysvencyndle te kadinen; vydža sventoné štetóstyr, pal-dová so tu kerdián na pir Zakóno, i davá na javéla túke dre patýv Raste-Devléste.

¹⁹I rozholiasyja Ozíia, — a dre vast léste sys kadila te thuvliakirel, i, kiéli jov xoliásyja, to prokáza javdiá pe léskiro čekat, angíl muj rašángiro, dre Ráskire-Devléskiro Kher, pašýl altárjo kadilytko.

²⁰I podykhciá pe léste Azárija, anglatunó rašái, i saré rašaja; i ĥáda, sys léste prokáza pe léskiro čekat. I začhude les te vydžál odothýr, ne i kokoró jov lyjá sygedýr te džal krig, adiáke syr dukhadia les Raj Devél.

²¹I sys králi Ozíia nasvaló prokazasa ke péskire-meribnaskiro dyvés, i dživdiá dro osobno kher, i odlyno sys Ráskire-Devléskire Khereskir. A Ioafamo, léskiro čhavó, sys barydyrésa pe kralískiro kher i xulaindia manušénca pe phuv.

²²Javír Ozijaskire réndy, anglatuné i palatuné (posliednia), začhindiá Isajo, Amososkiro čhavó, proróko.

²³I pasijá Ozíia péskire dadénca, i ĥaradé les dadénca leskirenca pe félda kral'jéngiri dre koplicy; pal-dová so rakirdé: jov isyn nasvaló prokazasa. I jaciá kralísa Ioafamo, léskiro čhavó, pe štéto léskiro.