Read Biblija - Pe Baltitko Romani čib (Romanes) 2019 Baltic Romani Bible Nijemíia 5 Bible Online

Nijemíia 5 - Biblija - Pe Baltitko Romani čib (Romanes) 2019 Baltic Romani Bible bible

Nijemíia 5

¹I kerdiápe bari gódla maškír manušénde, i e džuvliende léskire pe da péskire pšalénde Judeiende.

²Sys adasavé, savé rakirénas: “Amen, o čhavén amaren, i čhajén isyn but; i ame kamasas te doresas maró, i te čaliakiraspe i te dživás.

³Sys i kadasavé, savé rakirénas: “E féldy amaré, vinagradniki amaré, kherá amaré, ame dasas dro symadý (zalogo), sob (kaj) te uhtylas maró bokhátyr.”

⁴Sys i kadasavé, savé rakirénas: “Ame zalasam e rup dro dyibén, kralíske tel sumady pe amaré féldy i pe amaré vinagradniki;

⁵aménde isyn dasavé-pac' masá, savé masá isyn amaré pšalénde, i o čhavé amaré isyn kadasavé-pac', syr léngire čhavé isyn; ake, ame sam bangé te otdas amaren čhavén i amaren čhajén dre pishar'jende, i adákicy amaré čhajendyr uže isyn dre pisharima. Nane nisave lové te vykinen len dre amaré vastá; i féldy amaré i vinagradniki amaré isyn javirende.”

⁶Kiéli me šundjom léngiro godlytko rakiribén i dasavé lavá, me drieván xoliasyjom.

⁷Miro iló ĥazdyjápe xoliása, i me nartes (šylales) vyphendjom lačhé-rodoskirenge i barydyrénge, i phendjom lénge: “Tumé léna drieván but načačuno kófo tumaré pšaléndyr.” I khardjom me pe lénde baró skedyibén.

⁸I phendjom lénge: “Ame vykindiam amaré pšalén, Judejaskiren, savé sys bikindle narodenge, kicý aménde sys zor, a tumé, xači, biknena tumaré pšalén, i jone biknenape aménge?” Jone cytjonas (mol(ŭ)čynenas) i na lathné otphenybén.

⁹I me phendjom: “Našukar tumé adiáke keréna. Naúšto na dre dar Devléskire amareskiri tuménge trej te psirén, sob (kaj) te obdžan napatyv narodendyr, amaré vergéndyr:

¹⁰I me adiáke-pac', o pšála miré i dynárja, pašýl mánde dénas lénge dro vužlypén i rup i maró; jačkirasam lénge dlugo dasavo.

¹¹Otdén pale lénge akaná léngire féldy, vinagradýtka i maslinitka unty (sady) léngire, i načačuno kófo moliátyr i olivitkone dzetestyr (jeliejo), pal savénde tumé dyné lénge dro dlugo.”

¹²I jone phendlé: “Otdasas pale i na lása léndyr te vytyrdas; i kerasam adiáke, syr tu rakirdian.” I me khardjom rašán, i phendjom lénge te den sovlahá, so jone adiáke kerna.

¹³I trinskirdjom me miro uribén i phendjom: “Mek te vytrinskirel o Devél kažnoné manušés, savó na zrikirla davá lav, — léskire kheréstyr i léskire fielatiniatyr, i te javél léste vytrinskirdo i čhučó!” I saró skedyibén phendiá: “Amín'.” I šardiam ame Devlés; i o narodo zrikirdia davá lav.

¹⁴Iščo (inké): dolé dyveséstyr, syr sómas me bičhadó syr barydyró léngiro pe okruga pe Judýtko phuv, bištone beršestyr ke/žýko trijánda javír berš ke králi Artaksierkso, saré dešudúj berš i me, i miré pšála na xajam maró barydyreskiro pe daja okruga.

¹⁵Javír barydyrá okrugakire, savé sys vagedyr (ĥaredyr) mándyr, pharjakirde o narodo, i lenas léndyr maró i mol (vino), apríč štardešá šékieli rupuvé; iščo (inké) e dynárja léngire xulaindle pe manušénde. Me-da na keravas adiáke piró dar Devléstyr.

¹⁶Adiáke-pac' butiá pe daja vánta me podrikiravas; i féldy ame na zakindiamas, i saré miré dynárja skedenaspe odorík pe butý.

¹⁷O Judejakiren i barydyrén sys pir šel i pandždešá pal miro skamínd, i iščo (inké) javénas ke ame truialytkone narodendyr.

¹⁸Ake, so sys kerado pe jekh dyvés: jekh guruv, šov vykedyme bakré i čirikliá keradjonas mánde; i dre deš dyvesá but sys piny mol (vino) vari-saví. Ne na dykhí pe davá, me na mangavas maró barydyreskiro pe okruga, adiáke syr pharó dynaribén sys paštó pe davá narodo.

¹⁹Rípir, miro Dévla, dro lačhipén mánge saró, so me kerdjom vaš dalé manušénge (narodoske)!