Read Biblija - Pe Baltitko Romani čib (Romanes) 2019 Baltic Romani Bible Ester 5 Bible Online

Ester 5 - Biblija - Pe Baltitko Romani čib (Romanes) 2019 Baltic Romani Bible bible

Ester 5

¹Pe tríto dyvés Estéra uridiape dre kralítko ídia, i terdijá joj pe andratuné kralískire-kheréskiri gréda, angíl kralískiro kher; králi tedy sys beštó pe péskire-kralískiro trono, dro kralískiro kher, mamúj (proti) dro zagiibén dro kher. Kiéli králi dykhciá králica Estéra, saví sys terdy pe gréda; joj lathiá tangipén (žalima) dre léskire jakhá.

²I protyrdyjá králi ke Estéra suvnakunó destó, savó sys dre léskire vastá, i podgíia Estéra, i lyjape pal destoskiro jagóro (konco).

³I phendiá láke králi: “So túke trej, králica Estere, i savó isyn mangipén tyró? Až ke paš miré kralipnastyr javéla dynó túke.”

⁴I phendiá Estéra: “Kóli kralíske javéla pir iló, mek te javél králi Amanosa adadyvés pe svénko, savó me kerdjom léske.”

⁵I phendiá králi: “Džán sygedýr pal Amanoste, sob (kaj) te kerén pir Esterakiro lav.” I javdiá králi Amanosa pe svénko, savó kerdiá Estéra.

⁶I phendiá králi Esterake, syr jone piné mol (vino): “So javéla pir iló túke? Jov javéla spolnindlo; i savó isyn tyró mangipén? Mek ke paš kralipén, joj iavéla spolnindlo.”

⁷I otphendiá Estéra, i phendiá: “Ĥáda, isyn pe iló mánde i miro mangipén:

⁸kóli me lathjom láska dre kralískire jakhá, i kóli javéla pir iló kralíske, sob (kaj) te spolnines pir iló mánge i miro mangipén, tedy mek králi Amanosa te javén pe svénko, savó me keráva vaš lénge, i atasiá me spolninava lav kralískiro.”

⁹I vygijá Amáno dre dová dyvés lošalo (viesjolo) i lačh-dieskiro. Ne kiéli dykhciá Amáno Mardohiejos pašýl kralískire vudará, i odová na uštyjá, i štetóstyr na ĥazdyjápe angíl léste, tedy pherdija Amáno baré xoliása pe Mardohiejoste.

¹⁰Ne Amáno zrikirdiape. A kiedy javdiá dre péskiro kher, tedy bičhadiá te kharén peskiren malen, i peskirjá romniá Zereša.

¹¹I rosphendiá lénge Amáno pal drieván baró péskiro barvalypén, i pal drieván but péskire čhavénde, i pal saró dová, syr les králi ĥazdyjá vučés i syr čhudiá les pe theméskire rande i butiarnende kraliskirende.

¹²I phendiá Amáno: “I králica Estéra nikonés na khardiá kralísa pe svénko, savó joj kerdiá, apríč mánde; adiáke i pe atasiá me som khardo ke joj kralísa.

¹³Ne saró davá na uhtýlla vaš mánge, paka me dykháva Mardohiejos, Judos, bešyndoj pašýl kralískire vudará.”

¹⁴I phendiá léske Zereš, léskiri romný, i saré léskire malá: “Mek te kerén vešyna (kašt) vučipnása dre pandždešá kuniá (lokti), i pe zlóko (ránko) phen kralíske, sob (kaj) te ublaven Mardohiejos pe léste: i tedy lošales džá pe svénko kralísa.” I sys pir iló davá lav Amanoske, i jov kerdiá vešyna.