Read Biblija - Pe Baltitko Romani čib (Romanes) 2019 Baltic Romani Bible Vygiiben 28 Bible Online

Vygiiben 28 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 28

¹Akaná le ke pe Aaronós, tyré pšalés, i léskire čhavén lésa, čhavén Izrailjoskire rodóstyr, sob (kaj) jov te javél Mánge rašása, Aaronós i Nadavos, Aviudos, Jelizaros i Ifoamaros, Aaronóskire čhavén.

²I ker tyré pšaléske Aaronóske svénta uribená vaš sláva i šukaripén.

³I phen sarénge god'varé ilésa, savén Me pherdiakirdjom godé duhósa (fanosa), sob (kaj) jone te kerén Aaronóske uribená te vysvencynen les, sob (kaj) jov te javél rašáj Mánge.

⁴Ĥáda, isyn ídi, savé jone isyn bangé te kerén: napierstniko (žylietka), efódo, upratuny riza, xitono stiažno, kidaro i kustýk. Mek te kerén svénta ídi Aaronóske, tyré pšaléske, i léskire čhavénge, sob (kaj) jov te javél rašáj vaš Mánge.

⁵Mek jone te len suvnakái, golubovo i purpurno i červlieno výlna (šers') i visono,

⁶i mek te kerén efódo suvnakástyr, golubovoné, purpurnone i červljonone vylnátyr i krenconone visonóstyr, vysude butiátyr spiecostyr.

⁷Léste trej te javén pe duj léskire jagóry (koncy) duj naramniki te sphanden les, sob (kaj) jov te javél sphandlo.

⁸I kustýk efodoskiri, saví te javél upralestyr, trej, sob (kaj) joj te javél jekhe butiátyr lésa (efodosa), suvnakástyr, golubovoné, purpurone i červljonone vylnátyr i krenconone visonóstyr.

⁹I le duj bará aniksostyr i vyčhin pe lénde Izrailjoskire-čhavéngire lavá:

¹⁰šov léngire lavá pe jekh bar, i šov lavá, savé jačénape, pe javír bar pir léngiro bijanypén: kon džal pérvo;

¹¹trej, sob (kaj) te kerél davá o čhinybnari pe bar, savó vyčhinela jakhítka (čergenorja), vyčhin pe duj bará Izrailjoskire-čhavéngire lavá; i čhuv len andré dre suvnakuné opravy;

¹²i čhuv dalé duj bará pe efodoskire naramniki: dalé bará pe ripiribén Izrailjoskire čhavénge; i javéla Aaróno te lydžál léngire lavá angíl Raste-Devléste pe duj péskire psiké vaš ripiribén.

¹³I ker opravy suvnakástyr;

¹⁴i duj cepočki (zandirorja) žužé suvnakástyr, ker len krenconenca khudé butiátyr, i priker krencona zandirorja ke opravy.

¹⁵Ker napierstniko (žylietka) te sendines vastengire butiátyr, syr efódo: suvnakástyr, golubovoné, purpurone i červljonone vylnátyr i krenconone visonóstyr ker les;

¹⁶trej, sob (kaj) jov te javél štaré venglenca, duje rigéndyr, dre burnyk (piadien') dlengipnása i dre burnyk buĥlypnasa;

¹⁷i čhuv andré dre léste bará dre opravy dre štar riady; pérvo riado: rubino, topazo, izumrudo, — davá isyn jekh riado;

¹⁸iavír riado: karbunkulo, sapfiro i almazo (diamanto);

¹⁹tríto riado: jahonto, agato i amietisto

²⁰štárto riado: xrisolito, onikso i jaspiso; dre suvnakuné opravy trej, sob (kaj) jone te javén čhudé andré.

²¹Trej, sob (kaj) saré bará te javén dešudúi, adákicy, ci but isyn Izrailjoskire čhavé, pir léngire lavá; pe kažno, sýrby pe jakhítko (čergenorí), trej, sob (kaj) jone te javén vyčhindlé pir jekh lav dešudujé rodycendyr.

²²Ke napierstniko (žylietka) ker krencona cepočki (lancužki) krenconone khudé butiátyr žužé suvnakástyr;

²³i ker ke napierstniko (žylietka) duj baré angrustiá suvnakástyr, i priker duj baré angrustiá ke duj napierstnikoskire jagóry;

²⁴i čhuv andré duj khudé cepočki (zandirorja) suvnakástyr dre baré angrustiá pir napierstnikoskire jagóry (koncy),

²⁵a duj javír jagóry (kraí) duje dalé zandiror'jengire (cepočkengire) priker ke duj opravy, i priker ke efodoskire naramniki léskire rigátyr, saví isyn angíl;

²⁶iščo (inké) ker duj suvnakuné baré angrustiá i priker len ke javír duj napierstnikoskire jagóry, pe doiá rig, saví isyn pašty ke efódo andrál;

²⁷adiáke-pac' ker duj suvnakuné baré angrustiá i priker len ke duj efodoskire naramniki telál, léskire rigátyr, saví isyn angíl, pašýl léskiro šovo, pe efodoskiri kustýk;

²⁸i prikeren ke jone napierstniko (žylietka) léskire baré angrustienca ke efodoskire baré angrustiá šnurosa (dorjasa) ĥolubovone vylnátyr, sob (kaj) jov te javél pe efodoskiri kustýk, i, sob (kaj) kaj te na perél napierstniko efodostyr.

²⁹I javéla te lydžál Aaróno Izrailjoskire čhavéngire lavá pe napierstniko, sob (kaj) te sendiakirél (te rosphandel čačipén) pašýl léskiro iló, kiéli javéla te zadžál andré svénto štéto, vaš kažno ripiribén pal čačipén angíl Raste-Devléste.

³⁰I čhuv pe napierstniko, sob (kaj) te rosphandel čačipén Urimo i Tumimo, i jone javéna pe iló Aaronoste, kiéli jov javéla te džal andré svénto štéto angíl muj Ráskiro-Devléskiro, i javéla Aaróno saró časo (cýro) te lydžál Izrailjoskire-čhavéngiro séndo pašýl péskiro iló angíl Ráskiro-Devléskiro muj.

³¹I ker upratuny riza ke jefodo sarí golubovoné cviatosa (mastiniasa);

³²maškirál láte trej, sob (kaj) te javél otčhakiriben (kula) vaš šeró; pašýl davá otčhakiriben trej, sob (kaj) jov te javél obsudo pohtanesa, adiáke-pac' syr pašýl broniakiro (pancyrjoskiro) otčhakiriben, sob (kaj) jov te na kušelpe;

³³pir lákiri podia ker phabá golubovoné thavendyr, jahontovone, purpurone i červljonone cviatosa (mastiniasa), pašýl lákiri podia; suvnakuné kudunorja (pozvonki) maškír lénde pašýl:

³⁴suvnakuný kudunori i phabaj, suvnakuný kudunori i phabaj, trusciál (krugom) pir upratune-rizakiri podia;

³⁵joj javéla pe Aaronoste, kiéli jov javéla te dynarinél syr rašái, sob (kaj) te javél šundly léstyr zniko (zvuko), kiéli jov javéla te zadžál andré svénto štéto angíl Ráskire-Devléskiro muj i, kiéli javéla te vydžál, sob (kaj) léske te na merél.

³⁶I ker phaljori (dosočka) žužé suvnakástyr, i vyčhin pe láte, syr vyčhinena pe jakhítko (čergenorí): “Sventyma Devléskiri”,

³⁷i priker la golubovoné-cviatoskire šnurosa (dorjasa) ke kidaro, adiáke, sob (kaj) joj te javél pe anglatuny kidaroskiri rig;

³⁸i javéla joj pe Aaronoskiro šeró, i lydžála pe péste Aaróno janybnaskire nado uhtylybena, kiéli vysvencynenas Izrailjoskire čhavéndyr, i saré dáry, savé jone janénas; i javéla joj saró časo pe léskiro šeró, sob (kaj) jone te lathén láska angíl Raste-Devléste.

³⁹I ker xitono visonóstyr i kidaro visonóstyr, i ker kustýk vysude butiátyr uzorenca;

⁴⁰ker Aaronóskire čhavénge xitony, sker lénge kustyka, i phandlunia (poviazki) pe šeró, ker lénge vaš sláva i šukaripén,

⁴¹i uri dre lénde Aaronós, tyré pšalés, i léskire čhavén lésa, i pomakh len, i pherdiakir léngire vastá, i vysvencyn len, i jone javéna rašaja Mánge.

⁴²I ker lénge telatuné ídi ljonostyr (ĥandladestyr) te učhakiren nange masá trušulendyr ke čangá,

⁴³i mek te javén jone pe Aaronoste i pe léskire čhavénde, kiéli jone javéna te zadžán dre šátra (skínija) vaš skedyibén ci te poddžan ke altárjo (žertvieniko) te dynarinén pe svénto štéto, sob (kaj) lénge te na lydžán pe péste grého i te na merén. Davá isyn statúto pe viéko vaš léske i vaš léskire-čhavéngire čhavénge pal léste.