Read Biblija - Pe Baltitko Romani čib (Romanes) 2019 Baltic Romani Bible Vygiiben 21 Bible Online

Vygiiben 21 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 21

¹I ĥáda, isyn zakóny, savé tu désa te džinés lénge (Izrail'tianenge):

²“Kóli tu kinesa pisharís Judos, mek jov te kerél butý šov berš, a pe eftáto (bitrinéngiro déšto) mek jov te vydžál pe vólia bi lovengiro;

³kóli jov javdiá jekhdžinó, mek jekhdžinó i te vydžál; a kóli jov isyn romanduno, mek te vydžál lésa i léskiri romný;

⁴kóli léskiro xuláj dyjá léske romniá, i joj bijandiá léske čhavén i čhajén, tedy romný i lákire čhavé mek te jačénpe adalé xulaste, a jov vydžála jekhdžinó;

⁵ne kóli pishári phenéla: ‘Miro xuláj isyn drógo mánge, miry romný i miré čhavé, me na džáva pe vólia,’ —

⁶tedy mek léskiro xuláj te janel les angíl sendar'jende (devlorende), i te čhuvél les ke vudár ci ke kosiako, i léskiro xuláj te prophusavel léskiro kan jarjasa, i jov jačélape léskire pisharisa pe saró viéko.

⁷Kóli vari-kon biknela peskirjá čha dre pisharicate, tedy joj naštý (na moginéla) te vydžál, syr vydžána pishárja;

⁸kóli joj na kerdiá pir iló péskire xuláske, i jov la na obrenčynela (angrustiakirela), mek jov te del vólia láke, sob (kaj) la te vykinen; a čužoné manušénge naštý la te biknel léske, kiéli kokoró na zakamdiá la;

⁹kóli jov obrenčynela (angrustiakirela) la péskire čhavéske, mek te obžalpe lása, syr péskire čhajenca;

¹⁰kóli javirja pal léste léla, tedy joj na bangi te jačélpe bi xabnaskiro, bi idiakiro i bi romanduno džiibnáskiro;

¹¹a kóli jov dalé trin réndy na keréla vaš láke, mek joj te otdžal vól'no, bi vykinybnaskiro.

¹²Kon pekavela manušés adiáke, so jov meréla, mek odová manúš te javél otdynó pe meribén;

¹³ne, kóli vari-kon na kamdiá, a Devél domekcia léske te poperel tel léskire vastá, tedy Me uphenava túke štéto, karik te našél o manúš, savó zamardiá;

¹⁴a kóli, kon skedelape te zamarél pašatunes, tedy i Miré altarjostyr (žertvienikostyr) le les pe meribén.

¹⁵Kon pekavela péskire dadés ci péskire da, odolés trej te otdén pe meribén.

¹⁶Kon čorela manušés i biknela les; ci jov lathelape dre léskire vastá, tedy trej te otdes les pe meribén.

¹⁷Kon košela péskire dadés ci peskirjá da, odolés trej te otdes pe meribén.

¹⁸Kiéli košenape, i jekh manúš pekavela javirés baresa ci burnykasa (kulakosa), i odová na meréla, ne zanasvaljola,

¹⁹tedy, kóli jov uštéla i javéla te vydžál kheréstyr kaštesa, kon pekadiá les, na javéla otdynó pe meribén; jekh mek odová manúš te zapleskirel lové pal dová časo, ci but jov na kerdiá butý i te del lové pe léskiro sastiakiriben.

²⁰A kóli kon pekavela péskire pisharís ci dynárica kaštesa, i jone meréna tel léskiro vast, tedy jov isyn bangó te lydžál kára;

²¹ne kóli jone jekh dyvés ci duj dyvesá javéna džidé, tedy naštý te čhuvél kára pe léste, pal-dová so jone isyn léskiro rup.

²²Kiéli marenape manušá, i pekavena peralia džuvliá, i joj sčhurdela, ne na javéla javír doš, tedy trej te les bangé manušéstyr štrafo, savó čhuvéla pe léste odolé-džuvliákiro rom, i jov isyn bangó te zapleskirel, ci but léske phenéna sendárja angíl manušénde;

²³a kóli javéla doš, tedy otdé di pal di,

²⁴iakh pal jakh, dand pal dand, vast pal vast, ĥerój pal ĥerój,

²⁵obhačkiriben pal obhačkiriben, rana (dukhady) pal rana (dukhady), pekaiben pal pekaiben.

²⁶Kóli vari-kon pekavela péskire pisharís dre jakh, ci peskirjá pisharica dre jakh, i poškodynela la: mek te otmekél len pe vólia pal jakh;

²⁷i kóli vymarla péskire pisharíske ci péskire pisharicake dand, mek te otmekél pe vólia pal dand.

²⁸Kóli guruv zaphusavela muršés ci džuvliá ke meribén, tedy guruvés te zamarén barénca, i léskiro mas te na xan; a xuláj guruveskiro na bangó;

²⁹ne kóli guruv angledýr phusadiape (bodindiape) i tasiá i pe tríto dyvés, i léskire xuláske sys phendló pal davá, i jov na rakhciá les, a guruv zamardiá muršés ci džuvliá, tedy guruvés te zamarén barénca, i léskire xulás te otdén pe meribén;

³⁰kóli pe léste javéla čhudo vykinybén, mek te del vykinybén pal péskiro di, savó čhudo javéla pe léste.

³¹Ne kóli jov zaphusavela ci čhavores, ci zaphusavela čhajorja, — pir davá-pac' zakóno te obžanpe lésa.

³²Kóli guruv zaphusavela dynarís ci dynárica, tedy léskire xuláske te zapleskirel trijánda šekeli rup, a guruvés te zamarén barénca.

³³Kóli kon rosčhakirela ĥanbín (jama), ci, kóli kon vyganavela ĥanbín (jama) i na začhakirela la, i peréla dre láte guruv ci óslo (miegári),

³⁴tedy xuláj ĥanbinakiro isyn bangó te zapleskirel, te otdél rup léngire xuláske, a mas javéla léskiro.

³⁵Kóli konéskiro guruv zaphusavela ke meribén léskire-susiedoskire guruvés, mek te biknen džidé guruvés i te roskeren pe paš léskiri timín; adiáke-pac' i zamardé guruvés mek te roskeren pe paš;

³⁶a kóli isyn džindló, so guruv phusavelape (bodinelape) i tasiá i pe tríto dyvés, ne léskiro xuláj na rakhciá les, tedy jov isyn bangó te zapleskirel guruvés pal guruveste, a zamardo javéla léskiro.