Read Biblija - Pe Baltitko Romani čib (Romanes) 2019 Baltic Romani Bible 2 Paralipomienono 29 Bible Online

2 Paralipomienono 29 - Biblija - Pe Baltitko Romani čib (Romanes) 2019 Baltic Romani Bible bible

2 Paralipomienono 29

¹Jezekíia jaciá kralísa, kiéli léske sys biš te pandž berš, i biš te jeniá berš sys jov kralísa dro Jerusalimo; lav léskire-dákiro sys Avijá, Zaharijaskiri čhaj.

²I kerdiá jov lačhés dre Ráskire-Devléskire jakhá adiáke-pac', syr kerdiá Davído, léskiro dad.

³Pe anglatunó berš pe péskiro kralipén, dro anglatunó čhon, jov psiradia (otčhakirdiá) Ráskire-Devléskire Khereskire vudará i neviakirdia len;

⁴i phendiá te javén rašange i Lieviténge, i skedyjá len pe vastočno foruný [plóšča.-r.s.].

⁵I phendiá lénge: “Šunén man, Lievitále! Akaná vysvencynenpe kokoré, i obsvencynen Kher Ráskire-Devléskiro , tumaré-dadéngiro Devléskiro, i vyčhurden nažužypen (melalypen) Khangirjátyr.

⁶Pal-dová so, ake, amaré dadá kerdé na pir zakóno i kerdé nalačhés dre jakhá Ráskire-Devléskire, amaré Devléskire, i jačkirdé Les, i otriskirde jone péskire muiá Ráskire-Devléskire Khereskir, i risiné dumesa;

⁷i phandle vudará dro trémo, i mud'kirde momolytka (svietil'niki), i na xačkirdé dróga smóly, i na ĥazdyné célo shačkiribén dre Izrailjoskire-Devléskiri Khangirí.

⁸I sys Ráskire-Devléskiri xolý pe Judéia i pe Jerusalimo; i Jov otdyjá len pe ladž, pe čhučypen i pe saben, syr tumé dykhéna jakhénca tumarenca.

⁹I, ake, pyné amaré dadá kurtalátyr; a amaré čhavé, i amaré čhaja, i džuvliá amaré, pal davá isyn dro pliéno ke dalé dyvesá.

¹⁰Akaná mánde pe iló — te keráv Zavieto Rása-Devlésa, Izrailjoskire Devlésa, mek te riskirél améndyr Léskire-xoliakiri jag.

¹¹Čhavále mre! Na javén bišeritka; pal-dová so tumen vykedyjá Raj Devél te terdjon angíl Léskiro muj, te dynarinén Léske i te javén Léste dynar'jénca i te xačkirén dróga smóly.

¹²I uštyné Lievíty: Mahafo, Amasajoskiro čhavó, i Ioiéljo, Azarijaskiro čhavó, Kaafoskire čhavéndyr; i Mierariskire čhavéndyr; Kiso, Avdijoskiro čhavó, i Azárija, Jegalielieloskiro čhavó; i Girsonoskire rodycóstyr: Ioaho, Zimmaskiro čhavó, i Jedeno, Ioahoskiro čhavó;

¹³Jelicafanoskire čhavéndyr; Šimri i Iieielo, Asafoskire čhavéndyr: Zahárija i Matfanija;

¹⁴I Jemanoskire čhavéndyr: Iiehiiélo i Šymiéjo; i Idifunoskire čhavéndyr: Šiemaija i Uzielo.

¹⁵Jone skedyné peskiren pšalén i vysvencyndlepe; i giné, pir kralískiro priphenybén, te žužakiren (te čystinen) Ráskire-Devléskiro Kher pir lavá Ráskire-Devléskire.

¹⁶I giné andré rašaja dro Ráskire-Devléskiro Kher te žužakiren, i vylydžiné saró nažužo, so lathné dre Ráskire-Devléskiri Khangirí, pe gréda (dvóro) Devléskire Kheréskiro. A Lievíty lyné davá, sob (kaj) te lydžán krig javrí ke Kiedronoskiri sýgno rékica (lenorí).

¹⁷I lyné jone te osvencynen dro pérvo (anglatunó)-čhonéskiro dyvés, i pe ohtóto (bidujéngiro déšto) dyvés dolé-pac' čhonéskiro dyvés zaginé dro Ráskire-Devléskiro gréda (dvóro); i obsvencynenas Ráskire-Devléskiro Kher ohtó dyvesá, i pe dešušovto anglatuné-čhonéskiro dyvés jone kerdé.

¹⁸Tén'ci javné jone dro kher ke králi Jezekíia i phendlé: “Ame vyžužakirdiam Ráskire-Devléskiro Kher, i altárjo vaš célo shačkiribén, i saré léskire khoré (sasúdy), i skamínd vaš svénto maró, i saré léskire khoré.

¹⁹I saré khoré, savé začhurdyja králi Aházo dre péskire kralipnaskire dyvesá, kerí čoripén, ame skedyjam i obsvencyndiam, i, ĥáda, jone isyn angíl Ráskire-Devléskiro altárjo.”

²⁰I uštyjá králi Jezekíia pe zlóko (pe ránko), i skedyjá foróskire barydyrén, i gijá dro Ráskire-Devléskiro Kher.

²¹I jandlé eftá guruvorén i eftá bakrén, i eftá bakrorén, i eftá buznen (kozlen) pe svénto dyibén Ráske-Devléske pal grého pal kralipén, i pal svénto štéto, i pal Judéia; i priphendiá jov Aaronóskire čhavénge, rašange, te ĥazdén célo shačkiribén pe Ráskire-Devléskiro altárjo.

²²I začhindlé guruvorén, i lyné rašaja rat, i počhude ratésa altárjo; i začhindlé bakrén, i počhude ratésa altárjo; i začhindlé bakrorén, i počhude ratésa altárjo.

²³I jandlé buznen pal grého angíl kralískiro muj i skedyibén, i jone čhudé péskire vastá pe lénde.

²⁴I začhindlé len rašaja, i léngire ratésa vyžužakirde altárjo, sob (kaj) te javén žužé bangipnastyr pal saré Izrailjoskire gréhi, pal-dová so pal saró Izrailjo priphendiá králi te janén célo shačkiribén i svénto janybén Ráske-Devléske pal grého.

²⁵I čhudiá jov Lievitén dre Ráskire-Devléskiro Kher cymbalenca, arfenca i lutenca, pir Davidóskiro i Gadoskiro uphenybén, savó sys kralískiro magiko, i Nafanos, prorokós, adiáke syr Rástyr-Devléstyr sys davá uphenybén pirdál Léskire prorokénde.

²⁶I terdiné Lievíty bašaibnytkone strumientenca Davidoskirenca i rašaja rogénca (trubenca).

²⁷I priphendiá o Jezekíia te ĥazdén célo shačkiribén pe altárjo. I dre dová momiento, syr lyjá célo shačkiribén te xačol, lyné te bagán Ráske-Devléske, tel zan rogoskiri i tel strumiénty Davidóskire, Izrailjoskire kralískire.

²⁸I saré manušá dro skedyibén mangnepe i manušá bagandle, i rógi bašade, paka xačolas célo shačkiribén.

²⁹Syr shačija célo shačkiribén, to králi i saré manušá, savé sys pašýl léste, terdiné pe čangá i poklonindlepe (kerde šerésa).

³⁰I priphendiá králi Jezekíia i thagárja Lieviténge, sob (kaj) i jone te barjakirén (te slavinén) Ras-Devlés Davidóskire lavénca i Asafoskire magikenca; i jone slavindle radymása, i terdiné pe čangá, i klonindlepe.

³¹I rakirdiá Jezekíia, i phendiá: “Akaná tumé otdyné pes Ráske-Devléske; džán i janén svénta dyibená i janybén te parikirén dro Ráskire-Devléskiro Kher”, i lydžijá saró skedyibén svénta dyibená i parikiribnaskiro janybén, kažno (sváko), kon sys lydžino ilésa, — célo shačkiribén.

³²I sys célo shačkiribén, savó jandlé manušá, savé skedyné: eftadešá guruvén, šel bakrén, dujšelá bakrorén; saró davá sys vaš célo shačkiribén Ráske-Devléske.

³³Javír svénta dyibená Ráske-Devléske sys šovšelá baré kheritkoné murdaléndyr (skotóstyr) i trin tysjoncy tykné murdaléndyr (skotóstyr).

³⁴Ne rašaja sys nábut (kutý), i jone na mogindlé te zlen zandirjá (cépi) saréndyr celoné shačkiribnastyr; i protyrdyne vast (pomogindle) lénge léngire pšála, Lievíty, pe rendoskiro kónco i paka vysvencyndlepe javír rašaja; pal-dová so Lievíty sys butýr dobusova te svencynen pes, syr rašaja.

³⁵Apríč célo shačkiribén, savé sys drieván but čekenesa (tukosa) mirnone sventoné dyibnendyr Ráske-Devléske i rosčhuibnasa pašýl célo shačkiribén. Adiáke nevéstyr kerdó sys dynaribén (služynyben) dro Ráskire-Devléskiro Kher.

³⁶I radyndiape Jezekíia i saré manušá pal dová, so Devél adiáke riskirdiá manušén; pal-dová so davá kerdiápe naužakiri.