Read Biblija - Pe Baltitko Romani čib (Romanes) 2019 Baltic Romani Bible Vygiiben 29 Bible Online

Vygiiben 29 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 29

¹Ĥáda, so túke trej te kerés pe lénde, sob (kaj) tu te vysvencines len dre rašande Mánge: le jekhés guruvóres (tiel'cos) guruvendyr, i dujén bakrén bi došengiro,

²i priesna maré (maca), i apriesnoki, pirimiešindle jeliejosa i priesna mariklia, pomakhne jeliejosa: parné givestyr ker len,

³i čhuv len dro jekh khudo (korzina), i jan len dro khudo, i khetané guruvóres i dujén bakrén.

⁴Aaronós i léskire čhavén jan ke zagiibén dre šátra vaš skedyibén, i obmor len paniésa.

⁵I le uribená, i Aaronós uri dro xitono i dre upratuny riza, dro efódo i dro napierstniko, i obphande les pir efódo;

⁶i čhuv léske pe šeró kidaro, i priker diadema svénto pe kidaro;

⁷i le jeliejo te makhes, i čhuv les léske pe šeró, i pomakh les.

⁸I jan adiáke-pac' léskire čhavén, i uri len dre xitony;

⁹i obphande len kustykasa, Aaronós i léskire čhavén, i čhuv pe lénde phandlunia (poviazki), i javéla lénge dynó rašaiben pir statúto pe viéko; i pherdiakir Aaronóskire i léskire-čhavéngire vastá.

¹⁰I jan guruvóres angíl šátra vaš skedyibén, i čhuvéna Aaróno i léskire čhavé péskire vastá pe guruvoreskiro šeró;

¹¹i začhin guruvóres angíl Raste-Devléste angíl zagiibén dre šátra vaš skedyibén;

¹²le guruvoreskiro rat, i čhuv tyré anguštesa (pal'cosa) pe altarjoskire šyngá (rógi), a saró rat vyčhuv pašýl altárjo;

¹³le saró čekén (túko), savó učhakiréla buke (andratuné masá), i sal'niko kalé bukesa (piečonkasa), i duj bukore (počki) i túko, savó isyn pe lénde, i shačkir pe altárjo;

¹⁴a guruvoreskiro mas i léskiri cýpa i léskiro ĥnejo (mesta) shačkir pe jag pal stáno: davá — svénto dyibén (žértva) pal grého.

¹⁵I le jekhés bakrés, i čhuvéna Aaróno i léskire čhavé péskire vastá pe bakreskiro šeró;

¹⁶i začhin bakrés, i le léskiro rat, i bryzgin pe altárjo saré rigéndyr;

¹⁷rosčingir bakrés pe pašá, vymor léskire buke (andratuné masá) i léskire ĥerá i čhuv len pe rosčhingirde léskire pašá i pe léskiro šeró;

¹⁸i shačkir saré bakrés pe altárjo. Davá isyn célo shačkiribén Ráske-Devléske, gudló thuv, svénto dyibén, Ráske-Devléske.

¹⁹Le i javire bakrés, i čhuvéna Aaróno i léskire čhavé péskire vastá pe bakreskiro šeró;

²⁰i začhin bakrés, i le léskiro rat, i čhuv pe čačó (pravo) Aaronoskiro kan pe jagóro (krajo) i pe léskire-čhavéngiro čačó kan pe jagóro, i le léngiro pravone-vasteskiro baró angúšt (pal'co), i pe léngiro pravone-ĥer'iakiro baró angúšt; i obryzgin ratésa altárjo saré rigéndyr;

²¹i le rat, savó isyn pe altárjo, i makhibnytko aliejo, i bryzgin pe Aaronoste i pe léskire uribená, i pe léskire čhavénde, i pe léskire-čhavéngire uribená lésa — i javéna vysvencyndle jone, jov i léskire ídi, i léskire čhavé i léngire uribená lénca.

²²I le bakrestyr čekén i kurdiuko, i čekén, savó učhakiréla buke (andratuné masá), i sal'niko kalé bukestyr, i duj bukore i čekén, savó isyn pe lénde, čačó (pravo) psikó,

²³i le jekh krenglo maró, jekh marikly pe jeliejo i jekh apriesnoko khudestyr (korzinatyr), savó isyn angíl Raste-Devléste,

²⁴i čhuv saró pe vastá Aaronóske i pe léskire-čhavéngire vastá, i jan davá, trinskiri angíl Ráskire-Devléskiro muj;

²⁵i le davá léngire vasténdyr, i xačkir sarésa pe altárjo celoné shačkiribnasa syr gudló thuv angíl Raste-Devléste: davá isyn svénto dyibén (žértva) Ráske-Devléske.

²⁶I le kolýn bakriatyr te obsvencynes, savó vaš Aaronóske, i jan les, trinskiri angíl Ráskire-Devléskiro muj, — i davá javéla tyrí paš (dólia);

²⁷i obsvencyn kolýn, savó sys trinskirdo, i psikó, savó sys ĥazdynó, obsvencyndle bakrestyr, savó isyn vaš Aaronóske i vaš léskire čhavénge,

²⁸i javéla davá Aaronóske i léskire čhavénge dro viéčno statúto (ustavo), pal-dová so davá isyn svénto dyibén ĥazdypnasa i davá javéla janybén Izrailjoskire čhavéndyr, savó trej, sob (kaj) jov te javél angíl mirna svénta dyibená lénde, davá javéla léngiro svénto dyibén ĥazdypnasa Ráske-Devléske.

²⁹A obsvencindle uribená, savé isyn vaš Aaronóske, piridžana korigedýr (pozžedýr) léstyr ke léskire čhavé, sob (kaj) dre lénde te makhes len i te vysvencynes len syr rašán;

³⁰eftá dyvesá trej, sob (kaj) te ur'jelpe dre lénde čhavó léskire čhavéndyr, savó terdjola pe léskiro štéto syr rašái, savó javéla te zadžál dre šátra skedyibnáskiri te dynarinél pe svénto štéto.

³¹Bakrés, savó sys obsvencyndlo, le, i keráv léskiro mas pe svénto štéto;

³²i mek te shan Aaróno i léskire čhavé saró bakreskiro mas khudestyr, pašýl vudará dre šátra skedyibnáskiri,

³³pal-dová so dalésa sys kerdó žužakiriben te piridén lénge rašaipen, i te vysvenciakiren len; javír manúš naštý te xal davá, pal-dová so davá isyn svénto;

³⁴a kóli vari-savó mas jačélape, sósa svenciakirenas i maró ke ránko, to shačkir les pe jag, so jaciápe: naštý te xas les, pal-dová so davá isyn svénto.

³⁵I ker Aaronosa i léskire čhavénca dro saró adiáke, syr Me phendjom túke; pal eftá dyvesá vysvencynesa len.

³⁶I guruvóres pal grého jan kažno dyvés vaš léskiro žužakiriben, i svénto dyibén (žértva) pal grého, sob (kaj) te žužakirel altárjo i pomakh les vaš léskiro obsvencynyben;

³⁷eftá (bitrinéngiro deš) dyvesá žužakir altárjo, i obsvencyn les, i javéla altárjo bari sventyma: saré, kon čilavéla altárjo, osvencynenape.

³⁸Ĥáda, so tu javésa te janes pe altárjo: dujén bakrén jekhe-beršytkonen kažno dyvés saró časo;

³⁹iekhés bakrés jan zlokostyr (rankostyr), a javire bakrés jan bel'velié,

⁴⁰i déšto paš efakiri parné givestyr fededyrone jaržestyr, smiešindlo štartone pašésa ginosa vytasade jeliejosa, a te janes thaduno svénto dyibén — štárto paš gino moliátyr (vinostyr), vaš jekhe bakreske;

⁴¹iavirés bakrés jan bel'velié: jaržeskire darosa, dasavo-pac' syr rankosa (zlokosa), i dasavesa thadune-sventoné dyibnasa jan les dre gudló thuv, dro jaguno svénto dyibén Ráske-Devléske.

⁴²Davá javéla syr célo shačkiribén saró časo dre tumaré stréčy (pokolienii) angíl vudará dre šátra vaš skedyibén angíl Raste-Devléste, kaj Me javáva te sykadjovav tuménge, sob (kaj) te rakiráv túsa;

⁴³odój Me javáva te sykadjovav Izrailjoskire čhavénge, i obsvenciakirelape davá štéto Miré slavása.

⁴⁴I Me vysvenciakirava šátra vaš skedyibén i altárjo; i Aaronós i léskire čhavén vysvenciakirava, sob (kaj) jone sventes te dynarinén Mánge;

⁴⁵i Me javáva te dživáv maškír Izrailjoskire čhavénde, Me javáva lénge Devlésa,

⁴⁶i udžinena, so Me som Raj Devél, léngiro Devél, Savó vylydžijá len Jegiptóskire phuvjátyr, sob (kaj) Mánge te dživáv maškír lénde. Me som Raj Devél, léngiro Devél.