Read Biblija - Pe Baltitko Romani čib (Romanes) 2019 Baltic Romani Bible Vygiiben 22 Bible Online

Vygiiben 22 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 22

¹Kóli vari-kon čorela guruvés ci bakriá, i začhinela, ci biknela, tedy jov isyn bangó pandž guruvén te vypleskirel pal guruveste, i štar bakrien pal bakriate.

²Kóli vari-kon uhtyléla čores, savó podĥanavelape te čorel, i pekavela les adiáke, so jov meréla, tedy rat na javéla pe léste;

³ne kóli ĥazdyjápe kham pe léste, tedy léskiro rat javéla pe léste. Čor isyn bangó te zapleskirel; a kóli nane sósa, tedy mek les te biknen vaš vypleskiriben lésa pal čordo mištypén;

⁴kóli lathelape čordo dre léskire vastá, so isyn džidó, ci guruv, ci óslo (miegári), ci bakri, mek te vypleskirel jov dre duj móly.

⁵Kóli vari-kon mekéla kheritkoné murdales (skoto) pe čúžo félda ci dro vinagrádniko te vyhal, pal-dová so jov mekciá péskire murdales te vyhal čúžo félda, to mek jov te otdél fedyršo dáro péskire feldatyr i fedyršone léskire vinagradnikostyr.

⁶Kóli jačéla jag i oblela tiernjo (kodro), i vyhačkirla ĥarby (snopy), ci žatva, ci félda, tedy odová manúš isyn bangó te zapleskirel, kon kerdiá davá shačkiribén.

⁷Kóli vari-kon otdéla pašatuneske te zrakhél rup ci ídi, i jone javéna čorde léskire kheréstyr, tedy, kóli lathelape čor, mek jov te zapleskirel dre duj móly;

⁸a kóli na lathelape čor, mek kheréskiro xuláj te javél angíl sendar'jende i te sovlahal, so jov na ĥazdyjá péskiro vast pe léskire-pašatuneskiro mištypén.

⁹Pal kažno sprečno réndo, pal guruveste, pal osloste, pal bakriate, pal ídi, pal kažno viešča (viešč), saví xasijá, pal saví vari-kon phenéla, so joj isyn léskiri, réndo (diélo) dujengiro bangó te javél dolydžino ke sendárja. Konés sendárja bangiakirena, odová zapleskirela péskire pašatuneske dre duj móly.

¹⁰Kóli vari-kon otdéla péskire pašatuneske oslós, ci guruvés, ci bakriá, ci javirés vari-savés kheritkoné murdales pe zrakhibén, a jov meréla, ci javéla kaliečyndlo, ci otlydžino adiáke, so nikón davá na dykhéla,

¹¹to sovláh angíl Raste-Devléste mek te javél maškír dujende dre dová, so kon lyjá pe zrakhibén, na ĥazdyjá péskiro vast pe péskire-pašatuneskiro mištypén; i xuláj isyn bangó te prilel, a odová na javéla te pleskirel;

¹²a kóli léste javéla čordo, tedy jov isyn bangó te zapleskirel léskire xuláske;

¹³kóli javéla zahano riskiribnáskire murdalesa (zvierjosa), tedy mek dro dophenybén te janel zahano dová: pal zahano jov na pleskirela.

¹⁴Kóli vari-kon zalela péskire pašatunestyr kheritkoné murdales (skoto), i jov javéla kaliečyndlo, ci murdjola, a léskire xulás na sys pašýl léste, tedy jov isyn isyn bangó te zapleskirel;

¹⁵ne kóli léskiro xuláj sys pašýl léste, tedy jov isyn na bangó te pleskirel; kóli jov sys lynó pal vužlypén (dlugo) pal lové, tedy mek jov i te džal pal doiá timín.

¹⁶Kóli vari-kon obhohavela napaloromitkona čha, saví isyn naobrenčyndly (naangrustiakirdy) i pirisovela lása, mek te del láke vieno (dáro) i te lel la péske paloróm (te lel la romniása);

¹⁷a kóli dad na zakaméla te otdél la pal léste, mek jov te zapleskirel adákicy rup, ci but trej pe vieno, syr pal napaloromitkone čhajende.

¹⁸Drabakiribnaskiren na jačkir džidenca.

¹⁹Kažno skotoložniko mek te javél otdynó pe meribén.

²⁰Kon janéla svénto dyibén (žértva) devlorénge, apríč jekhe Raste-Devléste, mek jov te javél muliakirdo.

²¹Manušés, savó javéla javire rigátyr, na pritasav, i na dukhav les, pal-dová so tumé kokoré sánas javire-rigakire manušá, savé javné pe Jegiptóskiri phuv.

²²Ni ŭdoven (pivlien), ni siroten (piroten) na pritasaven;

²³kóli tu pritasavesa len, tedy, kiéli jone javéna te godlen ke Me, Me šunava léngiri gódla,

²⁴i zahačkirelape Mirí xolý, i Me zamarava tumen kurtalása (miečosa), i javéna tumaré romniá ŭdovenca (pivlienca), i tumaré čhavé sirotenca (pirotenca).

²⁵Kóli désa tu dro dlugo (vužlypén) lové čororeske Miré manušéndyr, tedy na pritasav len, i na čhuv pe lénde kófo (procento).

²⁶Kóli lésa dre symadý (zalogo) tyré-pašatuneskiri ídia, ke khameskiro zagiibén, otdé la pale,

²⁷pal-dová so joj (ídia) isyn jekhori učhakiriben léste, joi-léskire-maséngiro uribén: dro so jov javéla te sovél? Adiáke, kiéli jov zagodlela ke Me, Me ušunava, pal-dová so Me som tangipnaskiro.

²⁸Sendar'jen na koš, i thagar'jen dre tyré manušénde na obrakir.

²⁹Na zarikir te janes Mánge pérva barjakirdé (plódy) tyré gumnostyr (givaobkeribnaskire šurnatyr) i tyré priesostyr (točylostyr); otdé Mánge odolé čhavéndyr, kon bijándyja anglatunó;

³⁰davá-pac' ker tyré guruvesa i tyré bakriasa. Eftá dyvesá mek jone te javén pašýl péskire date, a pe ohtóto (bidujéngiro déšto) dyvés otdé len Mánge.

³¹I javéna tumé Mánde sventoné manušénca; i mas, savó riskirdiá riskiribnáskiro murdál (zvierjo) pe félda, na xan, čhurdén les džuklenge.