Read Biblija - Pe Baltitko Romani čib (Romanes) 2019 Baltic Romani Bible Nijemíia 9 Bible Online

Nijemíia 9 - Biblija - Pe Baltitko Romani čib (Romanes) 2019 Baltic Romani Bible bible

Nijemíia 9

¹Pe biš te štárto dyvés dro davá čhon skedynépe saré čhavé Izrailjoskire, savé postynena dre balýtka goné (pieplosa) pe šeró.

²Siemjo (ródo) Izrailjoskiro gijá dre rig (uladyjape/otdielindiape) saréndyr javirendyr i uštyné jone i mangné te otmeken gréhi pal gréhi péskire i péskire dadengíre.

³I jone sys terdé pe péskire štéty i štárto častyr (čas') dyvesýtko gindlé Devléskiro lav i mangné te otmeken gréhi štárto častyr (čas') manušéndyr i mangnepe Devléske.

⁴Terdiné upré pe Lievitengiro štéto: Isúso (Johošuá), Vaneja[2], Kadmiilo, Ševanija, Vunijo, Šerievija, Vanija, Xenani, i zoralés mangnepe ke Raj Devél, léngiro Devél.

⁵Lievíty phendlé: “Isúso (Johošuá), Kadmiilo, Vaneja, Xašavnija, Šerievija, Godija, Ševanija, Pietahiia: “Uštén i barjakirén Ras-Devlés, Devlés tumares pe saré beršá.

⁶Tu, Rajo Dévla, san Jekh, Tu sozdyjan bolybén, bolybén pe bolybén i xaladén lengiren, phuv i saró, so isyn pe láte, mórjo (derjáv) i saró, so isyn dre léste, i Tu désa džiibén daleske sareske i bolybnýtka xaladybena déna patýv Túke.

⁷Tu Kokoró, Rajo Dévla, vykedyjan Avraamos, vylydžijan les Urostyr Xaldiejengirendyr i dyján léske lav Avraámo,

⁸i Tu ĥalyjan les čačunesa angíl Péste i dyján léske zavieto, sob (kaj) te des léskire čhavénge phuv Xananiejengiri, Xietiejengiri, Amoriejengiri, Fierieziejengiri, Jevusiejengiri, Giergiesiejengiri. I Tu kerdián pir Péskiro lav, pal-dová so Tu san čačunó.

⁹Tu dykhcián bída amaré-dadengiri dro Jegípto, i Tu šundián léngiri godlyma pašýl Loló mórjo (derjáv).

¹⁰Tu kerdián znamiénii (ĥiertyká) i dívy angíl faraonoste i angíl sarénde peskirende pishar'jende, i angíl saró léskiro narodo, pal-dová so Tu džindian, so jone kerdé nakuč lénca i kerdián péske malva ke adadyvesatuno dyvés.

¹¹Tu rostyrdyjan angíl lénde mórjo (derjáv) i jone maškír paní giné, syr pir šukí phuv, i odolén, kon tradyjape pal lénde, Tu tasadiakirdian len syr bar dre baré paniá.

¹²Dro stýlbo oblokengiro Tu lydžijan len-dyvesé i dro stýlbo jagalo — ratý, sob (kaj) te pir léngiro drom te javél bitialo.

¹³Tu javdián pe bérga Sinajo i rakirdian lénca bolybnástyr i dyján lénge čačuné sendy, patiaibnytka zakóny, lačhé uphenybená i priphenybená.

¹⁴Phendián lénge pal svénto Tyró sávato, i priphenybená, i uphenybén i sendy piridyjan lénge pir Péskire pishariste, Mojzaste.

¹⁵Tu dyján lénge maró bolybnástyr, syr jone sys bokhalé, i paní barestyr Tu dyján, kiéli jone kamlé te p'jen, i phendián lénge, sob (kaj) jone te džán, i te len phuv, pal saví Tu sovlahadian lénge te des, syr Tu ĥazdyjan vast Péskiro.

¹⁶Ne jone i dadá amaré sys nahrata i rikirde péskiri men vučés, i na šundlé Tyré priphenybená.

¹⁷Jone na zakamle te poddenpe, na priripirde dívy tyré, savé tu kerdián lénca, i rikirde men upré i pir péskiri vólia pale čhudé angíl péste šerales, sob (kaj) te javén pishar'jénca. Ne Tu, san Dévla, Savó vykedéla te otmekél gréhi, Savó dlenges vyrikiréla, i Tu na jačkirdian len.

¹⁸Na dykhí, so jone kerdé péske suvnakunó vyčhudo guruvoro i phendlé: “Davá isyn amaró devel, savó vylydžijá tut Jegiptóstyr, i na dykhí, so jone kerdé baró obrakiriben.

¹⁹Ne Tu pir Péskiri láska na čhurdyjam len pe čhučí phuv, stýlbo oblokengiro na gijá kig léndyr dyvesé, sob (kaj) te lydžál len pir drom i stýlbo látyr, savó lydžijá len ratý, sob (kaj) lénge te javél bicialó, pir savó drom te džán.

²⁰I Tu dyján lénge Péskiro lačhó Dúho, sob (kaj) te sykliakires len i mana péskiri na otlesas léngire móstyr i paní dyján lénge te p'jen.

²¹Štardešá berš Tu dyján lénge te xas pe čhučí phuv, jone ni dro so na maindle trébima; ídia léngiri na phurija, i ĥerá na šulyne.

²²I Tu dyján lénge kralipená i narody i rosčhudian len pe pašá i phuv Sigonoskiri jaciá léngiri, i phuv Jesievoneskiri, i phuv Ogoskiri, kralískire Vasanoskiri.

²³Čhavén lengiren Tu ubarjakirdian pe but syr čergeniá pe bolybén i lydžijan len pe phuv, pal saví Tu rakirdian léngire dadénge, so joj iavéla léngiri.

²⁴I zaginé čhavé léngire i phuv jaciá léngiri. Tu otdyjan Xananiejengire manušén lénge dre vastá i králja léngire jačné tyré i manušén, sob (kaj) jone te kerén lénca, so zakamena.

²⁵I zalyne jone zoralé fórja i lačhí phuv i lyné jone péske kherá saré barvalypnasa, kolbáni (vodojomy), savé sys barestyr, vinagradýtka i maslinitka unty (sady) i but drevy plodenca vaš xabén. Jone xané, čalyne, thulyne i koštyndle pir Tyrí láska.

²⁶I kerdépe jone nahrata (upriama), i na lyné te kutiakiren Tut i jačkirdé Zakóno, zamardé prorokén, savé dénas lénge godý te patias dre Túte, i kerdé baré kaliakiribena.

²⁷Tu otdyjan len léngire vergénge, savé pritasavenas len. Ne, syr dro pharó časo, jone khardé Tut, Tu šundián len bolybnástyr, pir Péskiri láska Tu desas lénge zrakhibnaskiren, i jone zrakhenas len vergéndyr.

²⁸Syr saró sys kuč i štyl, nevés jone lenaspe pal nalačhipen, i Tu otdesas len vergénge dre vastá i vérgi sys xulaja pe lénde. Ne syr jone nevés khardé tut, Tu šundián len i bronindian len (zaterdijan pal lénde) but móly pir Tyrí lačhé-ilýtkima.

²⁹Tu priripiresas lénge te dživén pir Zakóno, ne jone na lydžiné péskiro džiibén adiáke, i na šundlé Tyré priphenybená i giné na dolé dromésa, syr Tyró statúto (ustavo) rakirdiá, savénca te javél džidó manúš, kóli kerdiá by pir statúto (ustavo), i dumo péskiro kerdé tvardo i men péskiri rikirde vučés i na kandenas Tut.

³⁰Užakiri léngiro risiben ke Tu, Tu učhakirdian but bérgi i priripiresas lénge Péskire Duhósa pir prorokénde, ne jone na šundlé. I tu piridyjan len te vastá javire narodenge.

³¹Ne, pir Péskiri lačhé-ilýtkima Tu na zamardian len ke kónco, i na mekcian len, pal-dová so Tu san Devél lačhó i lačhé-dieskiro.

³²Akaná, amaró Dévla, Dévla baró, Savó isyn, zoraló, trašalo, Savó rakhéla Zavieto i láska! Mek te na javél nabaripnasa sarí men'ka, saví kerdiápe aménca, amaré kral'jenca, thagar'jenca amarenca, rašanca amarenca, prorokenca amarenca i amaré dadénca i saró narodo tyró, dyveséndyr Asirijakir kral'jendyr ke adadyvesatuno dyvés.

³³Dro saró, so aménca kerdiápe, Tu san čačuno (pravo), pal-dová so Tu kerden pir čačipén i ame sam bangé.

³⁴Amaré králja, thagárja amaré, rašaja i dadá amaré na dživdé pir Zakóno i na šundlé Tyré priphenybená i priripiribena Tyré.

³⁵I dro léskiro kralipén jone na dynarindlé Túke, pir Tyró baró lačhipén, savó Tu dyján lénge, i pe buĥly i thuly phuv, saví Tu otkedyjan vaš lénge, i jone na risjonas péskire fujé rendéndyr.

³⁶I, ake, ame sam pishárja akaná, pe daja phuv, saví Tu dyján amaré dadénge, sob (kaj) te xas lákire barjakirdé (plódy), i te čaravaspe lákire lačhipnása, ake, ame sam pishárja pe daja phuv.

³⁷I lákire barjakirdé joj déla buté kral'jenge, pir savénde Tu lyjan zor pe aménde pal gréhi amaré. I jone rikirna zor pe amaré masá i pe amaré kheritkoné murdalénde (skoto) pir péskiro iló, i ame sam pritasade.

³⁸I pir saró davá ame dasa zoraló otphenybnytko lav, i podčhinasa, i pe davá podčhinyben javéla čergen amaré thagar'jendyr, i amaré Lievitendyr, i amaré rašandyr.”