Read Biblija - Pe Baltitko Romani čib (Romanes) 2019 Baltic Romani Bible Vygiiben 33 Bible Online

Vygiiben 33 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 33

¹I phendiá Raj Devél Mojzáske: “Džá adathýr, tu i manušá, savén tu vylydžijan Jegiptóskire phuvjátyr, pe phuv, pal saví Me sovlahadjom Avraamóske, Isaakóske i Jakovóske, rakirí: ‘Tyré-čhavéngire rodóske Me dáva la.’

²I angíl túte bičhaváva Me Jangolós, i tradava krig Xananiejen, Amoriejen, Xietiejen, Fierieziejen, Jeviejen i Jevusiejen,

³[i lydžála Jov tumen-r.s.] pe phuv, kaj thadéla thud i avgín; pal-dová so Me Kokoró na džáva maškír tuménde, sob (kaj) te na xasiakiráv Mánge tumen pir drom, pal-dová so tumé san manušá pharé-ilytka.”

⁴Manušá šundlé xoliamó davá lav, zarondle, i nikón na čhudiá pe péste péskire šukarjakiribena (prikedyibena).

⁵Paldavá so Raj Devél phendiá Mojzáske: “Phen Izrailjoskire čhavénge: ‘Tumé san pharé-ilytka manušá; kóli Me džáva maškír tuménde, to tedy Me dre jekh menta (minuta) xasiakiráva tumen; i adiáke zlen péstyr šukarjakiribena péskire; Me javáva te dykháv, so Mánge te keráv tuménca.’”

⁶Izrailjoskire čhavé zlyne péstyr šukarjakiribena péskire pašýl Xorivoskiri bérga.

⁷Mójza lyjá i čhudiá péske šátra pal stáno, durál stanostyr, i khardiá la šátra skedyibnáskiri, i kažno, kon rodyja Ras-Devlés, javélas dre šátra skedyibnáskiri, saví sys paló stáno.

⁸I kiéli Mójza džálas ke šátra, saré manušá uštenas, i kažno terdjolas pašýl zagiibén dro péskiri šátra i dykhciá dro Mojzáskiro sliado, paka jov zadžalas dre šátra.

⁹Kiéli Mójza zadžalas dre šátra, tedy zmekelaspe oblokoskiro stýlbo i terdjolas pašýl zagiibén dre šátra, i Raj Devél rakirdiá Mojzasa.

¹⁰I dykhné saré manušá oblokoskiro stýlbo, savó sys terdó pašýl zagiibén dre šátra i uštenas saré manušá, i kažno kerdiá šerésa (klonindiape) pašýl zagiibén dre péskiri šátra.

¹¹I rakirdiá Raj Devél Mojzasa muj pe muj, sýrby rakirdiá kon péskire malesa; i jov risijá dro stáno; a léskiro dynári Isúso (Johošuá), Navinoskiro čhavó, ternó, na otdžalas šatratyr.

¹²Mójza phendiá Ráske-Devléske: “Ĥáda, Tu rakirésa mánge: ‘Lýdža adalé manušén’, a dyján te džináv mánge, konés bičhavesa mánca, mek (xoc'). Tu phendián: ‘Me džinóm tut pir lav, i túte isyn láska dre Miré jakhá’;

¹³i adiáke, kóli me lathjom (lastiem) láska dre Tyré jakhá, tedy me mangáva; sykáv mánge Tyró drom, sob (kaj) me te džináv Tut, sob (kaj) te lathav láska dre Tyré jakhá; i depe mysliake, so adalé manušá isyn Tyré manušá.”

¹⁴Raj Devél phendiá: “Me Kokoró džáva [Miro očertanijo-ju.o.], i lydžáva tut dro štylypen (pokojo).”

¹⁵Mójza phendiá Léske: “Kóli Tu na džása Kokoró aménca, tedy i na lýdža amen adathýr,

¹⁶paldavá so pir so te udžinas, so me i Tyré manušá lathiam láska dre Tyré jakhá? Ci na pir davá, kiéli Tu džása aménca? Tedy me i Tyré manušá javása te vydaspe slavutnedyr kažnoné javire manušéndyr pe phuv.”

¹⁷I phendiá Raj Devél Mojzáske: “I davá pal so tu rakirdian, Me keráva, pal-dová so tu lathian láska dre Miré jakhá, i Me džinóm tut pir lav.”

¹⁸Mójza phendiá: “Sykáv mánge Tyrí sláva (baripén).”

¹⁹I phendiá Raj Devél: “Me lydžáva angíl túte sarí Mirí sláva, i barjakirava angíl túte lav Iiegova (Jahvá), i konés te primanges, Me primangava, konés te potangines — Me potanginava.”

²⁰I paló dová Jov phendiá: “Miro muj naštý túke te dykhés, pal-dová so manušéske naštý te dykhél Man i te jačélpe džidesa.”

²¹I phendiá Raj Devél: “Ĥáda, isyn Mánde štéto, terdjov pe daja skála;

²²kiéli javéla te džal Mirí sláva, Me čhuváva tut dre skalakiri rospharadyiben, i učhakirava tut Miré vastésa, paka Me prodžava;

²³i kiéli Me zlava Miro vast, tu dykhésa Man palalestyr, a Miro muj na javéla bicialó.”