Read Biblija - Pe Baltitko Romani čib (Romanes) 2019 Baltic Romani Bible Vygiiben 15 Bible Online

Vygiiben 15 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 15

¹“Bagava Me Ráske-Devléske, pal-dová so Jov vučés ĥazdyjápe; gres i léskire manušés, savó sys beštó uklisté, čhurdyjá dre mórjo (derjáv).

²Raj Devél isyn zoralypén miro i sláva mirí, Jov sys miro zrakhibén: Jov isyn miro Devél, i Me slavinava Les; miré-dadéskiro Devél, i me barjakirava Les.

³Raj Devél isyn murš maribnaske, lav Léske Jahvá (Iiegova).

⁴Faraonóskire maribnýtka vurdená i léskire xaladén Jov tasadiakirdia dro mórjo (derjáv), i léskire vykedyné barydyrá tasadyne dro Loló mórjo (derjáv).

⁵Valny (velny) xoripnastyr začhakirde len: jone giné te tasadjon dro xoripén, syr bar.

⁶Tyró čačó vast (diesnica), Raj Devél, slavinelape zorjása; Tyró čačó vast, Raj Devél rozriskirdia pe koterá vergos (vrogos).

⁷Baré Tyré slavása Tu teliakirdian odolén, savé ĥazdynépe pe Túte. Tu bičhadian Tyró xoliamipen, i jov shačkirdiá len, syr phus.

⁸Tyré phurdypnastyr paniá roskerdepe (rostempindlepe), paningá jačné, syr vánta, jaciá ĥensto piena dro morjoskiro (derjavéskiro) iló.

⁹O vérgo phendiá: “Tradava me, dotradava, roskerava doresybén; čaljola lénca miro di, vylava me mirí kurtála, xasiakiréla miro vast len.

¹⁰Tu phurdyjan Tyré duhósa, i začhakirdia len mórjo (derjáv): jone tasadyne, syr molovi (svinco), dre baré paniá.

¹¹Kon isyn syr Tu, Rajo Dévla, maškír devlorende? Kon isyn, syr Tu, naj barydyr sventypnasa, šaribnasa ke dar Tu, divengiro Keribnari?

¹²Tu čhudián Tyró čačó vast (diesnica); nakhadia (proglytyndia) len phuv.

¹³Tu lydžása Tyré tangipnasa adalen manušén, savén Tu zrakhcián, — prolydžasa len Tyré zorjása dre Tyré svénta kherá.

¹⁴Šundlé manušýtka nácyi, i trinskirenape: dar oblyja Filistimijákire manušén;

¹⁵tedy strahádyne Edomoskire thagárja, dar oblyja Moavitoskire ran, zasmentnindle saré Xanaanoskire manušá.

¹⁶Mek te perél pe lénde dar i traš; Tyré-vastengire slavatyr mek te javén jone muta (niema), syr bar, ke davá časo (cýro), paka prodžána Tyré manušá, Rajo Dévla, ke davá časo, paka prodžána adalé manušá, savén Tu dorescian.

¹⁷Zalydža len i rosčhuv te dživén len pe bérga Tyré mekné mištypnástyr, pe štéto, savó Tu kerdián Péske kheresa, Rajo Dévla, pe svénto štéto, savó sozdyne Tyré vastá, Rajo Baró!

¹⁸Raj Devél javéla kralísa dre viéki i dre viečnyma.

¹⁹Kiéli zaginé faraonóskire grajo léskire maribnytkoné vurdenenca i manušénca, savé sys uklisté pe grénde dro mórjo (derjáv), tedy Raj Devél poriskirdia pe lénde morjoskire (derjavéskire) paniá, a Izrailjoskire čhavé proginé pir šukí phuv maškír mórjo (derjáv).

²⁰I lyjá Mariam proročica, Aaronoskiri phen, dre péskiro vast bubno (timpano), i vyginé pal láte saré džuvliá bubnenca i bagaibnasa.

²¹I bagandia Mariam angíl lénde: “Bagán Ráske-Devléske, pal-dová so vučés ĥazdyjápe Jov, gres i manušés leskires tasadiakirdia Jov dro mórjo (derjáv).”

²²I lydžijá Mójza Izrail'tianén Lolé morjostyr (derjavestyr), i jone zaginé pe čhučí phuv Suro; i giné jone trin dyvesá pir čhučí phuv, i na lathenas paní.

²³Javné dre Miéra (Mara), i na mogindlé te p'jen paní dre Miéra, pal-dová so jov sys kirko, paldavá i dyné dolé štetoske lav: Miéra.

²⁴I lyné te den gódla manušá pe Mojzaste, rakirí: “So aménge te pjas?”

²⁵Mójza dyjape te kharel Ras-Devlés, i Raj Devél sykadiá léske veš, i jov čhurdyjá les dro paní, i paní jaciá gudló. Odój Raj Devél dyjá manušénge uphenybén i Zakóno, i odój Jov sprobinelas len.

²⁶I phendiá: “Kóli tu javésa te šunés rakhunes Ráskire-Devléskiri, tyré Devléskiri zan, i te kerés lačhipén angíl Léskire jakhá, i te šunés Léskire priphenybená, i te rakhés saré Léskire uphenybená, tedy Me na lydžáva pe túte ni jekh dukhendyr, savé Me lydžijom pe Jegípto, pal-dová so Me som Raj Devél, Tyró sastiakiribnari.”

²⁷I javné jone dro Jelimo: odój sys dešudúj panieskire ĥanyngorja (istočniki) i eftadešá finikitka kaštá, i terdiné odój taborosa (stanósa) pašýl paniá.