Read Biblija - Pe Baltitko Romani čib (Romanes) 2019 Baltic Romani Bible 2 Paralipomienono 31 Bible Online

2 Paralipomienono 31 - Biblija - Pe Baltitko Romani čib (Romanes) 2019 Baltic Romani Bible bible

2 Paralipomienono 31

¹I pe kónco (jagóro) saré daleske, giné saré Izrail'tiáni, savé odój sys, dre Judejákire fórja, i rozmarde statuly, čingirde telé svencona vešá, i rosphagirdé vučipená i altári pe sarí Judéia i pe phuv Vieniaminoskiri, Jefriemóskiri i Manasijaskiri, pe kónco (jagóro). I paló dová risiné saré Izrailjoskire čhavé, kažno dro péskiro xulaiben, dre péskire fórja.

²I čhudiá Jezekíia zmieny rašángire i Lieviténgire, pe léngiro rosčhuiben, kažnones pašýl péskiro réndo, rašángiro ci Lievitengiro, pašýl célo shačkiribén i pašýl mirna svénta dyibená Ráske-Devléske, vaš služynyben, vaš šaribén i slavinyben, pašýl Ráskire-Devléskiri Kheréskiri pórta.

³I otdyjá králi péskiri paš barvalypnastyr pe célo shačkiribén; pe zlokoskiro i bel'veliakiro célo shačkiribén, i pe célo shačkiribén dre sávaty i dre nevó čhon, i pe svénki, syr isyn začhindló dre Ráskire-Devléskiro Zakóno.

⁴I butýr: priphendiá jov manušénge, savé dživéna ke Jerusalimo, te den léngiri bažyn (pleskiriben) te rikirén rašán i Lievitén, sob (kaj) jone te javén dro zoraló dúho (fáno) pir Ráskire-Devléskiro Zakóno.

⁵Kiéli sys phendló zoralés manušénge davá uphenybén, tedy jandlé Izrailjoskire čhavé drieván but anglatuné plódy marestyr, moliátyr (vinostyr), i ksilestyr, i avginestyr, i kažno so barija pe félda; i dešengirja saréstyr jandlé drieván but.

⁶I Izrail'tiáni i Judejákire, savé dživéna dre Judejákire fórja, adiáke-pac' jandlé dešengirja (diesiatiny) baré i tykné murdaléndyr (skotóstyr) i dešengirja sventoné janybnastyr, savó sys posvencyndlo Ráske-Devléske, léngire Devléske; i sčhude len dre grudy.

⁷Pe tríto čhon lyné te čhuvén grudy, i dro eftáto čhon mekné.

⁸I javné Jezekíia i thagárja, i dykhné grudy, i parikirde Ráske-Devléske i Léskire Izrailjoskire manušénge.

⁹I phuciape Jezekíia rašandyr i Lievitendyr pal dalé grudy.

¹⁰I otphendiá léske Azárija, anglatunó rašái, Sadoskire kheréstyr, i phendiá: “Dolé dyveséstyr, syr lyné te janén janybén dro Ráskire-Devléskiro Kher, to ame xajam čalés, i but jaciápe; pal-dová so Raj Devél bahtiakirdiá Péskire manušén. Daléstyr, so jaciápe, sys drieván but.”

¹¹I priphendiá Jezekíia te kerén skedyné štúby pašýl Ráskire-Devléskiro Kher. I kerdé adiáke.

¹²I pirilydžine odorík janybén, i dešengirja, i otdyné mištypena saré čačipnása. I sys barydyrésa pe lénde Xonanija, Lievito, i Simiéjo, léskiro pšal, javiresa.

¹³A Iiehiilo, i Azazija, i Nahafo, i Asailo, i Iierimofo, i Iozavado, i Jelielo, i Ismahiia, i Mahafo i Bienanija sys dykhibnar'jénca tel vast Xonanijaskiro i Simiejoskiro, léskire pšaleskiro, pir uphenybén kralískiro Jezekijáskiro i Azarijoskiro, savó sys barydyró pe Ráskire-Devléskiro Kher.

¹⁴Korié, Imnaskiro čhavó, Lievito, rakhibnari pe pórta pe vastočno rig, sys pašýl janybená iléstyr Devléske, te vydel dová, so sys jandlo Ráske-Devléske i fedyršone posvencyndle vieščendyr.

¹⁵I tel léskiro vast sys Jedieno, i Miniamino, i Iiešua, i Šemaija, i Amarija, i Šehanija dre svencybnaskire fórja, sob (kaj) čačunés te rozden péskire pšalénge pašá, syr bareske, adiáke i tykneske.

¹⁶Apríč léngiro piriginybén (piričhinyben), sarén muršendyr triné beršéndyr i butýr, sarénge, kon psirdiá dro Ráskire-Devléskiro Kher vaš kažnoné dyveseskiro réndo, vaš léngiro dynaribén (služynyben), pe léngire butiá i pe léngire otdiely (zmiény).

¹⁷I rašange, savén zalydžine dro piričhinyben, pir léngire stréčy (pokoliénii), i Lieviténge bišé beršéndyr i butýr, pe léngire butiá, i pe léngire otdiely (zmiény).

¹⁸I manušénge, savén zalydžine dro piričhinyben saré lengirenca tykné čhavorenca, léngire romniénca, i léngire čhavénca, i léngire čhajénca, — saré skedyibnaske; pal-dová so jone saré čačipnása otdyné pes pe svénto dynaribén (služynyben), syr rašaja.

¹⁹I vaš čhavénge Aaronoskirenge, rašange dre gavá, so sys trusciál fórja léngire, pašýl kažno fóro čhudé sys muršá pir lav, sob (kaj) te rozden pašá phuvjákire saré muršenge, rašange i sarénge, kon sys zalydžino dro piričhinyben Lievitende.

²⁰Ĥáda, so kerdiá Jezekíia pe sarí Judéia, — i jov kerdiá lačhipén, i čačipén, i patiaibén angíl Raste-Devléste, péskire Devléste.

²¹I dre saró, so jov kerdiá te dynarinén (te služynen) Devléskire Kheréske i te rakhén Zakóno i priphenybén i, dumindia pal péskire Devléste, jov kerdiá saré péskire iléstyr i léste sys baht.