Read Biblija - Pe Baltitko Romani čib (Romanes) 2019 Baltic Romani Bible Vygiiben 40 Bible Online

Vygiiben 40 - Biblija - Pe Baltitko Romani čib (Romanes) 2019 Baltic Romani Bible bible

Vygiiben 40

¹I phendiá Raj Devél Mojzáske:

²“Dre anglatunó (pérvo) čhon, pe anglatunó dyvés čhonéskiro, čhuv upré skedyibnáskiri šátra,

³i čhuv dre láte kovčego (mohtó) dosykaibnása (otkrovienijasa), i učhakir kovčego šyrmasa;

⁴i zalydža skamínd, i rosčhuv pe léste saré léskire pribory, i jan momolýtko (svietíl'niko), i čhuv pe léste léskire lampady;

⁵i čhuv suvnakunó altárjo te xačkirén dróga smóly (fimiámo) angíl kovčego dosykaibnása (otkrovienijasa), i čhuv šýrma pašýl zagiibén dre šátra;

⁶i čhuv altárjo vaš célo shačkiribén angíl zagiibén dre skedyibnáskiri šátra;

⁷i čhuv moske čaró (umyval'niko) maškirál skedyibnáskiri šátra i maškirál altárjo i čhuv dre léste paní;

⁸i čhuv gréda (dvóro) trusciál i ublav šýrma pe gredakiri pórta.

⁹I le makhibnytko jeliejo (dzet), i pomakh šátra i saró, so isyn dre láte, i obsvencyn la i saré lákire pribory, i joj iavéla svénto;

¹⁰pomakh altárjo vaš célo shačkiribén i saré léskire pribory, i svenciakir altárjo, i javéla altárjo drieván svénto;

¹¹i pomakh moske čaró (umyval'niko) i léskire tel ĥerá predki, i svenciakir les.

¹²I jan Aaronós i léskire čhavén ke zagiibén dre skedyibnáskiri šátra i obmor len paniésa,

¹³i čhuv pe Aaronoste svénta uribená, i pomakh les i vysvencyn les, sob (kaj) jov te javél Mánge rašása.

¹⁴I léskire čhavén jan, i uri len dre xitony,

¹⁵i pomakh len, syr pomakhcian tu léngire dadés, sob (kaj) jone te javén Mánge rašanca, i léngiro pomakhiben te vysvencynel len pe viéki dre léngire ródy.”

¹⁶I kerdiá Mójza saró, syr priphendiá léske Raj Devél, adiáke i kerdiá.

¹⁷Dre anglatunó (pérvo) javire — beršeskiro čhon, pe anglatuné-čhonéskiro dyvés sys čhudý upré šátra.

¹⁸I čhudiá Mójza šátra, čhudiá lákire tel ĥerakire predki vaš fundámiento, čhudiá lákire bruski, čhudiá balandiniá i čhudiá lákire stýlby,

¹⁹rostyrdyja jov učhakiriben pe šátra, i čhudiá pologo uprál davá učhakiriben, syr phendiá Raj Devél Mojzáske.

²⁰I lyjá i čhudiá dosykaiben (otkrovienija) dre kovčego, i učhudia balandiniá dre baré angrustiá kovčegoskire, i čhudiá denko (kryška) pe kovčego uprál.

²¹I zalydžijá kovčego dre šátra, i ubladia šýrma, i učhakirdiá kovčego dosykaibnása (otkrovienijasa), syr phendiá Raj Devél Mojzáske.

²²I čhudiá skamínd dre skedyibnáskiri šátra, pe paš-ratítko (sievierno) šatrakiri rig, pal pologo,

²³i rosčhudiá pe léste maré riadosa angíl Raste-Devléste, syr priphendiá Raj Devél Mojzáske.

²⁴I čhudiá momolýtko dre skedyibnáskiri šátra proti skamínd, pe paš-dyvesýtko (južno) rig dre šátra,

²⁵i čhudiá lampady angíl Raste-Devléste, syr phendiá Raj Devél Mojzáske.

²⁶I čhudiá suvnakunó altárjo dre skedyibnáskiri šátra angíl pologo.

²⁷I zahačkirdia pe léste dróga smóly, syr phendiá Raj Devél Mojzáske.

²⁸I ubladia šýrma angíl zagiibén dre šátra;

²⁹I altárjo vaš célo shačkiribén čhudiá jov angíl zagiibén dre skedyibnáskiri šátra, i jandiá pe láte célo shačkiribén i marunó janybén, syr phendiá Raj Devél Mojzáske.

³⁰I čhudiá moske čaró (umyval'niko) maškír skedyibnáskiri šátra i altárjo, i čhudiá dre léste paní vaš obmoriben,

³¹i morenas léstyr Mójza i Aaróno i léskire čhavé péskire vastá i péskire ĥerá:

³²kiéli jone zadžanas dre skedyibnáskiri šátra i poddžanas ke altárjo, to jone obmorenaspe, syr phendiá Raj Devél Mojzáske.

³³I čhudiá gréda (dvóro) pašýl skínija i altárjo, i ubladia šýrma pe pórta gredakiri. I adiáke kerdiá Mójza réndo.

³⁴I učhakirdiá óbloko skedyibnáskiri šátra, i baripén Ráskiro-Devléskiro pherdiakirdiá šátra;

³⁵i naštý sys Mojzáske te zadžál dre skedyibnáskiri šátra, pal-dová so občhudiá la óbloko, i baripén Ráskire-Devléskiro pherdiakirdiá šátra.

³⁶Kiéli ĥazdelaspe óbloko šatratyr, tedy džánas dromésa Izrailjoskire čhavé dre saré péskire dromá;

³⁷kóli na ĥazdélape óbloko, to i jone na džánas dromésa, paka jov ĥazdélape,

³⁸pal-dová so Ráskire-Devléskiro óbloko sys terdó uprál šátra dyvesé, i jag sys ratý dre láte angíl jakhá saré Izrailjoskire kheréskiro, dre saré léngire dromá.