Read Biblija - Pe Baltitko Romani čib (Romanes) 2019 Baltic Romani Bible Jézdra 7 Bible Online

Jézdra 7 - Biblija - Pe Baltitko Romani čib (Romanes) 2019 Baltic Romani Bible bible

Jézdra 7

¹Akaná, paló (poslie) vari-kicý beršá, syr davá kerdiápe, kiéli kralindia Artaksiérkso, králi Piersijakiro, o Jézdra, čhavó Seraijaskiro, čhavó Azarijaskiro, čhavó Xielkijakiro,

²čhavó Šalumoskiro, čhavó Sadokoskiro, čhavó Ahituvoskiro,

³čhavó Amarijaskiro, čhavó Azarijaskiro, čhavó Marajofoskiro,

⁴čhavó Zaharijaskiro, čhavó Uzijaskiro, čhavó Bukijoskiro,

⁵čhavó Abišujoskiro, čhavó Finiehasoskiro, čhavó Jelizaroskiro, čhavó Aronoskiro, kon sys barydyr rašáj

⁶dová sámo Jézdra gijá Vavilonóstyr. Jov sys sykliakirdo syr lylvarítko pir Mojzáskiro Zakóno, savó Raj Devél Izrailjoskiro dyjá. O králi dyjá saró léske, so jov mangdiá, pir dová, so Ráskire-Devléskiro vast sys pe léste.

⁷I giné lésa vari-savé čhavé Izrailjoskire, i rašaja, i Lievíty, i bagaibnaskire, i stregarja paš-vudarengire, i Niefiniéi dro Jerusalimo dre eftáto berš, syr kralindia Artaksiérkso.

⁸I o Jézdra javdiá dro Jerusalimo dro pándžto čhon, dro eftáto (bitrinéngiro deš) berš kralískiro.

⁹Pal-dová so jov dyjape dro drom Vavilonóstyr pe pérvo dyvés dro pándžto čhon, i jov javdiá dro Jerusalimo pe pérvo dyvés pe pérvo čhon, pir dová so lačhó vast Devléskiro sys pe léste.

¹⁰Pal-dová so o Jézdra riskirdiá péskiro iló te sykljol Zakóno Devléskiro, i te rikirelpe ke Zakóno, te sykliakirél dro Izrailjo.

¹¹Davá isyn kopija lyleskiri, savó dyjá králi Artaksiérkso Jezdraske, rašáske, kon sys lylvarítko, kon sykliakirdiá lavenge Ráskire-Devléskire priphenybendyr (zapoviédiendyr) i léskire zakonendyr dro Izrailjo:

¹²“Artaksierksostyr, savó isyn králi kral'jéndyr, Jezdraske rašáske, savó isyn lylvarítko pir Zakóno Devléskire bolybnáskiro: ramánjo (miro) tuménge akaná.

¹³Me priphenava, sob (kaj) saré odolé, savé isyn manušá Izrailjoskire, i rašaja, i Lievíty dro miro kralítko them, kon kaméla pir péskiri vólia te džal dro Jerusalimo, -mek jone te džán túsa.

¹⁴I pal-dová, so tut bičhavéla králi i léskire eftá soviétniki (junkary), sob (kaj) te rosphučen pal réndy dre Judéia i dro Jerusalimo pir tyré Devléskiro Zakóno, saví kopija isyn dro tyró vast;

¹⁵i sob (kaj) te janes rup i suvnakái, savé o králi i léskire junkary dyné péskire iléstyr Devléske Izrailjoskireske, Saveskiro kher isyn ke Jerusalimo;

¹⁶i saró rup, i suvnakái, so tumé moginéna te lathén dre okruga Vavilonoskiri, na giný svénta dyibená, savé dyné péskire iléstyr e manušá, i rašaja, kon janéla péskire iléstyr vaš Kher (Khangirí) léngire Devléskiro ke Jerusalimo,

¹⁷akaná paldavá kin sýges pe dalé lové guruvén, bakrén i bakrorén khetané léngire sventoné dyibnasa givestyr i léngire thadune sventoné dyibnasa, i jan len pe altárjo dro Kher (Khangirí) tumaré Devléskiro ke Jerusalimo.

¹⁸I so javéla lačhés pir tyrí godý i tyré-pšaleskiri te kerén odolé rupésa i suvnakása, so jačélape, kerén pir vólia tumaré Devléskiri.

¹⁹I khoré (sasúdy), so dyné túke, sob (kaj) lénca te dynarinén dro Kher (Khangirí) Devléskiro, jan angíl Devléste Jerusalimoskireste.

²⁰I dová javír, so javéla trej vaš Kher (Khangirí) tyré Devléskiro, i so tu janesa pir Péskiri godý, otdé/pleskir piraliatyr dro kher Kralískiro.

²¹I me, králi Artaksiérkso, akaná davá priphenybén saré rakhibnaskirenge pe piralý, savé isyn pale reka (len'), so kóli Jezdraske, kon isyn rašáj i lylvarítko pir Zakóno Devléskiro, Savó isyn pe bolybén, javéla vari-so trej, sob (kaj) te den léske saró,

²²ke jekh šel talánty rup, ke jekh šel miéry parnó giv ke jekh šel baty mol (vino), ke jekh šel baty olivítko dzet, i lond bi mierakiro.

²³So te na priphenel Devél bolybnáskiro, sob (kaj) te kerén syr trej vaš Kher (Khangirí) Devléskiro, Savó isyn pe bolybén. Vaš odová, sob (kaj) te na javél Léskiri bari xolý pe kralískiri them, i léskire čhavénde.

²⁴Adiáke-pac' ame phenása tuménge, so davá javéla na pir zakóno te začhuven te pleskiren namirja, myto i taksa rašán, Lievitén, bagaibnaskiren, stregar'jén pašvudarengiren, Niefiniején, ci vari-savé dynar'jén dro Kher (Khangirí) Devléskiro.

²⁵I tu, Jézdra, pir godypén, so Devél dyjá túke, čhuv dre zor barydyrén [baré sendar'jén-ju.o.], sendar'jén, savé moginénas te sendiakiren pir čačipén saré manušén, kon isyn dre okruga pale reka (len'), sarén kadasaven, kon džinéla zakóny tumaré Devléskire, i sykliakirén odolén, savé na džinéna len.

²⁶Kóli vari-kon na javéla te kerél saró pir Zakóno tumaré Devléskiro, i pir zakóno kralískiro, mek te sendiakiren pharés les, ci pe meribén, ci te tradén les javrí themestyr (stranatyr), ci pe konfiskacyja majonkoske, ci dro štaribén.”

²⁷“Mek te javél bahtiakirdó Raj Devél, Devél amaré-dadéngiro, Savó čhudiá kadasavi duma dro kralískiro iló, sob (kaj) te šukarjakiren Kher (Khangirí) Ráskire-Devléskiro, savó isyn ke Jerusalimo;

²⁸I Savó riskirdiá lačhé-ilýtkima ke me angíl kralíste i léskire sovietnikende (junkarende), i angíl zor thagar'jénde kralískire. I me, Jézdra, jacjom zoraledýr dro dúho (fáno), adiáke syr vast Ráskire-Devléskiro, miré Devléskiro sys pe mánde, i me skedyjom saré Izrailjoskire šeralé muršén, sob (kaj) jone te džán mánca.”