Read Biblija - Pe Baltitko Romani čib (Romanes) 2019 Baltic Romani Bible Ester 6 Bible Online

Ester 6 - Biblija - Pe Baltitko Romani čib (Romanes) 2019 Baltic Romani Bible bible

Ester 6

¹Dre doiá rat kralíske na sovelaspe, i jov phendiá te janén dyvesengire-začhinybnaskiri lylvarí vaš ripiribén; i gindlé la angíl kralíste.

²I lathno sys, so sys čhindló odój, syr dophendia Mardohiéjo pe Gavafoste (Bigtenoste) i Faraste (Terešoste), dujénde kralískire jevnuhende, savé rakhne progo, savé zadumindle te čhuvén vast pe kralíste Artaksierksoste.

³I phendiá králi: “Saví dyné patýv i sláva Mardohiejoske pal davá?” I phendlé terné manušá kralískire, savé sys butiarné pašýl léste: “Nisó na sys kerdó léske.”

⁴I phendiá králi: “Kon isyn pe gréda (dvóro)?” Amáno tedy javdiá pe andratuné kralískire-kheréskiri gréda te rakirél kralísa, sob (kaj) te ublaven Mardohiejos pe vešyna, savó jov prigotovindia vaš léske.

⁵I phendlé terné manušá kralíske: “Ĥáda, Amáno isyn terdó pe gréda.” I phendiá králi: “Mek jov te zadžál.”

⁶I zagijá Amáno. I phendiá léske králi: “So trej te kerén odolé manušéske, savés králi drieván kaméla te patyvakires slavása?” Amáno podumindia dre péskiro iló: “Konéske ž javireske zakaméla králi te kerél sláva, apríč mánde?”

⁷I phendiá Amáno kralíske: “Kodoléske manušéske, savés králi kamel te patyvakirel slavása,

⁸mek léske te janén kralískiri ídia, dre saví ur'jelape králi, i janéna gres, pe savéste tradéla králi, te čhuvén kralískiri koróna pe greskiro šeró,

⁹i mek te poden ídia i gres dre vastá jekhe anglatuné-kralískire thagar'jéndyr, i ur'jena odolés manušés, savés králi kaméla te patyvakirel slavása, i vylydžan les pe greste pe foritko gásy [peforuný (plóšča)-r.s.], i phenéna angíl léste: adiáke keréna kodolé manušéske, savés králi kaméla te patyvakirel slavása!”

¹⁰I phendiá králi Amanoske: “Dro davá-pac' momiénto le ídia i gres, syr tu phendián, i ker davá Mardohiejoske Judoske, savó isyn beštó pašýl kralískire vudará; nisó na promek saréstyr, so tu rakirdian.”

¹¹I lyjá Amáno ídia i gres, i uridia Mardohiejos, i vylydžijá les pe foritko markplaco (foruný/plóšča), i phendiá angíl léste: “Adiáke keréna odolé manušéske, savés králi kaméla te patyvakirel slavása!”

¹²I risijá Mardohiéjo ke kralískire vudará. Amáno sygedýr gijá dre péskiro kher, smentno i začhakirdia šeró.

¹³I piriphendia Amáno Zerešake, péskire romniake, i sarénge péskire malenge, so kerdiápe lésa. I phendlé léske léskire godé manušá i léskiri romný Zereš: “Kóli Mardohiéjo isyn Judéngire rodóstyr, pir savéste tu lyjan te peres, tedy tu na pirizorjakiresa les, a sygedýr peresa angíl léste.”

¹⁴Jone iščo (inké) rakirdé lésa, syr javné kralískire jévnuhi, i lyné te sygniakiren Amanos te džal pe svénko, savó kerdiá Estéra.