Read Biblija - Pe Baltitko Romani čib (Romanes) 2019 Baltic Romani Bible Jézdra 5 Bible Online

Jézdra 5 - Biblija - Pe Baltitko Romani čib (Romanes) 2019 Baltic Romani Bible bible

Jézdra 5

¹Tén'ci proróko Agiéjo (Xagajo), i proróko Zahárija, čhavó Idoskiro, rakirdé Judénge, so javéla angíl Devléskire Izrailjoskire lavéstyr, Savó sys pe lénde.

²I o Zorovavieljo, čhavó Šaltiloskiro, i Johošuá (Isúso), čhavó Jozadakoskiro, giné i lyné te kerén butý pe Kher (Khangirí) Devléskiro, savó isyn dro Jerusalimo, i sys lénca proróki Devléskire, savé pomoginenas lénge.

³Dro do sámo cýro (časo) javné Fafnaje [Tatenajo-ju.o.], themeskiro barydyró pe doiá rig okrugakiri i Šefar-Boznajo, i léngire malá pir butý, i phučnepe léndyr: “Kon priphendiá tuménge te kerén Kher (Khangirí), i te dokončynen dalé vánty?”

⁴Tedy, syr trej, ame phendiam [phuciam-ju.o.] manušéngire lavá, savé kerénas butý pe kher.

⁵Ne jakhá Devléskire sys pe Judéngire phurydyrende, i Piersijakire raja na začhude len te terdiakiren léngiri butý angíl dová, syr réndo javdiá ke Darijo, i tén'či angíl dová, syr jone doresné otphenybén lylesa pe davá réndo

⁶Ake, isyn lyleskiri kopija, savó bičhadé o Fafnajo, themeskiro barydyró pe doiá rig okrugakiri (pašýl Reka Jevfrato), i o Šefar-Boznajo, i léngire malá pir butý, kralíske Darijoske.

⁷Jone bičhadé davá dophenybnytko lyl léske, dro davá lyl jone čhindlé adiáke:

⁸“Te javél ramánjo (miro) Kralíske Darijoske dro saró! Te javél džindló Kralíske, so ame gijam dre okruga Judéia, ke Kher (Khangirí), Baré Devléskiro, savó obkerelape pharé barénca, i kaštuno matierialo čhuvélape dre vánty, i daja butý kerélape kučes, i džála ke mištypén dre léngire vastá.

⁹Tén'ci ame phutiampe kodolé phurydyrendyr, i ame adiáke phendiam lénge: “Kon priphendiá tuménge te kerén davá Kher (Khangirí) i te dokončynen dalé vánty?”

¹⁰Ame adiáke-pac' phuciampe léndyr pal léngire lavá, sob (kaj) aménge te začhinas lavá manušéngire, savé sys barydyrá pe lénde.

¹¹Ake, so jone phendlé dro otphenybén: “Ame sam pishárja Devléskire, Savó isyn pe bolybén i pe phuv, i ame kerása nevés kher, savó čhudé but beršá pale, savó čhudiá baró králi Izrailjoskiro i jov dokončyndia les.

¹²Ne paló dová, syr amaré dadá xoliakirde Devlés bolybnaskires, Jov vydyja len dro Navuhodonosoroskiro vast, savó sys králi Vavilonóskiro, kon rozmardiá pe koterá davá Kher (Khangirí) i lydžijá manušén krig ke Vavilóno.

¹³Ne pe pérvo berš Kiraskiro, kralískiro Vavilonóskiro, o králi Kira dyjá uphenybén te kerél davá Kher (Khangirí) Devléskiro.

¹⁴I adiáke-pac' khoré (sasúdy) suvnakuné i rupuvé kheréstyr Devleskirestyr, savé o Navuhodonosóro lyjá kheréstyr Devleskirestyr, savó sys dro Jerusalimo, i savé jov jandiá dro Vavilóno-kodolé sama khoré o Králi Kira lyjá khangirjátyr dro Vavilóno; i jone sys dyné jekhe manušéske pir lav Šešbacaro, savés králi čhudiá barydyrésa pe doiá okruga.

¹⁵I phendiá králi léske: “Le kadalé khoré, džá i lýdža len dre Khangirí, so isyn dro Jerusalimo, i kerén nevés Kher (Khangirí) Devléskiro pe léskiro štéto.”

¹⁶Tén'ci odová sámo Šešbacaro javdiá i čhudiá fundámiento tel Kher (Khangirí) Devléskiro, savó isyn dro Jerusalimo; i dolé poratyr ke akaná keréna Kher (Khangirí) Devléskiro, i jov nane iščo (inké) dokončyndlo.”

¹⁷I akaná paldavá, kóli davá te javél mištó vaš kralíske, mek te rodén dre piralý, saví isyn dro kralískiro kher, odój dro Vavilóno, ci davá isyn čačó, so o králi Kira priphendiá te kerén davá Kher (Khangirí) Devléskiro ke Jerusalimo, i, kóli te javél lačhó kralíske, te bičhavel Léskiro lav aménge pal davá réndo.