Read Biblija - Pe Baltitko Romani čib (Romanes) 2019 Baltic Romani Bible Vygiiben 31 Bible Online

Vygiiben 31 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 31

¹I phendiá Raj Devél Mojzáske:

²“Dykh, Me čhuváva ukrat (kak raz) Viesielieilos, Urijaskire čhavés, Orovoskire čhavés, Judáskire rodycóstyr;

³i Me les pherdiakirdjom Devléskire Duhósa (Fanosa), godypnasa, godiása, džinybnasa i kažnoné iskustvosa,

⁴te vyduminel vučé-mastieritka thana te kerél butý suvnakása, rupésa i xarkomasa (miediasa),

⁵te čhinel kuč bará vaš čhuibén andrál oprava i te vyčhinel veš, sob (kaj) te kerés kažno réndo;

⁶i, ĥáda, Me dáva léske pomogibnaskiren Agoliavos, Ahisamahovoskire čhavés, Danóskire rodycóstyr, i dro kažno god'vareskiro iló me čhuváva godypén, sob (kaj) jone te kerén saró, so Me priphendjom túke:

⁷šátra skedyibnáskiri i kovčego dosykaibnása (otkrovienijasa) i denko (kryška) pe léste, i saró, so trej vaš šátra,

⁸i skamínd, i so trej vaš léske, i momolýtko (svietíl'niko) žužé suvnakástyr i saré pribory, so trej vaš léske, i altárjo te thuvliakires gudlé smóly (fimiámo),

⁹i altárjo vaš célo shačkiribén, i saró, so trej vaš léske, i moske čaró (umyval'niko) i predkico tel léste,

¹⁰i uribená te dynarinél rašása i svénta uribená rašáske Aaronóske, i léskire čhavénge uribená vaš svénto dynaribén,

¹¹i dzet (jeliejo) te makhes i gudlé smóly te xačkires vaš svénto štéto; saró adiáke, syr Me phendjom túke, jone keréna.”

¹²I phendiá Raj Devél Mojzáske:

¹³“Phen adiáke Izrailjoskire čhavénge: ‘Sávaty (suboty) Miré rakhén, pal-dová so-davá so znamiénii (ĥiertyká) maškír Mánde i tuménde dre tumaré ródy, sob (kaj) tumé te džinén, so Me som Raj Devél, Savó svenciakirela tumen;

¹⁴i rakhén sávato, pal-dová so jov isyn svénto vaš tuménge: kon magirela les, odová mek te javél otdynó meribnáske; kon léla te kerél dre davá dyvés vari-saví butý (réndo), dová di isyn bangó te javél xasiakirdo péskire manušéndyr;

¹⁵šov dyvesá mek te kerén réndo, a pe eftáto (bitrinéngiro déšto) dyvés sávato te otkhinjon, jov isyn otdynó Ráske-Devléske: kažno, kon keréla réndo dro savatoskiro dyvés, mek te javél otdynó meribnáske;

¹⁶i mek te rakhén Izrailjoskire čhavé sávato, te svenkinen sávato dre péskire ródy, syr viéčno zavieto;

¹⁷davá isyn ĥiertýk (znamiénijo) maškír Mánde i Izrailjoskire čhavénde pe viéko, pal-dová so pal šov dyvesá Devél sozdyjá bolybén i phuv, a pe eftáto dyvés otkinyja.’”

¹⁸I kiéli Devél pirijaciá te rakirél Mojzasa pe bérga Sinajo, Jov dyjá léske duj tablicy (skrižáli) dosykaibnása (otkrovienijasa), baruné skrižáli, pe savé čhindló sys Devléskire anguštesa.