Read Biblija - Pe Baltitko Romani čib (Romanes) 2019 Baltic Romani Bible Vygiiben 16 Bible Online

Vygiiben 16 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 16

¹I giné Jelimostyr, i javdiá saró skedyibén Izrailjoskire-čhavéngiro pe čhučí (pusto) phuv Sino, so isyn maškír Jelimo i maškír Sinajo, pe dešupandžto dyvés javire-čhonéskiro pir léngiro vygiiben Jegiptóskire phuvjátyr.

²I lyné te žalinenpe xoliása (zagodlyne) Izrailjoskire-čhavéngiro skedyibén pe Mojzaste i Aaronoste pe čhučí phuv,

³i phendlé lénge Izrailjoskire čhavé: “Ne, kóli ame te meras Ráskire-Devléskire vastéstyr pe Jegiptóskiri phuv, kiéli ame sámas bešté pašýl pirja masesa, i kiéli ame xajam maró ke čalypen! Paldavá so vylydžiné tumé amen pe daja čhučí phuv, sob (kaj) saró davá skedyibén te muliakirén bokhasa.”

⁴I phendiá Raj Devél Mojzáske: “Ĥáda, Me mekava telé tuménge syr bryšýnd maró bolybnástyr, i mek manušá te vydžán i te skedén kažno dyvés, ci but trej pe dyvés, sob (kaj) Mánge te sprobinav len, ci javéna jone te kerén pir Miro Zakóno, ci nad;

⁵a pe šóvto dyvés mek te skedén, so janéna, i javéla dre duj móly butýr proti dová, pe kicý skedéna jone dre javír dyvesá.”

⁶I phendlé Mójza i Aaróno saré Izrailjoskire-čhavéngire skedyibnaske: “Bel'velié udžinena tumé, so Raj Devél vylydžijá tumen Jegiptóskire phuvjátyr,

⁷i pe ránko (pe zlóko) dykhéna Ráskire-Devléskiri sláva, pal-dová so šundiá Jov tumaró xoliamó rakiribén pe Raste-Devléste: a ame, kon sam adasavé, so tumé rakiréna pe aménde?”

⁸I phendiá Mójza: “Tumé udžinena, kiéli Raj Devél bel'velié déla tuménge mas dre xabén, a pe ránko maró, kicý tumé kaména, pal-dová so Raj Devél šundiá gódla tumarí, saví tumé ĥazdyné proti Léste: a ame so? Tumarí gódla na pe aménde, a pe Raste-Devléste.

⁹I phendiá Mójza Aaronóske: “Phen saré Izrailjoskire čhavéngire skedyibnaske: terdjon angíl Ráskire-Devléskiro muj, pal-dová so Jov šundiá tumarí gódla.”

¹⁰I kiéli rakirdiá Aaróno ke saró Izrailjoskiro-čhavéngire skedyibén, tedy jone risiné mósa pe čhučí phuv, i ĥáda, Raskiri-Devléskiri sláva javdiá dro óbloko.

¹¹I phendiá Raj Devél Mojzáske:

¹²“Me šundjom Izrailjoskire-čhavengiri gódla; phen lénge: ‘Bel'velié javéna te xan mas, a pe zlóko čaljona marésa, i udžinena, so Me som Raj Devél (Jahvá), Devél tumaró.’”

¹³Bel'velié priurniandyne pieriepjoly i začhakirde stáno, a pe ránko sys pašty pahlyn (rosa) pašýl stáno;

¹⁴pahlyn ĥazdyjápe, i ĥáda, uprál pe čhučí phuv vari-so drobno (xurdo), syr krupa, drobno, syr iniejo pe phuv.

¹⁵I dykhné Izrailjoskire čhavé, i rakirdé jekh jekhéske: “So isyn davá?” Pal-dová so jone na džindlé, so sys davá. I Mójza phendiá lénge: “Davá isyn maró, savó Raj Devél dyjá tuménge dro xabén;

¹⁶ĥáda, so phendiá Raj Devél: ‘Skedén les kažno manúš pe adákicy, ci but léske te xal, pir gomoro pe manušéste, ci but isyn manušýtka dijá, dre doiá šátra, skedén adákicy.’”

¹⁷I kerdé adiáke Izrailjoskire čhavé, i skedyné, kon but, kon nábut.

¹⁸I mierindle gomorosa, i odoléste, kon skedyjá but, na sys butýr mieratyr, i kodoleste, kon skedyjá nábut, na sys nauhtylyben. Kažno skedyjá adákicy, ci but treindiá te shal léske.

¹⁹I phendiá lénge Mójza: “Nikón te na jačkirel davá ke ránko.”

²⁰Ne jone na kandyné Mojzás, i jačkirdé vari-savé koterá daléstyr ke ránko, — i zalydžinepe kirme, i joj zakhandyja. I xoliásyja pe lénde Mójza.

²¹I jone skedenas les tasiárles (ránes) pe kažno ránko, kažno ci but léske te shal; ne kiéli pritat'kirela kham, jov maró, biladyja (taindia).

²²Pe šóvto dyvés skedyné maró dre duj móly, pir duj gomory pe kažnonéste, i javné saré barydyrá skedyibnaskire, i rosphendlé Mojzáske.

²³I jov phendiá lénge: “Ĥáda, so phendiá Raj Devél: atasiá otkhinyben, svénto Ráskire-Devléskiro sávato (subóta); so trej te peken, peken, i so trej te keraven, keraven adadyvés, a so jačélape, otčhuven i zrakhen ke ránko.

²⁴I otčhude dová ke ránko, syr phendiá Mójza, i jov na zakhandyja, i kirmen na sys dre léste.

²⁵I phendiá Mójza: “Han les adadyvés, pal-dová so adadyvés Ráskire-Devléskiro sávato; adadyvés na lathéna les pe félda;

²⁶šov dyvesie skedén les, a pe eftáto dyvés — sávato, na javéla les dro davá dyvés.”

²⁷Ne vari-savé manušéndyr vyginé dro eftáto dyvés te skedén, i na lathné.

²⁸I phendiá Raj Devél Mojzáske: “Ci but (dlúges) tumé javéna te na kerén pir Miré uphenybená i Miré zakóny?

²⁹Dykhén, Raj Devél dyjá tuménge sávato, pal-dová Jov déla dre šóvto dyvés maró pe duj dyvesá: jačénpe kažno péste. Nikón te na vydžál péskire štetóstyr pe eftáto dyvés.”

³⁰I mangnepe manušá pe eftáto dyvés.

³¹I dyjá Izrailjoskiro kher dolé mareske lav: manna; joj sys syr koriandreskiro siemjo, parnó, smakosa syr marikly avginesa.

³²I phendiá Mójza: “Ĥáda, so phendiá Raj Devél: ‘Čhuvén pherdés mannasa gomoro vaš zrakhibén dre tumaré ródy, sob (kaj) tumé te dykhén maró, savésa Me čaradjom tumen pe čhučí phuv, syr vylydžijom tumen Jegiptóskire phuvjátyr.’”

³³I phendiá Mójza Aaronóske: “Le jekh khoró (sasudo), i čhuv dre léste pherdó gomoro manna, i čhuv les angíl Raste-Devléste vaš zrakhibén dre tumaré ródy.”

³⁴I čhudiá les Aaróno angíl kovčego (mohtó) te dophenel pal zrakhibén, syr phendiá Raj Devél Mojzáske.

³⁵Izrailjoskire čhavé xané manna štardešá berš, paka javné pe phuv, pe saví dživdé; manna xané jone, paka javné pe Xanaanoskire-rigakiri miéža.

³⁶A gomoro isyn déšto paš efatyr.