Read Biblija - Pe Baltitko Romani čib (Romanes) 2019 Baltic Romani Bible Vygiiben 17 Bible Online

Vygiiben 17 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 17

¹I gijá saró Izrailjoskire-čhavéngiro skedyibén čhučé phuvjátyr Sin péskire dromésa, pir Ráskiro-Devléskiro uphenybén; i terdiné stanósa dro Riefidimo, i na sys paní te p'jen manušénge.

²I vyrakirenas manušá Mojzáske, i rakirdé: “Den aménge te pjas paní.” I phendiá lénge Mójza: “So tumé vyrakirena mánge? So tumé sprobinena Ras-Devlés?”

³I kamlé odój manušá paní, i košnepe manušá pe Mojzaste, i rakirdé: “Palsó tu vylydžijan amen Jegiptóstyr, te muliakires amen i čhavén amaren i stády amaré bi panieskiro?”

⁴Mójza dyjá gódla ke Raj Devél i phendiá: “So mánge adalé manušénca te keráv? Sarésa nábut, i zamarna man barénca.”

⁵I phendiá Raj Devél Mojzáske: “Prodža angíl manušénde, i le pésa vari-savén Izrailjoskire phurendyr i tyró destó, savésa tu pekadian pir paní, le dre péskiro vast, i džá;

⁶ĥáda, Me terdjovava angíl túte odój pe skála dro Xorivo, i tu pekavesa dre skála, i džála látyr paní, i javéna te p'jen manušá.” I kerdiá Mójza adiáke dro jakhá Izrailjoskire phurydyrengire.

⁷I dyjá dolé štetoske lav: Masá i Mieriva, pirdál dová, so Izrailjoskire čhavé pinindle i pal-dová so jone sprobindle Devlés: rakirí “Ci isyn Raj Devél maškír aménde, ci nane?”

⁸I javné Amalikitiani i lydžiné maribén Izrail'tianenca dro Riefidimo.

⁹Mójza phendiá Isusóske (Johošuaske): “Vykede aménge muršén, i džá marpe Amalikitianenca; atasiá me terdjovava pe bergicakiro vučipén, i Ráskire-Devléskiro destó javéla dro miro vast.”

¹⁰I kerdiá Isúso (Johošuá), syr phendiá léske Mójza, i gijá te marélpe Amalikitianenca; a Mójza i Aaróno i Oro giné upré pe bergicakiro vučipén.

¹¹I kiéli Mójza ĥazdelas péskire vastá, to pirizorjakirelas Izrailjo, a kiéli jov obmekelas péskire vastá, to pirizorjakirelas Amaliko;

¹²ne Mojzáskire vastá jačné pharé, i tedy jone lyné bar i podčhude tel léste, i jov bestiá pe léste, Aaróno i Oro podrikirenas léskire vastá, jekh jekhe, a javír javire rigátyr. I sys léskire vastá ĥazdyné, paka zagijá kham.

¹³I domardiá Isúso (Johošuá) Amalikos i léskire manušén kurtalakire vostrimasa.

¹⁴I phendiá Raj Devél Mojzáske: “Začhin davá vaš ripiribén dre lylvarí, i patiakir Isusós (Johošuas), so Me sarésa khosava krig ripiribén Amalikitianengiro bolybnástyr.”

¹⁵I kerdiá Mójza altárjo (žertvieniko), i dyjá léske lav: Iiegova (Jahvá) Nissi.

¹⁶“Pal-dová so, phendiá jov, vast Ráskire-Devléskiro isyn pe trono: maribén Raste-Devléste proti Amalikoste sys rodóstyr dre ródy.