Read Biblija - Pe Baltitko Romani čib (Romanes) 2019 Baltic Romani Bible Vygiiben 18 Bible Online

Vygiiben 18 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 18

¹I šundiá Ioforo, Madiamitianengiro rašái, Mojzáskiro sastro, pal saró, so kerdiá Raj Devél vaš Mojzáske i vaš Izrailjo, Péskire manušénge, kiéli vylydžijá Raj Devél Izrailjo Jegiptóstyr,

²i lyjá Ioforo, Mojzáskiro sastro, Siepfora, Mojzaskirja romniá, saví angíl davá sys bičhady pale,

³i dujén lákire čhavén, savéndyr jekhéske lav sys Girsamo [Gierš-ju.o.], pal-dová so rakirdiá Mójza: “Me javdjom pe čúžo phuv”;

⁴a javireske lav sys Jeliezero, pal-dová so, rakirdiá jov — Devél miré-dadéskiro sys mánge Pomogibnaskiro i zrakhciá man faraonóskire kurtalátyr.

⁵I javdiá Ioforo, Mojzáskiro sastro, léskire čhavénca i léskire romniása ke Mójza pe čhučí phuv, kaj jov sys terdó stanósa (taborosa) pašýl Ráskire-Devléskiri bérga,

⁶i dyjá te džinél Mojzáske: “Me, tyró sastro Ioforo, džáva ke tu, i tyrí romný, i duj lákire čhavé lása.”

⁷Mójza vygijá gil péskire sastreske, i kerdiá šerésa i čamudia les, i paló saró jone zaginé dre šátra.

⁸I rosphendiá Mójza péskire sastreske pal saró, so kerdiá Raj Devél faraonosa i Jegiptianenca pal Izrailjo, i pal saró pharipén, savó sys lénca pe drom, i syr zrakhciá len Raj Devél.

⁹Ioforo sys rado pal saré bahtalé réndy, savé Raj Devél kerdiá Izrailjoske, kiéli zrakhciá les Jegiptianengire vasténdyr.

¹⁰I phendiá Ioforo: “Te javél bahtiakirdó Raj Devél, Savó zrakhciá tumen Jegiptóskire vastéstyr i faraonóskire vastéstyr, Savó zrakhciá adalé manušén Jegiptianengire zoralypnastyr;

¹¹kaná me udžindjom, so Raj Devél isyn baró, vučedýr saré devlorendyr, dre dová-pac', sósa jone šardepe vučedýr pe Izrail'tianende.”

¹²I jandiá Ioforo, Mojzáskiro sastro, céla shačkiribena i svénta dyibená (žertvy) Devléske; i javdiá Aaróno i saré Izrailjoskire phurydyrá te xan maró Mojzáskire sastresa angíl Devléste.

¹³Pe javír dyvés besciá Mójza te sendiakirél manušén, i terdé sys manušá angíl Mojzaste zlokostyr (rankostyr) ke bel'vél'.

¹⁴I dykhciá Mojzáskiro sastro saró, so jov keréla manušénca, i phendiá: “So da dasavo isyn, so tu kerésa manušénca? Vaš so tu san jekhdžinó beštó, a saré manušá isyn terdé angíl túte rankostyr ke bel'vél'?”

¹⁵I phendiá Mójza péskire sastreske: “Manušá javéna ke me te mangén Devléstyr séndo;

¹⁶kiéli lénde kerélape vari-savó réndo, jone javéna ke me i me dynarinava maškír adaleste i javiréste i, me phenáva zoralés Devléskire uphenybená i Léskire zakóny.”

¹⁷Ne Mojzáskiro sastro phendiá léske: “Nakuč davá tu kerésa:

¹⁸tu zmenčynesa i pes i adalé manušén, savé isyn túsa, pal-dová so isyn drieván pharó vaš túke davá réndo (diélo): tu jekhdžinó naštý (tu na moginésa) les te kerés;

¹⁹adiáke pošun miré lavá; me dáva túke godý, i Raj Devél javéla túsa: jav tu vaš manušénge maškiratunesa (posriednikosa) angíl Raste-Devléste i piride Devléske manušéngire réndy;

²⁰sykliákir len Devléskire uphenybnenge i zakonenge, sykáv lénge drom Léskiro, pir savó lénge trej te džán, i réndy, savé jone isyn bangé te kerén;

²¹tu vykede saré manušéndyr odarime manušén, savé daréna Devléstyr, čačunen manušén, savé bidykhena kofy, i čhuv len barydyrénca pe tysjonco, barydyrénca pe šelende, barydyrénca pe pandždešende i barydyrénca pe deše manušénde,

²²mek jone te sendiakiren manušén dro kažno časo, i pal kažno baró réndo te rosphenén túke, a saré tykné réndy te sendiakiren kokoré: i javéla túke lokhedýr, i jone lydžána túsa pharipén;

²³kóli tu kerésa davá, i Raj Devél phenéla túke, tedy tu saštý (moginésa) te vyterdjos, i saré adalé manušá javéna te otdžan pe péskiro štéto ramanjosa (mirósa).”

²⁴I Mójza kandyjá péskire-sastreskire lavá, i saró kerdiá, so jov rakirdiá;

²⁵i vykedyjá Mójza saré Izrailjostyr odarime manušén, i čhudiá len barydyrénca pe manušénde; tysjoncengirenca, šelengirenca, pandždešengirenca i dešengirenca.

²⁶I sendindle jone manušén dro kažno časo; pal baré réndy rosphenenas Mojzáske, a saré tykné réndy (diély) sendindle kokoré.

²⁷I otmekciá Mójza péskire sastres, i jov gijá pe péskiri phuv.