Read Biblija - Pe Baltitko Romani čib (Romanes) 2019 Baltic Romani Bible Vygiiben 11 Bible Online

Vygiiben 11 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 11

¹I phendiá Raj Devél Mojzáske: “Iščo jekh bída Me lydžáva pe faraonoste i pe Jegiptianende; paló davá jov otmekéla tumen adathýr; kiéli jov javéla te otmekél, sygnymasa javéla te tradel tumen adathýr;

²to phen manušénge, sob (kaj) kažno murš péskire pašatunestyr i kažno džuvlý péskire pašatuniatyr te vymangen rupuvé i suvnakuné kuč vieščy (viešča).”

³I dyjá Raj Devél patýv Péskire manušénge dre Jegiptóskire jakhá; ne i Mójza sys drieván baró pe Jegiptóskiri phuv, dre faraonóskire-pishar'jengire jakhá i manušéngire.

⁴I phendiá Mójza: ‘Adiáke rakiréla Raj Devél: “Dro pašrat Me prodžava maškirál Jegípto,

⁵i meréla kažno bijáto anglatuné bijanypnastyr pe Jegiptóskiri phuv, faraonóskire anglatuné bijanypnastyr, savó isyn beštó pe trono péskiro, ke anglatuné bijanypén pisharicakiro, saví isyn pašýl žorny (beledin), i ke saró anglatunó bijanypnaskiro kheritkoné murdaléndyr;

⁶i javéla baró roviben pir sarí Jegiptóskiri phuv, savó na sys, i savó na javéla butýr;

⁷saré Izrailjoskire čhavénde ni pe manušéste, ni pe kheritkoné murdalénde na riskiréla džukel péskire čibása, sob (kaj) tumé te džinén, saví rozn' keréla Raj Devél maškír Jegiptianende i Izrail'tianende.

⁸I javéna saré tyré pishárja ke me, i pokloninenape (keréna šerésa) mánge, rakirí: “Vydža tu i saré manušá, savénca tu xulainesa. Paló saró me i vydžava.” I vygijá Mójza faraonostyr xoliása.

⁹I phendiá Raj Devél Mojzáske: “Na kandyjá tumen faraóno, sob (kaj) te javén butýr Miré dívy pe Jegiptóskiri phuv.”

¹⁰Mójza i Aaróno kerdé saré dalé dívy angíl faraonoste; ne Raj Devél pharjakirdia faraonóskiro iló, i jov na otmekciá Izrailjoskire čhavén péskire phuvjátyr.