Read Biblija - Pe Baltitko Romani čib (Romanes) 2019 Baltic Romani Bible Vygiiben 36 Bible Online

Vygiiben 36 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 36

¹I lyjá te kerél butý Viesielieilo i Agoliavo i saré godé ilésa, savénge Raj Devél dyjá godý i ĥalyibén, sob (kaj) te džinén te kerén kažno butý, saví trej vaš svénto štéto, syr priphendiá Raj Devél.

²I khardiá Mójza Viesielieilos i Agoliavos i sarén godé ilésa, savénge Raj Devél dyjá godý, i saré, konéskiro iló tyrdyja te javén pašyledýr ke butý i te kerén butý.

³I lyné jone Mojzastyr saró janybén, savé jandlé Izrailjoskire čhavé, pe trébima vaš svénto štéto, sob (kaj) te kerén butý. Ne usajékh na pirijačne te lydžán ke jov pir péskiro iló janybén kažno zlóko (ránko).

⁴Tedy javné saré godé ilésa (spiecy), savé kerdé rázna butiá pe svénto štéto, kažno péskire butiátyr, savjása, kon zalyjape,

⁵i phendlé Mojzáske: “Manušá janéna butýr, syr trej vaš butý, saví priphendiá te kerél Raj Devél.”

⁶I priphendiá Mójza, i sys dynó te džinén sarénge dro stáno, sob (kaj) ni murš, ni džuvlý te na kerén butýr ničý vaš janybén pe svénto štéto; i pirijačne manušá te lydžán.

⁷A skedynó matierialo (zapaso), savó uhtylelas (sys dósi) pe kažna butiá, savé treindiá te kerél, i až jaciápe.

⁸I kerdé saré godé ilésa, savé zalenaspe skinijakire butiasa pe šátra: deš cergi (deki) krenconone visonóstyr i golubovoné, purpurone i červljonone vylnátyr; i xieruvimy kerdé jone pe lénde vysude butiasa;

⁹dlengipén kažnoné cergakiro sys biš te eftá kuniá (logci), i buĥlypén kažnoné cergakiro sys štar kuniá: saré cergenge jekh baripén (razmiero).

¹⁰I khetaniakirdia jov (Viesielieilo) pandž cergi jekh javirjasa, i javír pandž cergi khetaniakirdia jekh javirjasa.

¹¹I kerdiá jov feliá (pietli) golubovoné cviatosa pe jagóro (krajo) jekhe cergakiro, kaj jov khetaniakirelape javirjasa; adiáke-pac' kerdiá jov i pe jagóro (krajo) palatuné (posliednjone) cergakiro, vaš lákiro khetaniakiriben javirjasa;

¹²pandždešá feliá (pietli) jov kerdiá dre jekh cérga, i pandždešá feliá (pietli) kerdiá pe jagóro javire cergakiro, kaj joj khetaniakirelape javirjasa; dalé feliá (pietli) poddžanas jekh javirjasa;

¹³i kerdiá jov pandždešá nanglore (kriučki) suvnakuné, i dalé nanglorenca jov khetaniakirdia jekh cérga javirjasa, i jaciá šátra jekh célo.

¹⁴Korigedýr (pozžie) jov kerdiá cérga buzniakire (kozakire) vylnátyr te učhakiren šátra: dešujekh cergi dasavé kerdiá;

¹⁵dlengipnása cérga sys trijánda kuniá, i buĥlypnasa cérga sys štar kuniá: dešujekhe cergenge sys jekh baripén.

¹⁶I khetaniakirdia jov pandž cergi iščo (inké) mólo i šov cergi iščo (inké) mólo pir jekh (otdiel'nes).

¹⁷I kerdiá jov pandždešá feliá (pietli) pe jagóro (pe krajo) krajnjone cergakiro, kaj jov khetaniakirelape javirjasa, i pandždešá feliá (pietli) kerdiá pe cergakiro jagóro, savó khetaniakirelape javirjasa;

¹⁸i kerdiá jov pandždešá xarkuné nanglore (miedítka kriučki) te učhakiren khetaniakiriben, sob (kaj) te sčhuvelpe jekh célo.

¹⁹I kerdiá vaš šátra pologo lolé bakrane cypendyr i upralestyr učhakiriben sinjone (barsukitkone) cypendyr.

²⁰I kerdiá jov bruski vaš šátra vešéstyr sitimo, savé sys terdé mamúj (priames).

²¹Deš kuniá sys brusoskiro dlengipén, i jekh pašésa sys kun' dro buglypen kažnoné brusoskiro;

²²dro kažno bruso sys pir duj šypy, jekh proti javiréste: adiáke jov kerdiá saré šatrakire bruski.

²³I kerdiá vaš skínija dasavé biš bruski vaš paš-dyvesýtko rig (južno),

²⁴i štardešá rupuvé predkicy tel ĥerá kerdiá tel biš bruski: duj predki (padnožyi) tel ĥerá tel jekh brusko vaš léskire duj šypy, i duj predki tel ĥerá tel javír brusko vaš léskire duj šypy;

²⁵i vaš javír šatrakiri rig, ke paš-rat (sieviero), kerdiá biš brusy,

²⁶i štardešá rupuvé predkicy tel ĥerá: duj predki tel ĥerá tel jekh bruso, i duj tel ĥerá predki tel javír bruso;

²⁷a vaš palatuny šatrakiri rig ke zapado, kerdiá jov šov brusy,

²⁸i duj brusy jov kerdiá vaš venglo dre šátra pe palatuny rig;

²⁹i sys jone khetaniakirde telál i khetaniakirde upré ke jekh bari angrusty: adiáke jov kerdiá lénca dujenca pe duj véngly;

³⁰i sys ohtó brusy, i rupuvé predki tel ĥerá dešušov pir duj predki tel ĥerá tel kažno bruso.

³¹I kerdiá balandiniá (šosty) vešéstyr sitimo (akacyja), pandž vaš brusy jekhe-šatrakire rigátyr,

³²i pandž balandiniá vaš brusy javire-šatrakire rigátyr, i pandž balandiniá vaš brusy palatuné-šatrakire rigátyr;

³³i kerdiá andratuný balandin, saví prodžalas by pir maškirál baré-angrustiakiro jekhe jagoróstyr ke javír;

³⁴bruski občhudiá suvnakása, i baré angrustiá, dre savé čhuvenape pale balandiniá, kerdiá suvnakástyr, i balandiniá občhudiá suvnakása.

³⁵I kerdiá šýrma golubovoné, purpurone i červljonone vylnátyr i krencone visonóstyr, i vysude sane butiasa kerdiá jov pe láte xieruvimy;

³⁶i kerdiá vaš láke štar stýlby sitimostyr i občhudiá len suvnakása, suvnakuné nanglorenca (kriučkenca), i vyčhudiá jov vaš lénge štar rupuvé predki tel ĥerá.

³⁷I kerdiá jov šýrma ke šatrakiro zagiibén ĥolubovone, purpurone i červljonone vylnátyr i krenconone visonóstyr, vysude sane butiátyr,

³⁸i pandž stýlby vaš láke nanglorenca (kriučkenca); i občhudiá léngiro vučipén i léngiro sphandypen suvnakása, i vyčhudiá pandž xarkuné (miedítka) predki tel ĥerá.