Read Biblija - Pe Baltitko Romani čib (Romanes) 2019 Baltic Romani Bible Vygiiben 19 Bible Online

Vygiiben 19 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 19

¹Dro tríto čhon, syr Izrailjoskire čhavé vyginé Jegiptóskire phuvjátyr, javné jone pe čhučí phuv Sinajoskiri.

²I giné jone Riefidimostyr i javné pe čhučí phuv Sinajoskiri, i terdiné odój stanósa (taborosa) pe čhučí phuv; i terdijá odój Izrailjo stanósa proti bérga.

³Mójza gijá upré pe bérga ke Devél i prikhardia les Raj Devél bergátyr, i rakirdiá: “Adiáke phen Jakovóskire kheréske i rosphen Izrailjoskire kheréske:

⁴‘Tumé dykhné, so Me kerdjom Jegiptianenge, i syr Me lydžijom tumen sýrby pe orloskire (kidoskire) phaká, i jandjom tumen ke Pe;

⁵adiáke, kóli tumé javéna te šunén Mirí zan i te rakhén dre godý Miro zavieto (dorakiribén), tedy tumé javéna Miré vykedyné narodosa saré manušytkoné nacyiéndyr, pal-dová so sarí phuv isyn Mirí,

⁶a tumé Mánde javéna rašángire kralipnasa i sventoné manušénca; ĥáda, isyn lavá, savé tu phenésa Izrailjoskire čhavénge.”

⁷I javdiá Mójza i khardiá ke pe manušéngire phurydyren, i rosphendiá lénge saré dalé lavá, savé rakirdiá léske Raj Devél.

⁸I saré manušá otphendlé pal jekh, i rakirdé: “Saró, so phendiá Raj Devél, kerása.” I Mójza dolydžija manušéngire lavá Ráske-Devléske.

⁹I phendiá Raj Devél Mojzáske: “Ĥáda, Me džáva ke tu dro ĥensto óbloko, sob (kaj) te šunén manušá, syr Me javáva te rakiráv túsa, i, sob (kaj) manušá te patián túke saró časo.” I Mójza dyjá te džinél manušéngire lavá Ráske-Devléske.

¹⁰I phendiá Raj Devél Mojzáske: “Džá ke manušá, i vysvencyn len adadyvés i atasiá; mek jone te vymoren péskire ídi (rizy),

¹¹sob (kaj) te javén skedyné ke tríto dyvés: pal-dová so pe tríto dyvés zdžála Raj Devél angíl saré manušéngire jakhá pe bérga Sinajo;

¹²i prolydža vaš manušénge saré rigéndyr špéra (čerta), i phen: ‘Rakhénpe te zadžán pe bérga i te čilavenpe ke lákiri podešva (nizo); kažno (sváko), kon čilavelape ke bérga, otdynó javéla meribnáske;

¹³vast mek te na kasynelpe ke joi, a mek te marén les barénca ci te den karjo maribnytkoné bustiasa (strielasa); ci kherítko murdál (skoto) davá, ci manúš, mek na jačélape džidó.’ Dro časo, kiéli javéla ĥará (dlúges) zvuko (zniko) rogóstyr (trubátyr), to moginéna jone te džán upré pe bérga.”

¹⁴I zgija Mójza bergátyr ke manušá, i vysvencyndia manušén, i jone vymorde péskiri ídia.

¹⁵I phendiá manušénge: “Javén skedyné ke tríto dyvés, na kasynenpe ke romniá.”

¹⁶Pe tríto dyvés, kiéli jaciá zlóko (ránko), sys grómy, i bliskavícy, i ĥensto óbloko pe bérga, i rogoskiro (trubakiri) zniko (zvuko) drieván zoraló; zatrinskirdepe saré manušá, savé sys dro stáno.

¹⁷I vylydžijá Mójza stanostyr manušén te dykhenpe Devlésa, i terdiné jone pašýl sámo nizo bergákiro.

¹⁸Bérga Sinajo sarí sys dro thuv (dymo) daléstyr, so zgija pe láte Raj Devél dre jag; i džálas látyr thuv, syr thuv bovestyr, i sarí bérga drieván trinskirdiape;

¹⁹i rogoskiro zniko (zvuko) jačelas zoraledýr i zoralydyr. Mójza rakirdiá, i Raj Devél otphenélas léske zaniása.

²⁰I zgija Raj Devél pe bérga Sinajo, pe bergákiro vučipén, i khardiá Raj Devél Mojzás pe bergákiro vučipén, i gijá Mójza.

²¹I phendiá Raj Devél Mojzáske: “Džá telé i dophen manušénge, sob (kaj) jone te na kušenpe ke Raj Devél te dykhén Les, i, sob (kaj) but léndyr te na xasjon;

²²rašaja, savé džánas pašyledýr ke Raj Devél, lénge treindiá te osvencynen pes, sob (kaj) te na xas'kirel len Raj Devél.

²³I phendiá Mójza Ráske-Devléske: “Manušá naštý (na moginéna) te džán upré pe bérga Sinajo, pal-dová so Tu angíl podrakhcian amen, i phendián: “Prolydža špéra (čerta) trusciál (krugom) bérga i osvencyn la.”

²⁴I Raj Devél phendiá léske: “Džá telé, tén'či džá upré tu, i túsa Aaróno; a rašaja i manušá, mek te na skedénpe te džán ke Raj Devél, sob (kaj) len te na xasiakirél.”

²⁵I gijá telé Mójza ke manušá, i piriphendia lénge.