Read Biblija - Pe Baltitko Romani čib (Romanes) 2019 Baltic Romani Bible Vygiiben 23 Bible Online

Vygiiben 23 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 23

¹Na rozlydža čhučó (pusto) rakiribén, na de tyró vast napatiaibnytkoneske, sob (kaj) te javes jakhitkonesa xohaibnaske.

²Na džá palál pal manušéngiro skopo te kerés fuipén, i na dophen dro réndo adiáke, sob (kaj) čačipén te riskirén, syr but manušá.

³I čorores na podrikir dro léskiro réndo pir čačipén,

⁴kóli lathesa tyré-vergoskire guruvés, ci leskires oslós; savó zablendyndia, jan les pale ke jov.

⁵Kóli dykhésa tyré-vergoskire oslós, savó pyjá tel péskiro pharipén, tedy na jačkir les, zle léstyr pharipén;

⁶na sendiakir xohanés tyré-čororeskiro réndo pir čačipén,

⁷otdža xohaibnastyr, i na muliakir nabanges i savó isyn čačipnáskiro; pal-dová so Me na čačakirava (na opravdynava), kon keréla fujes.

⁸Myty (vziatki) na prilé: pal-dová so myty (vziatki) keréna kororenca, kon dykhéla, i pirikerena lavá čačuné manušéndyr.

⁹Kon javéla javire rigátyr, na dukhav (na pritasav) les: tumé džinéna léskiro di, pal-dová so tumé kokoré sánas na péskire manušá pe Jegiptóskiri phuv.

¹⁰Šov berš čhuv ziárka (ziarno) dre tyrí phuv i skéde, so joj bijanéla,

¹¹a pe eftáto (bitrinéngiro déšto) berš jačkir la te otkhinjol, sob (kaj) te čaravenpe tyré manušéndyr čororé, a so jačélape pal lénde, to mek te čaravenpe feldýtka riskiribnáskire murdalá (zvieri); adiáke-pac' ker tyré vinagradnikosa i tyré olivitkone untasa (maslinasa).

¹²Šov dyvesá ker tyré réndy, a pe eftáto dyvés otkhinjov, sob (kaj) te otkhinjol tyró guruv i tyró óslo (miegári), i te otkhinjol butiátyr tyré-dynaricakiro čhavó, i kon javdiá javire rigátyr.

¹³Rakhén saró, so Me phendjom tuménge; i javire-devlengire lavá na rakirén: mek te na javél davá šundlo tyré uštendyr.

¹⁴Trin móly dro berš svenkin Mánge:

¹⁵dykh (rakh) svénko apriesnokengiro: eftá dyvesá xa priesno maró, syr Me rakirdjom túke, dro uphendló časo čhonéskiro Avivo; pal-dová so dro davá čhon tu vygijan Jegiptóstyr; i mek te na javén manušá angíl Mánde čhučé vasténca;

¹⁶dykh (rakh) i svénko ubijanypnaskiro pervoné barjakirdenca (plodenca) pharé butiátyr, savé tu počhudian pe félda, i svénko plodengiro skedyibén dro beršeskiro kónco (jagóro), kiéli ukedesa feldatyr tyrí butý.

¹⁷Trin móly dro berš isyn bangé te javén saré tyré muršá angíl Baré-Ráskiro, Ráskire-Devléskiro muj.

¹⁸Na čhuv rat Miré-sventoné dyibnástyr (žertvatyr) kvašenone marésa, i čekén (túko) Miré svenkoskire žertvatyr naštý te jačélpe ke ránko (ke zlóko).

¹⁹Tyré pérva (anglatuné) phuvjákire barjakirdé (plódy) jan dre Ráskiro-Devléskiro, tyré Devléskiro Kher. Na keráv buznores dro léskire — dákiro thud.

²⁰Ĥáda, Me bičhaváva angíl túte Jangolós te rakhél tut pe drom i te zalydžal tut pe dová štéto, savó Me kerdjom skedynó.

²¹Rakh pes angíl Léskiro muj, i šun Léskiri zan; na jav proti Léste, pal-dová so Jov na otmekéla tumaró grého; pal-dová so Miro lav isyn dre Léste.

²²Kóli tu javésa te šunés Léskiri zan i te kerés saró, so Me phenáva, tedy Me javáva vergosa (vrogosa) tyré vergénge i namalesa (protivnikosa) tyré namalenge.

²³Kiéli džála angíl túte Miro Jangólo, i lydžála tut ke Amoriei, Xietiei, Fierieziei, Xananiei, Jeviei i Jevusiei, i Me vymarava len:

²⁴tedy na kloninpe (na ker šerésa) léngire devlorénge, i na dynarin lénge, i na pirile léngire réndy, ne phagir len, i rosphagir léngire stýlby:

²⁵dynarin Ráske-Devléske, tumaré Devléske, i Jov bahtiakiréla Tyró maró i Tyró paní; i Me otlydžava nasvalypena tuméndyr.

²⁶Na javéla bi časoskiro te bijanen i na javéla nakhabnen (bičhavorengiren) pe tyrí phuv; Me keráva pherdé tyré-džiibnáskire dyvesá.

²⁷Me bičhaváva Mirí traš (dar) angíl túte, i dro konfuzo Me janáva kažnoné manušén, ke savé tu javésa, i Me javáva te obriskirav ke tu palalesa sarén tyré vergén;

²⁸Me bičhaváva angíl túte šeršnien (voslen), i jone tradéna tyré móstyr Jeviejen, Xananiejen i Xietiejen;

²⁹Me na vytradava len tyré móstyr dro jekh berš, sob (kaj) phuv te na kerélpe čhučí i te na vybarjon proti túte feldýtka riskiribnáskire murdalá (zvieri);

³⁰nábut pe nábut Me javáva te tradav len tútyr, ke davá časo, paka tu vybarjosa dre manušénde i na lésa dre péskire vastá daja phuv.

³¹Prolydžava tyré miéžy Lolé morjostyr (derjavestyr) ke mórjo (derjáv) Filistimijakiro i čhučé phuvjátyr ke reka (len'); pal-dová so Me otdáva dre tumaré vastá adalé-phuvjákire manušén, i tu tradesa len krig tyré móstyr;

³²na ker zavieto (dorakiribén) ni lénca, ni léngire devlorenca;

³³lénge naštý te dživén pe tyrí phuv, sob (kaj) jone te na zalydžan tut dro grého pe Mánde; pal-dová so, kóli tu javésa te mangespe léngire devlorénge, to davá javéla túke feliasa (sietkasa).”