Read Biblija - Pe Baltitko Romani čib (Romanes) 2019 Baltic Romani Bible Jézdra 8 Bible Online

Jézdra 8 - Biblija - Pe Baltitko Romani čib (Romanes) 2019 Baltic Romani Bible bible

Jézdra 8

¹Ake, i syn šeralé pe stréčy /léngire-dadengíre ródy (pokolienii), i, ake, isyn začhinyben pal ródo dre rodengiri matrija (lylvarí pal ródo) pal kodolende, kon gijá mánca Vavilonóstyr, kiéli kralindia o králi Artaksiérkso:

²o Girsono [Gierša-ju.o.], Finhasoskire čhavéndyr; o Danijéljo, Ifamaroskire čhavéndyr, o Xatušo, Davidóskire čhavéndyr;

³o Zahárija, Šehanijaskire, Parošoskire čhavéndyr, i lésa sys šel te pandždešá muršá, savé sys začhindlé dre rodengiri matrija;

⁴o El'jegoenajo, čhavó Zerahiiaskiro, Pahav-Moavengire čhavéndyr, i lésa sys duj šelá muršá;

⁵o čhavó Jahaziiloskiro, Šeha-nijaskiro čhavéndyr, i lésa sys trin šelá muršá;

⁶o Jeviédo, čhavó Ionafanoskiro, Adinoskire čhavéndyr, i lésa sys pandždešá muršá;

⁷o Iiešaija, čhavó Afalijaskiro, Jelamoskire čhavéndyr i lésa sys eftadešá muršá;

⁸Zevadeja, čhavó Mihailoskiro, Šefatijaskire čhavéndyr, i lésa sys ohtodešá muršá;

⁹o Ovadija, čhavó Jehiieljoskiro, Iavoskire čhavéndyr, i lésa sys dujšelá te dešuohto muršá;

¹⁰o čhavó Šelomifoskiro, čhavó Jozafajoskiro, i lésa sys šel te ohtodešá muršá;

¹¹o Zahárija, čhavó Bievajoskiro, Biebajoskire čhavéndyr, i lésa sys beš te ohtó muršá;

¹²o Iohanano, čhavó Gakatanoskiro, Azgadoskire čhavéndyr, i lésa sys šel te deš muršá;

¹³Adonikamoskire čhavéndyr — palatuné, koneskire lavá isyn: o Jelifieliéto, o Iieiljo, i o Šemaja — i lénca sys šovdešá muršá;

¹⁴Bigvajoskire, Ufajoskire, i Zabudoskire čhavéndyr, i lénca sys eftadešá muršá:

¹⁵I me, Jézdra, skedyjom len khetané pašýl reka (len'), saví thadéla dre Agava; i odój ame rosčhudiam taboro (lod) pe trin dyvesá: i me obdykhcjom saré manušén i rašán, i me na lathjom nijekhes Lievijoskire čhavéndyr.

¹⁶Tén'ci me bičhadjom, sob (kaj) te kharén Jeliezeros, Arieljos, Šemajas, Binafanos, Jarivos, Elnafanos, Nafanos, Zaharijas, i Miešulamos, savé sys šeralé manušá; i te kharén Ioiarifos, i Elnafanos, savé sys baré-godiakire manušá.

¹⁷I me bičhadjom len miré lavésa ke Ido, savó sys šeraló pir štéto Kasifija, i me phendjom lénge, so te phenén Idoske, i léskire pšalénge Niefiniejénge pe štéto Kasifija, sob (kaj) jone te janén pomogibnaskiren rašaskiren te dynarinén dro Kher (Khangirí), amaró Devléskiro.

¹⁸Adiáke, syr amaré-Devléskiro lačhó vast sys pe aménde, to jone jandlé aménge baré — godiakire manušés Mahlijaskire čhavéndyr, čhavés Lievijaskires, čhavés Izrailjoskires pir lav Šeriévija; i léskire čhavénca, i léskire pšalénca, dešuohto manušá;

¹⁹i Xašavijas, i lésa Iiešaijas, Merariskire čhavéndyr, léskire pšalén i léskire čhavén, biš manušá;

²⁰i adiáke-pac' Niefiniejéndyr, konés o Davído i šeralé čhudé dre zor te dynarinén (te služynen) Lieviténge, duj šelá te biš Niefiniéi: kažno manúš léndyr sys vykhardo pir lav.

²¹I phendjom me zoralés angíl manušénde, sob (kaj) te postinas pašýl reka (len') Agava, sob (kaj) te tykniakiras pes dre amaré ile angíl amaré Devléste, te vymangas Léstyr bahtaló drom aménge i amaré tyknenge, i vaš saró amaró mištypén.

²²Pal-dová so me ladžandyjom te mangav kralístyr stréga xaladendyr i uklistengire ruldéndyr te rakhén amen dromésa proti vergénde, pal-dová so ame phendiam kralíske, rakirí: “Amaré-Devléskiro vast isyn vaš lačhipén sarengiro, kon rodéla Les, ne Léskiri zor i Léskiro mižehipen peréna pe odolénde, savé mekéna Les.”

²³I ame postindiam i ame mangdiam Les, i Jov otphendiá pe amaró mangipén.

²⁴I me vykedyjom dešudujen barydyrén pe rašande Šerievijas, i Xašavijas, i deš pšalén lengiren —

²⁵i me ubladjom (otvažyndjom) lénge rup, suvnakái, i xor khoré (sasúdy), svénta dyibená vaš Kher (Khangirí) Devléskiro, so jandlé králi, i léskire junkary (sovietniki), i léskire thagárja (kniázi), i saré manušá Izrailjostyr, kon sys.

²⁶I me ubladjom dre léngire vastá šov šelá te pandždešá talánty rup, rupuvé khoré (sasúdy), savé važyndle šel talánty, jékh talanto suvnakái,

²⁷biš suvnakuné xor tahtaja (čašy), so sys mol jekh bar drahmy, duj khoré šukarone xarkomátyr, saví xačolas, i sys drógo syr suvnakái.

²⁸I me phendjom lénge: “Tumé san vysvencyndle Ráske-Devléske; i khoré adiáke-pac' isyn obsvencyndle; i rup i suvnakái, so jandlé iléstyr Ráske-Devléske, Devléske tumaré dadengireske.

²⁹Dykhén ciamkes (duje jakhénca) i rakhén len angíl dová, syr tumé ublavena (otvažynena) len angíl šeralende rašangirende, Lievitende, i angíl šeralende pe stréčy /tumaré-dadengíre ródy (pokolienii) Izrailjostyr dro Jerusalimo, dre piralýtka komóry dro Kher (Khangirí) Ráskire-Devléskiro.”

³⁰I rašaja i Lievíty doresné rup, suvnakái, i khoré pir ublaiben, sob (kaj) te janén len ke Jerusalimo dre amaré Devléskiro Kher (Khangirí).

³¹Tén'ci ame dyjampe dro drom rekátyr (leniátyr) Agavatyr pe dešudujto dyvés dro pérvo čhon, te džas pe Jerusalimo. I sys vast Devléskiro pe aménde, i Jov zrakhelas amen vergoskire vastéstyr, i kadasavé manušéndyr, savé podrakhenas te zamarén pe drom.

³²I ame javdiám dro Jerusalimo i jaciampe odój trin dyvesá.

³³I pe štárto dyvés rup, suvnakái, i khoré (sasúdy) sys ublade pe ubladýtka (viesy) Mieriemofoskire vastésa, kon sys čhavó rašaskire-Urijaskiro; i sys lésa Jelizáro (Jelieazaro), čhavó Finiehasoskiro, i sys lénca Lievíty: Jozavado, čhavó Jošuaskiro, Noadija, čhavó Vinujoskiro;

³⁴Saró sys pirigindlo, piriublado, i saró pharipén (viéso) dre talánty sys začhindló pe štéto adái.

³⁵E čhavé kodolengire, koneskiren daden lydžiné dro pliéno, savé javné plienóstyr, jandlé céla shačkiribnaskire svénta dyibená Izrailjoskire Devléske: dešudúj guruvén pal saró Izrailjo, jeniá deša šov bakré, eftadešá eftá bakrore i dešudúj buzne (kozly) syr svénto dyibén pal grého. Saró davá sys celones te xačkirén syr svénto dyibén Ráske-Devléske.

³⁶I jone podyne kralískire priphenybená kralískire baredyrenge dre okruga, i šeralé range dre doiá phuv, so isyn pe daja rig rekakiri (leniakiri). I jone kerdé patýv manušénge i Kheréske (Khangirjake) Devleskireske.