Read Biblija - Pe Baltitko Romani čib (Romanes) 2019 Baltic Romani Bible Vygiiben 25 Bible Online

Vygiiben 25 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 25

¹I phendiá Raj Devél Mojzáske, i rakirdiá:

²“Phen Izrailjoskire čhavénge, sob (kaj) jone te kerén Mánge janybén; kažnoné manušéstyr, savó pe iló javéla te del, prilén janybén Mánge.”

³Ĥáda, isyn janybén, savé tumé san bangé te prilén léndyr: suvnakái, i rup, i xarkóma (mied'),

⁴i ĥolubovo výlna (šers'), purpurno i červlieno, i visono, i buzniengiri výlna,

⁵i bakrane lolé cypi, sine cypi, i veš sitimo,

⁶dzet (jeliejo) vaš šandalo (svietíl'niko), aromatytka čarjá te makhes i vaš gudló thuv (dymo),

⁷bar onikso i učhude bará vaš efódo i vaš napiersniko (žylietka).

⁸I keréna jone Mánge svénto štéto, i Me javáva te dživáv maškír lénde;

⁹saró, syr Me túke sykaváva, i sykaibén (obrazco) šatrakiro (skinijakiro), i sykaibén saré dalé lákire khorengiro; adiáke i kerén.

¹⁰Kerén kovčego (mohtó) vešéstyr sitimo: dlengipén léske te javél duj pašésa kuniá (lokti), i buĥlypén léske te javél jekh pašésa kuniá, i vučipén léske jekh pašésa kuniá;

¹¹i občhuv les žužé suvnakása, andrestyr i javriestyr, učhakir les; i ker uprál pašýl léste suvnakuný viánka.

¹²I vyčhuv vaš léske štar suvnakuné baré angrustiá i prizorjakir (priker) pe štar telatuné léskire véngly; duj baré angrustiá pe jekh léskiri rig, duj baré angrustiá pe javír léskiri rig.

¹³Ker vešéstyr sitimo balandiniá (šosty), i občhuv len suvnakása;

¹⁴I čhuv andré šosty dre baré angrustiá, pir kovčegoskire rigá, sob (kaj) lénca te lydžán kovčego;

¹⁵dre kovčegoskire baré angrustiá bangé te javén šosty i naštý te otlen léstyr.

¹⁶I čhuv len dre kovčego dosykaibnása (otkrovienijasa), savó Me túke dyjom.

¹⁷Ker adiáke-pac' žužé suvnakástyr denko (kryška): dlengipén lákiro duj kuniá pašésa, a buĥlypén lákiro jekh pašésa kuniá;

¹⁸i ker suvnakástyr dujén xieruvimen: čiekanone butiátyr ker len pe duj zaučhakiribnytka jagóry (koncy);

¹⁹ker jekhe xieruvimos jekhe jagoróstyr, a javire xieruvimos javire jagoróstyr; kerén xieruvimen khetané denkosa (kryškasa) pe lákire duj jagóry;

²⁰i javéna xieruvimy ĥazdyné upré phakenca, zaučhakiri péskire phakenca kryška, a péskire mujenca javéna jekh ke jekh; ke denko javéna xieruvimengire muiá.

²¹I čhuv pe kovčego (mohtó) upré, dro kovčego čhuv dosykaiben (otkrovienija), savó Me túke davá;

²²odój Me javáva te sykadjovav túke i te rakiráv túsa uprál, kaj upré denko, maškirál duj xieruvimy, savé pe kovčego dosykaibnása (otkrovienijasa), pal saró, so Me javáva te piridav pir túte Izrailjoskire čhavénge.

²³I ker skamínd vešéstyr sitimo, dlengipnása dre duj kuniá, buĥlypnasa dre jekh kun', a vučipnása dre jekh kun' pašésa,

²⁴i občhuv les žužé suvnakása, i ker pašýl léste suvnakuný viánka (frizo).

²⁵I ker pašýl léskire rigá (boki) dre burnyk (ladoška) buĥlypnasa, i pašýl léskire rigá ker suvnakuný viánka pašýl;

²⁶i ker vaš léske štar suvnakuné baré angrustiá, i prizorjakir (priker) angrustiá pe štar véngly pašýl léskire štar ĥerore;

²⁷pašýl boki (rigá) bangé te javén brenčy (obruči), sob (kaj) te čhuvés balandiniá (šosty), sob (kaj) te lydžas pe lénde skamínd;

²⁸a balandiniá ker vešéstyr sitimo, i občhuv len suvnakása, i javéna te lydžán pe lénde davá skamínd;

²⁹ker adiáke-pac' vaš léske čarore, kadily, tahtaja i kučika, sob (kaj) lénca te občhuves: žužé suvnakástyr ker len;

³⁰i čhuv pe skamínd svénta maré (priedloženija) angíl Miro muj saró časo.

³¹I ker momolýtko (svietíl'niko) žužé suvnakástyr; čekanindlo bangó te javél davá momolýtko; léskiro destó, léskire randiá, kučikorja léskire, phabá léskire i luludiá (cvety) léskire trej, sob (kaj) jone te vydžán léstyr;

³²trej, sob (kaj) šov randiá te vydžán léskire rigéndyr: trin randiá momolytkoneskire jekhe léskire rigátyr, i trin randiá momolytkoneskire javire léskire rigátyr;

³³trin kučikorja, savé podžana pe mindal'no luludí (cveto) te javén pe jekh rand', phabasa i luludienca i trin kučikorja, savé poddžana pe mindal'no luludí (cveto) pe javír rand', phabasa i luludienca: adiáke javéla pe saré šov randiá, savé vydžána momolytkonestyr;

³⁴a pe momolytkoneskiro destó trej, sob (kaj) te javél štar kučikorja, savé te javén sýrby mindal'no luludiá phabenca i luludienca;

³⁵šove randiendyr, savé vydžána momolytkoneskire ĥerjatyr te javél phabaj tel duj léskire randiá, i phabaj tel trita duje léskire randiendyr.

³⁶Phaba i randiá léngire trej, sob (kaj) jone te vydžán léndyr: trej, sob (kaj) jov saró te javél čekandlo, célo, žužé suvnakástyr.

³⁷I ker ke jov eftá lampady, i čhuv pe léste lampady léskire, sob (kaj) te sviencynen (te den dud) pe anglatuny léskiri rig (boko);

³⁸i ščypcy (cymty) ke jov i lotki ke jov te javén žužé suvnakástyr;

³⁹talantostyr, žužé suvnakástyr, te kerén les saré léskire sudinkenca.

⁴⁰Dykh, ker len pir dová sykaibén (obrazco), savó sys sykado túke pe bérga.