Read Biblija - Pe Baltitko Romani čib (Romanes) 2019 Baltic Romani Bible Vygiiben 30 Bible Online

Vygiiben 30 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 30

¹I ker altárjo te xačkires gudlé smóly, sitimoskire vešéstyr ker les:

²dlengipén léske te javél kun' (loktjo), i buĥlypén léske te javél kun', sob (kaj) jov te javél štaré-venglytko; a vučipén léske te javél duj kuniá; léstyr bangé te vydžán léskire šyngá (rógi);

³občhuv les žužé suvnakása, léskiro upralypén i léskire rigá trusciál (krugom), i léskire šyngá; i ker ke jov suvnakunó krenglypen (frizo) trusciál.

⁴Tel léskiro krenglypen, pe duj léskire véngly, ker duj baré angrustiá suvnakástyr; ker len duje léskire rigéndyr; i javéna jone čhuibnasa vaš balandiniá (šosty), sob (kaj) te lydžas les pe lénde;

⁵balandiniá ker vešéstyr sitimo (akacyja), i občhuv len suvnakása.

⁶I čhuv altárjo angíl pologo, savó te javél angíl kovčego dosykaibnása (otkrovienijasa), kaj Me javáva te sykadjovav túke.

⁷Pe léste Aaróno javéla te xačkirel dróga smóly (fimiámo); kažno ránko, kiéli jov skedéla lampady, javéla te xačkirel dróga smóly lénge;

⁸i kiéli Aaróno xačkiréla bel'velié lampady, jov javéla te xačkirel dróga smóly (fimiámo) lénge: davá isyn kažnoné thuvliakiriben pe kažno dyvés angíl Raste-Devléste dre tumaré ródy.

⁹Na čhuvén pe léste nisavó javír thuvliakiriben, ni célo shačkiribén, ni marunó janybén, i ni thaduno svénto janybén na čhuvén pe léste.

¹⁰I javéla te žužakirel Aaróno sventoné dyibnástyr léskire šyngá (rógi) jékhvar dre berš; jov javéla les te žužakirel jékhvar dro berš dre tumaré ródy žužakirdé žertvakire ratésa pal grého. Davá isyn bari sventyma Raste-Devléste.

¹¹I phendiá Raj Devél Mojzáske, rakirí:

¹²“Kiéli tu javésa te kerés Izrailjoskire čhavénge ginybén pir šeré angíl, syr len te piridykhen, to mek kažno te del vykinybén pal péskiro di Ráske-Devléske angíl léngiro piriginybén, i na javéla maškirál lénde xasibnýtka fránsy angíl léngiro ginybén;

¹³kažno, kon zadžála dro ginybén, isyn bangó te del paš šékieljo, svencyndlo šékieljo; dro šékieljo biš giery, paš šékieljo te javél janybén Ráske-Devléske;

¹⁴kažno, kon poperela dro piriginybén bišé beršéndyr i butýr, trej, sob (kaj) jov te del janybén Ráske-Devléske;

¹⁵barvaló na butedýr i čororó na tyknedýr syr paš šékieljo trej, sob (kaj) jone te den dro svénto janybén Ráske-Devléske, vaš léngire dijá te vykinen;

¹⁶i le vykinybnaskiro rup Izrailjoskire čhavéndyr, i mek les dro réndo pe skinijakiri šátra skedyibnáskiri te dynarinén; i davá javéla vaš Izrailjoskire čhavénge dro ripiribén angíl Raste-Devléste, vaš tumaré dijá te vykinen.”

¹⁷I phendiá Raj Devél Mojzáske, rakirí:

¹⁸“Ker moske čaró xarkomátyr (miediatyr) te obmorespe i tel léskire ĥerá predkico xarkomátyr, i čhuv les maškír skedyibnáskiri šátra i maškirál altárjo, i čhuv dre léste paní;

¹⁹i mek Aaróno i léskire čhavé léstyr isyn te obmoren péskire vastá i péskire ĥerá;

²⁰kiéli lénge trej te zadžán dre skedyibnáskiri šátra, mek jone te obmorenpe paniésa, sob (kaj) lénge te na merén; ci kiéli lénge trej te poddžan te javén pašyledýr ke altárjo te dynarinén, te janén céla shačkiribena Ráske-Devléske,

²¹mek jone te obmoren paniésa péskire vastá i ĥerá, sob (kaj) lénge te na merén; i javéla lénge davá viéčno statúto, léske i léskire rodóske dre léngire ródy.”

²²I phendiá Raj Devél Mojzáske, rakirí:

²³“Le péske sámo fededýr lačhé-khandypnytka čar'jendyr (parfuny): smirna samatočno pandžšelá šékieli, gudly korica khanduny paš proti dová, duj šelá pandždešá gudly triščyna (trosniko) duj šelá pandždešá,

²⁴kasija pandžšelá šékieli, pir šékieljo obsvencyndlo, i olivítko dzet gino;

²⁵i ker saréstyr miro vaš obsvencybnytko makhiben, čhudo khosyiben, davá javéla miro vaš makhiben te obsvencynes;

²⁶i pomakh lésa šátra vaš skedyibén i kovčego dosykaibnása (otkrovienijasa),

²⁷i skamínd i saré léskire pribory, i momolýtko (svietíl'niko) i saré léskire pribory, i kurinybnaskiro altárjo (žertvieniko),

²⁸i altárjo vaš céla shačkiribena i saré léskire pribory, i moskiro čaró te obmorespe (umyval'niko) i léskiro tel predkico;

²⁹i vysvencyn len, i javéla bari sventyma: saró, so pričilavelape ke jone, javéla osvencyndlo;

³⁰pomakh i Aaronós i léskire čhavén, i vysvencyn len, sob (kaj) jone te javén rašaja Mánge.

³¹A Izrailjoskire čhavénge phen: ‘Davá javéla Mánde makhibnaskiro miro te osvencynenpe dre tumaré ródy;

³²naštý te čhuvés davá miro pe javire manušénde, i piró léskiro čhuibén (sostavo) na kerén dasavo-pac' léske. Jov isyn sventyma: trej, sob (kaj) svénto jov te javél vaš tuménge;

³³kon čhuvéla dasavo-pac' miro, ci kon lésa makhela javirés manušés, odová manúš xasjola péskire manušéndyr.’”

³⁴I phendiá Raj Devél Mojzáske: “Le péske lačhé-khandypnytka čar'jendyr: stakta, oniho, gudló xalvano i žužó livano, saró pir šerá (rávnes),

³⁵i ker léndyr gudlé smóly (fimiámo) te xačkires, dasavo čhuibén, syr keréla spieco pir parfuny (parfiumiero): londo, žužó, svénto.

³⁶I rostasav (rostolkin) les xurdes (drobnes), i čhuv les angíl kovčego dosykaibnása (otkrovienijasa), dre šátra skedyibnáskiri, kaj Me javáva te sykadjovav túke, davá javéla bari sventyma vaš tuménge;

³⁷na kerén péske gudlé smóly (fimiámo), kerdó pir davá čhuibén, sventonesa mek te javél jov túte vaš Ráske-Devléske;

³⁸kon keréla dasavo, sob (kaj) te thuvliakiren lénca, odová manúš te xasjol péskire manušéndyr.”