Read Biblija - Pe Baltitko Romani čib (Romanes) 2019 Baltic Romani Bible Jézdra 4 Bible Online

Jézdra 4 - Biblija - Pe Baltitko Romani čib (Romanes) 2019 Baltic Romani Bible bible

Jézdra 4

¹I šundlé namala Judáskire i Vienjaminoskire, so kodolengire čhavé, kon sys dro pliéno, kerénas Kher (Khangirí) Ráskire-Devléskiro , Devléskire-Izrailjoskiro,

²jone javné ke Zorovavieljo, i ke šeralé pe stréčy/dadengíre-rodengire (pokoliénii) i phendlé lénge: “Lása ame te kerás kher khetané, pal-dová so ame rodasas te das patýv tumaré Devléske, syr i tumé, i ame janasas svénta dyibená Léske Asardanoskire dyveséndyr, kralístyr Sirijakirestyr, savó jandiá amen adarík.”

³Ne Zorovavieljo i Johošuá, i javír šeralé pe stréčy /dadengíre-rodengire (pokolienii) Izrailjoskire, phendlé lénge: “Tuménge nane pričyna, sob (kaj) aménca khetané te kerás Kher (Khangirí) vaš amaré Devléske, ne ame kokoré javésa te kerás kher, Ráske-Devléske, Izrailjoskire Devléske, syr králi Kira, králi Piersijakiro, priphendiá aménge.”

⁴I manušá dolé phuvjákiri starindlepe te otlen zor manušéngire vasténdyr Judejátyr i jone na dénas lénge te kerén Kher (Khangirí);

⁵i jone kinenas sovietniken (junkaren) proti lénde, sob (kaj) te rozmaren lénge léngiro plano dre saré Kiraskire dyvesá Piersijakire kralískire až ke Darijoskire dyvesá, syr jov lyjá te rainel pe Piérsija.

⁶I dro kralipén Ahašvierošoskiro, pe sámo anglypén léskire raipnastyr, jone čhindlé bangiakiribnaskiro lyl pe manušénde Judejátyr i Jerusalimóstyr.

⁷I dre Artaksierksoskire dyvesá čhindlé o Bišlamo, o Mifriedato, o Tabiejélo, i javír léskire malá pir butý lyl Artaksierksoske, kralíske Piersijakireske, i lyl sys čhindló pe Siriicytko (Aramieítko) čib, i pirilydžino pe Siriicytko (Aramieítko) čib.

⁸O Riehumo, kralískiro sovietniko (junkaro) [šeraló-ju.o.], i o Šymšajo, lylá-čhinybnaskiro (pisarjo) manúš čhindlé lyl pe Jerusalimo, kralíske Artaksierksoske, dro savó jone bangiakirde:

⁹Riehumostyr, kralískire šeralestyr, i Šymšajostyr, savó sys lylá-čhinybnaskiro manúš (pisarjostyr), i javire léngire malendyr pir butý: e Dinei, i e Afarsafhiéi, i e Tarpieliei, i e Aparsy, i e Ariehjani, e Vaviloniani, e Susancy, e Dagi, e Jelamitiani;

¹⁰i javire manušéndyr, savén baró i lačhé-rodoskiro Asnafaro jandiá i čhudiá te dživén dre fórja Samarijakire i pe javír štéty dre provincyja pale reka (len') Jefrato, i adiáke duredýr.”

¹¹Ake, isyn lyleskiri kopija, so jone bičhadé léske: “E Kralíske Artaksierksoske — tyré pishar'jéndyr, manušéndyr, savé dživéna dro daja provincyja pale reka (len'), i adiáke duredýr:

¹²Mek te javél džindló kralíske, so Judy, savé javné tútyr ke ame dro Jerusalimo, i savé keréna kadavá buntuítko i bibahtaló fóro, i dokončynena léskire vánty i pirikirena fundámiento.

¹³Mek te javél džindló kralíske, pal-dová so, kóli davá fóro te javél kerdó nevés i te končynen léskire vánty, to tedy jone na javéna te pleskiren ni namirja (podat'), ni myto, ni taksa, i kralískiri piralý javéla tykniakirdy.

¹⁴Akaná, pir-dová so ame xasa lond kralískire baré felatiniatyr/kolovostyr (dvorcostyr), to davá javéla namištes, kóli ame dykhasa, so isyn uriéža vaš kralíske, paldavá ame bičhadiam i dyjam zan (zvies') kralíske;

¹⁵sob (kaj) te rozroden dre tre-dadengíre začhinybnytko lylvarí: sob (kaj) te lathén dre začhinybnytko lylvarí i te udžines, so davá fóro isyn buntuítko, savó kerdiá doš kral'jénge i provincyiénge, i so jone terdjonas proti kral'jénde iščo (inké) dre ĥaratuné beršá, pir dová davá fóro sys phagirdó ke ruíny.

¹⁶Ame dasa zan kralíske, so kóli javéla davá fóro nevés kerdó, i léskire vánty te zakončynen, tedy dová značynelas, so na javéla butýr paš phuvjákiri pe daja rig rekakiri (leniakiri).”

¹⁷O králi bičhadiá otphenybén Riehumoske, kralískire šeraleske i Šymšajoske, lylá-čhinybnaskireske, i javire léngire malenge pir butý, kon dživéla ke Samárija, i pe javír štéty, so isyn pale reka (len'):

¹⁸“Ramánjo pe saré viéki. Lyl, savó bičhadé tumé aménge, gindlé saro, lav pir lav, angíl mánde.

¹⁹I me dyjom priphenybén, i kerdé rodyiben, i lathné, so dro dová fóro ĥaratuné beršéndyr manušá terdjonas proti kral'jénde, ĥazdenas bunty i xolý dre manušénde.

²⁰I odój sys adiáke-pac' králja dre zor pe Jerusalimo, savé xulaindle pir saré provincyi pal Reka, i myto, i namirja, i taksa pleskirde lénge.

²¹Akaná priphenen manušénge te pirijačen te kerén butý, sob (kaj) jone te na dokeren dová fóro angíl dová, syr javéla priphenybén mándyr.

²²Dykhén rakhibnýtkes, sob (kaj) te na denpe dukhá, sóske bibahtiake te javél butedýr te kerél doš kralíske?”

²³I, ake, kiéli lyleskiri kopija, savó čhindiá Artaksiérkso, progindle angíl Riehumoste, Šymšajoste, lylá-čhinybnaskireste, i angíl léngire malende pir butý, jone giné sýges ke Jerusalimo proti Judénde, i zoralé maribnytkoné vastésa terdiakirde léngiri butý.

²⁴Adiáke terdijá butý dro Kher (Khangirí) Devléskiro, Savó isyn dro Jerusalimo i daja butý sys terdy ke javír berš, syr lyjá te kralinél Darijo, králi Piersijakiro.”