Read Biblija - Pe Baltitko Romani čib (Romanes) 2019 Baltic Romani Bible Ester 8 Bible Online

Ester 8 - Biblija - Pe Baltitko Romani čib (Romanes) 2019 Baltic Romani Bible bible

Ester 8

¹Dro do-pac' dyvés králi Artaksiérkso otdyjá kralicake Esterake Amanoskiro kher, Judéngire-vergoskiro; a Mardohiéjo zagijá angíl muj kralískiro, pal-dová so jov sys lákiro kak.

²I zlyjá králi péskiri angrusty čergenorjasa, saví jov otlyja Amanostyr, i otdyjá Mardohiejoske; Estéra čhudiá Mardohiejos dykhibnaskiresa pe Amanoskiro kher.

³I duredýr Estéra rakirdiá angíl kralíste, i pyjá ke léskire ĥerá, i rondiá, i mangdiá les te riskirél xolý Amanoskiri Vugejaninoskiri i plano léskiro, savó jov zadumindia pe Judénde.

⁴I protyrdyjá králi ke Estéra suvnakunó destó; i ĥazdyjápe Estéra, i terdijá angíl muj kralískiro.

⁵I phendiá: “Kóli kralíske javéla pir iló, i kóli me lathjom tangipén angíl muj léskiro, i čačunó davá réndo angíl muj kralískiro, i so milo som me jakhenge leskirenge; tedy mek te javél čhindló, sob (kaj) te javén riskirdé lylá pir zaduminyben Amanoskiro, čhavéskire Gamiedatoskire, Vugejaninoskire, savé jov čhindiá pal Judéngiro zamariben dre saré provincyi kralískire.

⁶Pal-dová so, syr me mogináva te dykháv bída, saví javéla pe miré manušénde, i syr me mogináva te dykháv meribén miré manušéngiro?”

⁷I phendiá králi Artaksiérkso kralicake Esterake i Mardohiejoske Judoske: “Ĥáda, me Amanoskiro kher otdyjom Esterake, i kokores les ublade pe vešyna pal dová, so jov čhudiá péskiro vast pe Judénde.

⁸Čhinen i tumé uphenybén pal Judénde, so isyn tuménge lačhó, kralískire lavéstyr, i phandián kralískire angrustiasa čergonorjasa: pal-dová so lylá, savé sys čhindlé kralískire lavéstyr i phandián kralískire angrustiasa, naštý te otparuven.”

⁹I khardé tedy kralískire lylá-piričhinybnaskiren dro tríto čhon, dro čhon Sivano, pe léskiro biš te tríto dyvés, i sys čhindló saró adiáke, syr priphendiá Mardohiéjo, ke/žýko Judy, i ke/žýko barydyrá pe provincyi i theméskire barydyrénge, i ke/žýko thagárja provincyjakire Indijatyr ke/žýko Jefiopija, šel te biš te eftá provincyi dre kažno provincyja lylenca lakirenca i ke/žýko saré manušá pe léngiri čib, i ke/žýko Judy léngire čhinybnasa i pe léngiri čib.

¹⁰I čhindiá Mardohiéjo kralískire Artaksierksoskire lavéstyr, i phandia kralískire angrustiasa čergonorjasa, i bičhadiá lylá pir manušénde, savé tradéna pe grénde, pe vierbliudende (dromadarende), i oslende kraliskirende.

¹¹Pal-dová, so dalé lylá dyné vólia Judénge, savé dživdé dro kažno fóro, te skedénpe i te zaterdjon pal péskiro džiibén — te tradén krig, te zamarén i te xasiakirén sarén zoralen dre manušénde i dre provincyja, savé isyn dre xolý lénca: bijatén i džuvlién i barvalypén léngiro te zalen.

¹²Dro jekh dyvés pir saré kralískire Artaksierksoskire provincyi pe dešutrito dyvés dešudujengire čhonéskiro, Adaroskiro čhon.

¹³Piričhinyben dalé uphenybnaskiro te otdén dre kaažno provincyja syr zakóno, dyno te džinen (ob'iavindlo) vaš saré manušénge, sob (kaj) Judy te javén skedyné ke dová dyvés te othan pale péskire vergénge.

¹⁴Tén'ci manušá, savé tradyne uklisté pe kralískire prastybnytkone grénde, tradyne syg i sygedýr kralískire uphenybnasa. Davá uphenybén sys ob'iavindlo (phendló) i dre kralískiri felatin [šerutno fóro-r.s.] tvárdyma Suzy.

¹⁵I, ake, Mardohiéjo vygijá kralístyr dre kralískiro uribén jahontovone i parné cviatosa, i baré suvnakuné koronasa, i dre mantija, visonytko i purpurytko. I fóro Suzy otdžidyjá i zoralés obradyndiape.

¹⁶A Judénde sys tedy svencynyben, i rádyma, i loš (viesiélijo), i svénko.

¹⁷I dre kažno provincyja i dro kažno fóro, i pe kažno štéto, karik dogijá priphenybén kralískiro i léskiro uphenybén, sys rádyma Judénde i loš (viesielijo), svénko i svenkitko dyvés. I but manušá rigátyr jačné Judenca, pal-dová so pyjá pe lénde dar angíl Judénde.