Read Biblija - Pe Baltitko Romani čib (Romanes) 2019 Baltic Romani Bible 2 Paralipomienono 6 Bible Online

2 Paralipomienono 6 - Biblija - Pe Baltitko Romani čib (Romanes) 2019 Baltic Romani Bible bible

2 Paralipomienono 6

¹Tedy phendiá Solomóno: “Raj Devél phendiá, so Jov kaméla te dživél dro kalypén (mrako),

²'me kerdjom Kher vaš džiibén Túke, štéto vaš Túke te dživés (te jačes viéčnes).”

³I risijá králi péskire mósa, i bahtiakirdiá saró Izrailjoskiro skedyibén, saró Izrailjoskiro skedyipen sys terdó, —

⁴i phendiá: “Te javél bahtiakirdó Raj Devél, Devél Izrailjoskiro, Savó, so phendiá Péskire ušténca Davidóske, miré dadéske, to kerdiá akaná Péskire vastésa!” Jov rakirdiá:

⁵“Dolé dyveséstyr, syr Me vylydžijom manušén Miren Jegiptóskire phuvjátyr, Me na vykedyjom fóro ni dre jekh rodycendyr Izrailjoskirendyr vaš Mánge te kerén kher, dre savó javélas by lav Miro, i na vykedyjom manušés, savó te javél by Miré Izrailjoskire manušéngire kralísa,

⁶ne Me vykedyjom Jerusalimo, sob (kaj) odój te javél Miro lav, i Me vykedyjom Davidós, sob (kaj) jov te javél pe Miré Izrailjoskire manušénde.’

⁷I sys pe iló Davidóste, miré dadéste, te kerél Kher vaš lav Ráskire-Devléskiro, Izrailjoskire Devléskiro.

⁸Ne Raj Devél phendiá Davidóske, miré dadéske: “Túte isyn pe iló te kerés Khangirí Miré lavéske; šukár, so davá isyn pe iló túte:

⁹ne tu usajékh na kerésa Khangirí, a tyró čhavó, savó javéla tyré maséndyr, jov keréla Kher (Khangirí) Miré lavéske.

¹⁰I kerdiá ke kónco/iagóro (spolnindia) Raj Devél Péskiro lav, savó rakirdiá: “Me terdijom pe Davidóskiro štéto, miré dadéskiro, i bescjom pe Izrailjoskiro trono, syr phendiá Raj Devél, i kerdjom Kher Ráskire-Devléskiro , Izrailjoskire Devléskire lavéske.

¹¹I me čhudjom odój kovčego, dro savó isyn Ráskire-Devléskiro zaviéto, savó kerdé Lésa Izrailjoskire čhavé.”

¹²I terdijá Solomóno pašýl Ráskire-Devléskiro altárjo angíl saró Izrailjoskiro skedyibén, i ĥazdyjá péskire vastá, —

¹³pal-dová so Solomóno kerdiá xarkuno amvono, dlengipnása dre pandž kuniá i buĥlypnasa dre pandž kuniá, a vučipnása dre trin kuniá, i čhudiá les maškír gréda; i terdijá pe léste, i terdijá pe čangá angíl saró Izrailjoskiro skedyibén, i ĥazdyjá péskire vastá ke bolybén,

¹⁴i phendiá: “Rajo Dévla, Dévla Izrailjoskiro! Nane Devlés, adasaves syr Tu san, ni pe phuv, ni pe bolybén. Tu rakhesa zavieto i tangipén ke Tyré pishárja, savé psiréna angíl Túte saré péskire ilésa.

¹⁵Tu kerdián Tyré pisharíske Davidóske, miré dadéske, so Tu rakirdian léske; so rakirdiá Tu Tyré ušténca, dro dová dyvés kerdián Tu Tyré vastésa.

¹⁶I akaná, Rajo Dévla, Dévla Izrailjoskiro! Ker Tyré pisharíske Davidóske, miré dadéske, dová, so Tu phendián Léske, rakirí: “Na pirijačéla túte murš, savó javéla te bešél angíl Miro muj pe Izrailjoskiro trono, kóli jekh tyré čhavé javéna te dykhén pal péskire dromá, psiri pir Miro Zakóno adiáke, syr tu psirdian angíl Mánde.’

¹⁷I akaná, Rajo Dévla, Dévla Izrailjoskiro! Mek te javél čačunó Tyró lav, savó Tu rakirdian Tyré pisharíske Davidóske.

¹⁸Ci pir čačipén Devléske te dživés manušénca pe phuv? Kóli bolybén i bolybna bolybnáskire isyn tykné vaš Túke, — dolesa tyknedýr isyn Khangirí daja, saví me kerdjom.

¹⁹Ne podykh pe Tyré pishariskiri pátieri (molítva) i pe léskiro mangipén, Rajo Dévla, Devél miro! Prišunpe ke gódla i ke pátieri, savjása Tyró pishári mangelape angíl Túte.

²⁰Mek te javén Tyré jakhá otčhakirde pe daja Khangirí dyvesé i ratý, pe štéto, kaj Tu dyján lav te čhuvés Tyró lav, sob (kaj) te šunés pátieri, savjása Tyró pishári javéla te mangélpe pe davá štéto.

²¹Vyšún mangipén Tyré-pishariskiro i Tyré-Izrailjoskire manušéngiro, savénca jone javéna te mangénpe pe davá štéto; vyšún Tyré džiibnáskire štetóstyr, bolybnástyr, vyšún i otmek grého!

²²Kiéli vari-kon keréla grého proti péskire pašatuneste i phučela léstyr sovél, sob (kaj) jov te sovlahal, i javéla te kerélpe sovél angíl altárjo Tyró dre daja Khangirí:

²³to tedy Tu vyšún bolybnástyr i ker séndo pe Tyré pishar'jénde, otdé bangeske, čhuvi, so jov kerdiá pe léskiro šeró, i opravdyn (čačakir) čačunés, de léske pir léskiro čačipén.

²⁴Kiéli javéna domardé manušá Tyré Izrailjoskire vergosa pal dová, so jone kerdé grého angíl Túte, i jone risjona ilésa ke Tu, i priĥaljona lav Tyró, i javéna te mangén i te mangénpe angíl Túte dro dová Kher (dre daja Khangirí),

²⁵to tedy Tu vyšún bolybnástyr i otmek Tyré Izrailjoskire manušéngiro grého, i rískir len pe phuv, saví Tu dyján lénge i léngire dadénge.

²⁶Kiéli začhakirlape bolybén, i na javéla bryšýnd pal dová, so jone kerdé grého angíl Túte, i javéna te mangénpe pe davá štéto, i priĥaljona lav Tyró, i otdžana péskire grehostyr, pal-dová so Tu čhudián len telé,

²⁷tedy Tu vyšún bolybnástyr, i otmek grého Tyré pishar'jengiro i Izrailjoskiro Tyré-manušéngiro, uphen lénge lačhó drom, pir savó te džán lénge, i bičháv bryšýnd pe Tyrí phuv, saví Tu dyján Tyré manušénge dre meknó mištypén.

²⁸Ci bokh javéla pe phuv, ci moroskire fránsy javéna, ci xačkirdy balvál javéla, ci rža, ci phakitka skočki, ci kirmo, ci javéna te pritasaven les léskire vérgi pe phuv, saví isyn léskiri, ci javéla saví bída, ci savó nasvalypen,

²⁹to Tu kažno pátieri (molítva), kažno mangipén, savó javéla vari-savé manušéstyr, ci saré Tyré Izrailjoskire manušéndyr, kiéli jone počuinena kažno péskiri bída i péskiro gorjo, i protyrdena péskire vastá ke daja Khangirí,

³⁰Tu vyšún bolybnástyr — Tyré džiibnáskire štetóstyr, i otmek (prostin), i otdé svakoneske (kožnoneske) pir saré léskire dromá, syr Tu džinésa léskiro iló, — pal-dová so Tu džinésa manušéngire-čhavéngiro iló, —

³¹sob (kaj) jone te darén Tútyr i te psirén Tyré droménca dre saré dyvesá, paka jone dživéna pe phuv, saví Tu dyján amaré dadénge.”

³²Ne i manúš javire-rodoskiro, savó isyn na Tyré Izrailjoskire manušéndyr, kiéli jov javéla duratuné phuvjátyr vaš Tyró baró lav, i vaš Tyró vast zoralypnaskiro, i psikó Tyró, so isyn protyrdyno, i javéla i léla te mangélpe dre daja Khangirí:

³³to Tu vyšún bolybnástyr, Tyré džiibnáskire štetóstyr, i ker saró, pal so javéla te risjol ilésa ke Tu javire-rodoskiro manúš, sob (kaj) saré manušá phuvjákire te udžinén Tyró lav, i, sob (kaj) te darén Tútyr, syr Tyré manušá, Izrailjo, i, sob (kaj) džindlé, so Tyré lavésa kharélape davá Kher, savó kerdjom me.

³⁴Kiéli vydžána Tyré manušá pe maribén pe péskire vergénde dromésa, savénge Tu bičhavesa len, i javéna te mangénpe Túke, risjovi ke davá fóro, savó Tu vykedyjan, i ke Khangirí, saví me kerdjom Tyré lavéske,

³⁵to tedy Tu vyšún bolybnástyr léngiri pátieri i léngiro mangipén i ker, so trej vaš lénge.

³⁶Kiéli jone keréna grého angíl Túte, — pal-dová so nane manušés, savó na kerdiá grého, — i Tu rosholiasosa pe lénde, i otdesa len vergoske, i otlydžana len manušá, savé lyné len dro pliéno pe duratuny phuv ci pašatuny,

³⁷i kiéli jone pe phuv, pe saví jone javéna dro pliéno, zadžána dre péste i risjona ilésa, i javéna te mangénpe Túke pe phuv, pe saví jone javéna dro pliéno, rakirí: “Ame kerdiám grého, kerdiám na pir Zakóno, ame bangé sam,

³⁸i risjona ke Tu saré péskire ilésa i saré péskire diésa, pe phuv, pe saví jone javéna dro pliéno, karik otlydžana len dro pliéno, i javéna te mangénpe, risii ke péskiri phuv, saví Tu dyján léngire dadénge, i ke fóro, savó Tu vykedyjan, i ke Khangirí, saví me kerdjom Tyré lavéske, —

³⁹to Tu vyšún bolybnástyr, Tyré džiibnáskire štetóstyr, pátieri (molítva) léngiri i mangipén léngiro, i ker, so trej vaš lénge, i otmek (prostin) Tyré manušénge, dre so jone kerdé grého angíl Túte.

⁴⁰Dévla miro! Mek te javén Tyré jakhá otčhakirde i kaná Tyré otkerde ke pátieri pe davá štéto.

⁴¹I akaná, Rajo Dévla, Dévla, terdjov pe štéto, kaj ramánjo Tyró, Tu i kovčego Tyré zoralypnaske. Rašaja Tyré, Rajo Dévla, mek te ur'jenpe dro zrakhibén, i mek svénta Tyré te čaljon lačhipnása.

⁴²Rajo Dévla! Na otriskir muj Tyré pomakhibnariskiro, rípir tangipén ke Tyró pishári Davído.”