Read Biblija - Pe Baltitko Romani čib (Romanes) 2019 Baltic Romani Bible Jézdra 1 Bible Online

Jézdra 1 - Biblija - Pe Baltitko Romani čib (Romanes) 2019 Baltic Romani Bible bible

Jézdra 1

¹Dro pérvo berš kralískire Kiraskiro, kiéli Jov lyjá te kralinél pe Piérsija, sob (kaj) te spolninélpe lav Ráskire-Devléskiro, savó rakirdiá proróko Jeriemiéie, o Raj-Devél džangadia dúho (fáno) Kiraskiro, Piersijakire kralískiro, i jov dyjá priphenybén te phenén angíl sarénde pir saró kralipén, i adiáke-pac' te začhinen dalé lavá:

²“Adiáke rakiréla Kira, králi Piersijakiro: ‘O Raj Devél, Devél bolybnáskiro, dyjá mánge saré kralipená pe phuv. I Jov priphendiá mánge te čhuvav Kher (Khangirí) Léske dro Jerusalimo, pe Judéia.

³Kon isyn maškír tuménde Léskire manušéndyr, mek te javél Léskiro Devél lésa! Akaná, mek jov te džal dro Jerusalimo, savó isyn pe Judéia, i mek jov te čhuvél Kher (Khangirí) Ráske-Devléske, Savó isyn dro Jerusalimo.

⁴I pe kažno štéto, pir savé dživéna Judy dro pliéno, mek štetytka manušá te pomoginen lénge rupésa, suvnakása, i javire darenca, kheritkoné murdalénca, adiáke-pac' syr i te den svénto dyibén, so kon kaméla, vaš Kher (Khangirí) Devléskiro, savó isyn dro Jerusalimo.’”

⁵Tén'ci šeralé pe stréčy /dadengíre-ródy (pokolienii) Judastyr i Vienjaminostyr, i rašaja, i Lievíty, kažno manúš, dre savénde Devél džangadia dúho (fáno), ĥazdynépe te džán te čhuvén nevés Kher (Khangirí), Ráskire-Devléskiro, savó isyn dro Jerusalimo.

⁶I saré odolé, kon sys pašýl lénde, zorjakirde léngire vastá rupuvé čarenca, priedmietenca (čysénca) suvnakástyr, javire darenca majonkostyr, i kheritkoné murdalénca, i kučipnenca (drogoné priedmietenca), adiáke-pac', syr i saré darenca, so sys jandlo syr svénto dyibén, so kon kamdiá”.”

⁷I králi Kira lydžijá khoré (sasúdy). Kheréstyr (Khangirjátyr) Ráskire-Devleskirestyr, savé o Navuhodonosóro lydžijá krig Jerusalimóstyr i čhudiá dro léskire-devloreskiro kher.

⁸I o Kira, králi Piersijakiro, lydžijá javrí len Mifriedatoskire vastésa, kon sys rakhibnaskiro (xranitieljo) pe piralý (sokroviščo), savó pirigindia len Šešbacaroske, thagariske Judaskireske.

⁹Ake, isyn ginybén, so i kicý sys: trijánda suvnakuné baré čaré, jekh bar (tysjonco) rupuvé baré čaré, biš te jeniá čhurja;

¹⁰trijánda xor tahtaja (čašy) suvnakástyr, štar šelá te deš kadasavé-pac' tahtaja rupéstyr, i bar (tysjonco) javír khoré (sasúdy).

¹¹Sys pandž bará štar šelá khoré (sasúdy) suvnakástyr i rupéstyr. Saré dalé dáry lyjá o Šešbacaro pliennonenca, savén lydžiné Vavilonóstyr ke Jerusalimo.